హైదరాబాద్ రియల్ ఎస్టేట్.. భారీగా తగ్గిన ఇళ్ల రిజిస్ట్రేషన్లు.. రూ. కోటి పైన ఉంటేనే..

Hyderabad Real Estate: ప్రముఖ రియల్ ఎస్టేట్ కన్సల్టెన్సీ సంస్థ 'నైట్ ఫ్రాంక్ ఇండియా' (Knight Frank India) విడుదల చేసిన తాజా నివేదిక ప్రకారం.. 2026 సెప్టెంబర్ నెలలో భాగ్యనగరంలో నివాస గృహాల రిజిస్ట్రేషన్లు గణనీయమైన క్షీణతను చవిచూశాయి. గతేడాది ఇదే నెలతో పోలిస్తే సెప్టెంబర్‌లో గృహ రిజిస్ట్రేషన్లు ఏకంగా 15 శాతం పడిపోయాయి.

గత ఏడాది సెప్టెంబర్‌లో మొత్తం 6,612 రిజిస్ట్రేషన్లు జరగ్గా.. ఈ ఏడాది అదే నెలలో ఆ సంఖ్య 5,620కి పడిపోయింది. దీనికి అనుగుణంగానే మొత్తం లావాదేవీల విలువ కూడా 7 శాతం క్షీణించి రూ. 4,487 కోట్లకు చేరుకుంది. మార్గదర్శక విలువలను (Guideline Values) సవరించిన తర్వాత మార్కెట్‌లో ఏర్పడిన అస్థిరత కారణంగానే ఈ నెలవారీ కార్యకలాపాలలో హెచ్చుతగ్గులు ఏర్పడినట్లు నైట్ ఫ్రాంక్ పేర్కొంది.

ఈ ఏడాది సెప్టెంబర్‌లో అమ్మకాలు మందగించినప్పటికీ.. జనవరి నుండి సెప్టెంబర్ మధ్య మొదటి తొమ్మిది నెలల కాలంలో నగర గృహ మార్కెట్ మొత్తం మీద స్వల్ప వృద్ధిని నమోదు చేసింది. 2026 జనవరి - సెప్టెంబర్ మధ్య కాలంలో మొత్తం 55,715 నివాస గృహాలు నమోదు కాగా.. గత ఏడాది ఇదే కాలంలో ఈ సంఖ్య 55,505గా ఉంది. అయితే ఇదే సమయంలో మొత్తం లావాదేవీల విలువ 4 శాతం పెరిగి రూ. 38,536 కోట్ల నుండి రూ. 39,910 కోట్లకు చేరింది. ప్రీమియం, అధిక విలువ గల గృహాలు రియల్ ఎస్టేట్ మార్కెట్‌కు స్థిరమైన మద్దతునిస్తూనే ఉన్నాయని ఈ గణాంకాలు స్పష్టం చేస్తున్నాయి.

Also Read

రియల్ ఎస్టేట్‌ని ముంచుతున్న వడ్డీ రేట్లు పెంపు.. హోమ్ లోన్ భారం కావడంతో మార్కెట్ కుదేల్..

హైదరాబాద్ హౌసింగ్ మార్కెట్లో కొనుగోలుదారుల ప్రాధాన్యతలు మారుతున్నట్లు ఈ నివేదిక వెల్లడించింది. ముఖ్యంగా రూ. 50 లక్షల లోపు ధర ఉన్న అందుబాటు ధరల గృహాల విభాగంలో తీవ్రమైన క్షీణత కనిపించింది. సెప్టెంబర్‌లో ఈ కేటగిరీ ఇళ్ల రిజిస్ట్రేషన్లు 20 శాతం తగ్గి 2,883 యూనిట్లకు పడిపోగా.. లావాదేవీల విలువ 15 శాతం క్షీణించి రూ. 970 కోట్లకు పరిమితమైంది. ఇక రూ. 50 లక్షల నుండి రూ. 1 కోటి మధ్య ధర ఉన్న గృహాల రిజిస్ట్రేషన్లు 6 శాతం తగ్గి 1,446 యూనిట్లకు, వాటి లావాదేవీల విలువ 8 శాతం తగ్గి రూ. 1,004 కోట్లకు చేరింది.

మరోవైపు కోటి రూపాయల కంటే ఎక్కువ ధర ఉన్న లగ్జరీ, ప్రీమియం గృహాలు మార్కెట్లో తమ ప్రభావాన్ని కొనసాగిస్తున్నాయి. సెప్టెంబర్‌లో జరిగిన మొత్తం లావాదేవీల విలువలో ఈ ప్రీమియం గృహాల వాటా ఏకంగా 56 శాతంగా ఉండటం గమనార్హం (గతేడాది ఇది 54% మాత్రమే). అయితే ఈ విభాగంలోనూ రిజిస్ట్రేషన్లు 12 శాతం తగ్గి 1,291 యూనిట్లకు చేరినప్పటికీ.. లావాదేవీల విలువ మాత్రం కేవలం 2 శాతం తగ్గి రూ. 2,514 కోట్లుగా నమోదైంది.

సెప్టెంబర్‌లో నివాస గృహాల సగటు లావాదేవీ ధర గతేడాదితో పోలిస్తే 6 శాతం పెరిగి చదరపు అడుగుకు రూ. 5,021కి చేరింది. జిల్లాల వారీగా చూస్తే సంగారెడ్డిలో గృహాల ధరలు అత్యధికంగా 20 శాతం వృద్ధిని నమోదు చేయగా, మేడ్చల్-మల్కాజిగిరిలో 8 శాతం, హైదరాబాద్, రంగారెడ్డి జిల్లాల్లో చెరో 2 శాతం చొప్పున ధరలు పెరిగాయి. సెప్టెంబర్ నెలలో నమోదైన మొత్తం రిజిస్ట్రేషన్లలో రంగారెడ్డి జిల్లా వాటా అత్యధికంగా 49 శాతంగా ఉండగా.. ఆ తర్వాత మేడ్చల్-మల్కాజిగిరి 33%, హైదరాబాద్ 16%, సంగారెడ్డి జిల్లా 1% వాటాను కలిగి ఉన్నట్లు నైట్ ఫ్రాంక్ నివేదిక వెల్లడించింది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.