హైదరాబాద్ వాసులకు బిగ్ అలర్ట్: మారిపోనున్న సిటీ రూపురేఖలు.. రూ. 2,254 కోట్లతో సర్కార్ మాస్టర్ ప్లాన్!

భాగ్యనగరం శరవేగంగా అభివృద్ధి చెందుతోంది. పెరిగిన జనాభా, వాహనాల రద్దీతో హైదరాబాద్ (Hyderabad) రోడ్లపై ప్రయాణం అంటేనే వాహనదారులు భయపడిపోయే పరిస్థితి ఉంది. ముఖ్యంగా ఐటీ కారిడార్లు, శివారు ప్రాంతాల్లో ట్రాఫిక్ జామ్ ఓ నిత్యకృత్యంగా మారింది. అయితే ఈ సమస్యలన్నింటికీ శాశ్వత పరిష్కారం చూపేలా తెలంగాణ ప్రభుత్వం సంచలన నిర్ణయం తీసుకుంది. దాదాపు రూ. 2,254 కోట్ల భారీ బడ్జెట్‌ తో నగర మౌలిక సదుపాయాలను మెరుగుపరిచేందుకు భారీ ప్రాజెక్టులకు పరిపాలనా అనుమతులు మంజూరు చేసింది.

బుద్వేల్ వద్ద అద్భుతమైన 'ట్రంపెట్ ఇంటర్‌ఛేంజ్'

రాజేంద్రనగర్ వైపు వెళ్లే ప్రయాణికులకు ఇక నుంచి ప్రయాణం చాలా సులభం కానుంది. ORR (ఔటర్ రింగ్ రోడ్) వద్ద కిలోమీటర్ 143 దగ్గర, రేడియల్ రోడ్-2 ని కలుపుతూ ఒక అంతర్జాతీయ స్థాయి 'ట్రంపెట్ ఇంటర్‌ ఛేంజ్' నిర్మించబోతున్నారు. సుమారు రూ. 488 కోట్ల ఖర్చుతో రూపుదిద్దుకోనున్న ఈ ప్రాజెక్టు ద్వారా బుద్వేల్ లేఅవుట్ మరియు రాబోయే మూసీ రివర్‌ ఫ్రంట్ ప్రాజెక్టులకు అద్భుతమైన కనెక్టివిటీ లభిస్తుంది. దీనివల్ల గచ్చిబౌలి, శంషాబాద్ ఎయిర్‌ పోర్ట్ నుంచి రాజేంద్రనగర్ మధ్య ప్రయాణం సిగ్నల్ ఫ్రీగా మారనుంది.

బంజారాహిల్స్ టు గచ్చిబౌలి.. సిగ్నల్ ఫ్రీ ప్రయాణం!

నగరంలో అత్యంత రద్దీగా ఉండే బంజారాహిల్స్ నుంచి శిల్పా లేఅవుట్ వరకు కొత్తగా ఎలివేటెడ్ కారిడార్-IIIని ప్రభుత్వం ప్రకటించింది. దాదాపు రూ. 1,656 కోట్ల భారీ వ్యయంతో దీన్ని రెండు దశల్లో నిర్మిస్తారు.

• మొదటి దశ: ఫిలిం నగర్ నుంచి శిల్పా లేఅవుట్ వరకు (5 కిలోమీటర్లు).
• రెండవ దశ: బంజారాహిల్స్ ICCC టవర్ నుంచి హకీంపేట కుంట వరకు (4 కిలోమీటర్లు).

ఈ కారిడార్ పూర్తయితే బంజారాహిల్స్, ఫిలిం నగర్, ఐటీసీ కోహినూర్, టీ-హబ్ వంటి కీలక ప్రాంతాల మధ్య ట్రాఫిక్ ఇబ్బందులు పూర్తిగా తగ్గిపోతాయి. మెహదీపట్నం మీదుగా వెళ్లే అవసరం లేకుండా నేరుగా గచ్చిబౌలి చేరుకోవచ్చు.

పైప్‌లైన్ రోడ్డు వెడల్పు: మణికొండ వాసులకు గుడ్ న్యూస్

కోకాపేట్, మణికొండ, గండిపేట, నార్సింగి ప్రాంతాల్లో ట్రాఫిక్ రద్దీని తగ్గించేందుకు HGCL కీలక నిర్ణయం తీసుకుంది. MGIT నుంచి మణికొండ వరకు ఉన్న 3.57 కిలోమీటర్ల పైప్‌లైన్ రోడ్డును రూ. 110 కోట్లతో ఆరు లైన్ల రోడ్డుగా విస్తరించనున్నారు. ఇందులో డ్రైనేజీ వ్యవస్థ, ఫుట్‌పాత్‌ లు, ల్యాండ్‌స్కేపింగ్‌ తో పాటు అత్యాధునిక సౌకర్యాలు కల్పించనున్నారు.

ఏది ఏమైనా హైదరాబాద్ గ్లోబల్ సిటీగా ఎదుగుతున్న తరుణంలో, ఈ కొత్త ప్రాజెక్టులు రియల్ ఎస్టేట్ రంగంతో పాటు సామాన్య ప్రజల జీవన ప్రమాణాలను పెంచుతాయని నిపుణులు భావిస్తున్నారు. HMDA మౌలిక సదుపాయాల బాండ్ల ద్వారా ఈ నిధులను సమకూరుస్తోంది. త్వరలోనే ఈ పనులకు టెండర్లు పిలిచి, పనులను వేగవంతం చేయాలని ప్రభుత్వం భావిస్తోంది. మరి కొద్ది నెలల్లోనే ఈ పనులు పూర్తయ్యే అవకాశం ఉంది.