Click it and Unblock the Notifications
హైదరాబాద్లో పెంట్హౌస్ ఖరీదు రూ. 62 కోట్లు.. రియల్ ఎస్టేట్ మార్కెట్ను షేక్ చేస్తున్న డీల్..
Hyderabad Real Estate: హైదరాబాద్ లగ్జరీ రియల్ ఎస్టేట్ మార్కెట్ సరికొత్త శిఖరాలను తాకుతోంది. నగరం పశ్చిమ భాగమైన కోకాపేట్లోని గోల్డెన్ మైల్ రోడ్డులో నిర్మిస్తున్న ట్రంప్ టవర్స్ హైదరాబాద్ (Trump Towers Hyderabad) ప్రాజెక్టులో ఏకంగా రూ.62 కోట్లతో ఒక భారీ పెంట్హౌస్ విక్రయం జరగడం ఇప్పుడు ఐటీ బొకే, వ్యాపార వర్గాల్లో హాట్ టాపిక్గా మారింది.
హైదరాబాద్కు చెందిన ఒక ప్రముఖ వ్యాపార కుటుంబం.. దాదాపు 30 వేల చదరపు అడుగుల వైశాల్యం కలిగిన ఎనిమిది అపార్ట్మెంట్లను ఒకే పెంట్హౌస్గా మార్చుకుని ఈ కొనుగోలు చేయడం విశేషం. నగరంలోని స్థానిక సంపన్నులే ఇంత భారీ మొత్తంలో పెట్టుబడి పెట్టడం హైదరాబాద్ రియల్ ఎస్టేట్ రంగానికి ఉన్న బలాన్ని నిరూపిస్తోంది.
సుమారు రూ. 2 వేల కోట్ల భారీ అంచనా వ్యయంతో రూపుదిద్దుకుంటున్న ఈ ప్రాజెక్ట్లో రెండు 65 అంతస్తుల స్కైస్క్రేపర్ టవర్లు, 450 అపార్ట్మెంట్లు, 16 అత్యంత విలాసవంతమైన పెంట్హౌస్లు ఉండనున్నాయి. ఇక్కడ ఒక్కో అపార్ట్మెంట్ ప్రారంభ ధర రూ. 5 కోట్లుగా నిర్ణయించగా.. అధికారిక ప్రారంభోత్సవానికి ముందే ఎనిమిది పెంట్హౌస్ల ద్వారా ఏకంగా రూ. 250 కోట్ల విలువైన ప్రీ-లాంచ్ బుకింగ్స్ జరిగినట్లు డెవలపర్లు స్పష్టం చేశారు. ఒకప్పుడు కేవలం చదరపు అడుగుల విస్తీర్ణం, రీజనబుల్ ధరలకు వేదికగా ఉన్న హైదరాబాద్.. ఇప్పుడు ముంబై, ఢిల్లీ పశ్చిమ నగరాల తరహాలోనే ట్రోఫీ అడ్రస్ (Trophy Address) కల్చర్కు కేరాఫ్ అడ్రస్గా మారుతోంది.
గత కొన్నేళ్లుగా కోకాపేట్, నియోపోలిస్ (Neopolis) గచ్చిబౌలి పరిసర ప్రాంతాలు హైదరాబాద్కే ప్రతిష్టాత్మక నివాస ప్రాంతాలుగా విరాజిల్లుతున్నాయి. గతంలో ఓపెన్ ప్లాట్ల హెచ్ఎండిఏ (HMDA) ఇ-వేలంలో ఎకరం ధర రూ. 100 కోట్ల మార్కును దాటి రికార్డు సృష్టించిన నియోపోలిస్ పరిధిలోనే.. ఇప్పుడు అల్ట్రా-లగ్జరీ ఆకాశహర్మ్యాల నిర్మాణాలు ఊపందుకున్నాయి.
గ్లోబల్ బ్రాండ్ వాల్యూ, గరిష్ట గోప్యత (Privacy), ప్రైవేట్ క్లబ్ హౌస్లు, హెలిప్యాడ్లు, వరల్డ్ క్లాస్ ఆర్కిటెక్చర్ను కోరుకునే హై-నెట్-వర్త్ ఇండివిజువల్స్ (HNIs) కోసం స్థానిక డెవలపర్లు కూడా అంతర్జాతీయ ప్రమాణాలతో ప్రాజెక్టులను వేగంగా అందుబాటులోకి తెస్తున్నారు.
ప్రస్తుతం హైదరాబాద్ రియల్ ఎస్టేట్ మార్కెట్ సాధారణ రెసిడెన్షియల్ విభాగంలో కొద్దిపాటి స్థిరీకరణను చూస్తున్నప్పటికీ, ప్రీమియం, అల్ట్రా-లగ్జరీ విభాగంలో మాత్రం డిమాండ్ ఏమాత్రం తగ్గలేదు. మౌలిక వసతుల విస్తరణ, ఔటర్ రింగ్ రోడ్ (ORR) అనుసంధానం, నగరంలో పెరుగుతున్న గ్లోబల్ కేపబిలిటీ సెంటర్లు (GCCs), కొత్త ఐటీ ప్రాజెక్టుల రాక వల్ల పశ్చిమ హైదరాబాద్ మార్కెట్ నిలకడగా రాణిస్తోంది.
'ట్రంప్ టవర్స్' తెచ్చిన ఈ కొత్త ట్రెండ్.. రాబోయే రోజుల్లో ఇతర బిల్డర్లను కూడా కేవలం ధరల విషయంలోనే కాకుండా బ్రాండ్ అనుభవం, లగ్జరీ జీవనశైలి సౌకర్యాల కల్పనలో పోటీ పడేలా ప్రోత్సహించడం ఖాయంగా కనిపిస్తోంది. సంపదను సృష్టించడమే కాకుండా.. ఆ సంపన్నులు నివసించడానికి ఇష్టపడే ప్రపంచస్థాయి లగ్జరీ లైఫ్స్టైల్ను అందించడంలో హైదరాబాద్ వేగంగా అడుగులు వేస్తోంది.
Sign in with Google