హైదరాబాద్‌లో గుడ్డిగా ఇల్లు కొని మోసపోవద్దు.. అనుమతులపై తీవ్ర హెచ్చరికలు జారీ చేసిన హైడ్రా..

Hyderabad Real Estate: తెలంగాణ రాజధాని హైదరాబాద్ పరిధిలో ఇల్లు లేదా ప్లాటు కొనాలనుకునే వారు గుడ్డిగా ప్రకటనలను నమ్మి మోసపోవద్దని 'హైడ్రా' (HYDRAA) తీవ్రంగా హెచ్చరించింది. క్షేత్రస్థాయిలో పూర్తిస్థాయి విచారణ జరిపి.. అన్ని అనుమతులు సరిగ్గా ఉన్నాయని నిర్ధారించుకున్న తర్వాతే ముందడుగు వేయాలని కమిషనర్ ఏవీ రంగనాథ్ సూచించారు. ముఖ్యంగా చెరువుల ఎఫ్‌టీఎల్ (Full Tank Level) పరిధిలో స్థలాలు ఉన్నాయా లేదా అనేది అత్యంత కీలకమని చెప్పుకొచ్చారు.

ఒకవేళ కొనుగోలు చేసే స్థలం నీటి వనరులకు సమీపంలో ఉంటే.. భవిష్యత్తులో అది ముంపునకు గురయ్యే ప్రమాదం ఉండటమే కాకుండా, చట్టపరమైన ఇబ్బందులు కూడా ఎదురవుతాయని ఆయన స్పష్టం చేశారు. అనుమతి పొందిన లేఅవుట్ అని చెబుతున్నప్పటికీ.. ఇంటి నంబర్లు లేదా బై-నంబర్లతో విక్రయాలు జరుపుతున్నప్పుడు వినియోగదారులు మరింత అప్రమత్తంగా ఉండాలి. రికార్డుల్లో ఉన్న నంబర్లకు.. క్షేత్రస్థాయిలో ఉన్న స్థలానికి ఖచ్చితమైన పొంతన ఉందో లేదో రెవెన్యూ, రిజిస్ట్రేషన్ శాఖల ద్వారా సరిచూసుకోవడం ఉత్తమమని తెలిపారు.

సోమవారం హైడ్రా ప్రధాన కార్యాలయంలో నిర్వహించిన 'ప్రజావాణి' కార్యక్రమంలో ప్రజల నుండి వెల్లువెత్తిన ఫిర్యాదులు ఈ హెచ్చరికల తీవ్రతను తెలియజేస్తున్నాయి. ఈ విడతలో మొత్తం 48 ఫిర్యాదులు రాగా.. అందులో మెజారిటీ ఫిర్యాదులు చెరువుల ఆక్రమణలు మరియు పార్కు స్థలాల కబ్జాలకు సంబంధించినవే ఉన్నాయి. ఉదాహరణకు, సెక్రటేరియట్ ఎంప్లాయీస్ హౌసింగ్ సొసైటీ ప్రతినిధులు తమ గోడును వెళ్లబోసుకుంటూ, అమీన్‌పూర్ చెరువు పరిధి పెరగడం వల్ల గతంలో తాము తీసుకున్న లేఅవుట్ నీట మునిగిపోయిందని ఆవేదన వ్యక్తం చేశారు.

Hyderabad: హైదరాబాద్ ఇక మూడు ముక్కలు? గ్రేటర్ సిటీని విభజిస్తూ బడ్జెట్‌లో సంచలన నిర్ణయం!

ప్రభుత్వ అనుమతులు ఉన్నప్పటికీ భౌగోళిక మార్పుల వల్ల కలిగే నష్టాలకు ఇది ఒక నిదర్శనం. అలాగే కాప్రాలోని జీఆర్ రెడ్డి నగర్ నివాసితులు తమ కాలనీలోని పార్కు స్థలాలను కాపాడాలని కోరారు. అక్కడ కేటాయించిన నాలుగు పార్కుల్లో క్రమంగా ప్రార్థన మందిరాలు వెలుస్తున్నాయని, దీనివల్ల ప్రజలకు కేటాయించిన బహిరంగ ప్రదేశాలు కనుమరుగవుతున్నాయని వారు ఆందోళన వ్యక్తం చేశారు.

బాలానగర్‌లోని శోభనా కాలనీలో ఉన్న అక్షయ ఎన్‌క్లేవ్ సమస్య కూడా తీవ్రంగా ఉంది. 1983 నాటి పాత లేఅవుట్‌లో పార్కుల కోసం కేటాయించిన 1700 గజాల స్థలాన్ని కొందరు కబ్జా చేసేందుకు ప్రయత్నిస్తున్నారని, ఇప్పటికే కొంత భాగంలో షెడ్లు వేసి వ్యాపారాలు సాగిస్తున్నారని స్థానికులు హైడ్రా దృష్టికి తెచ్చారు. ఇలాంటి అక్రమ కట్టడాలపై వెంటనే చర్యలు తీసుకోవాలని వారు డిమాండ్ చేశారు.

ఈ ఫిర్యాదులన్నింటినీ స్వీకరించిన హైడ్రా కమిషనర్, ప్రభుత్వ భూములు, ప్రజా ప్రయోజనాల కోసం కేటాయించిన స్థలాలను కాపాడటంలో రాజీ పడే ప్రసక్తే లేదని స్పష్టం చేశారు. వినియోగదారులు తమ కష్టార్జితాన్ని రియల్ ఎస్టేట్‌లో పెట్టే ముందు చట్టపరమైన అనుమతులతో పాటు, ఆ భూమి యొక్క చరిత్రను కూడా విచారించడం ద్వారా తమ పెట్టుబడికి రక్షణ కల్పించుకోవచ్చని ఆయన సూచించారు.