Hyderabad: నాంపల్లి రోడ్డులో నయా మ్యాజిక్! దేశంలోనే మొట్టమొదటి ఆటోమెటిక్ మల్టీ లెవల్ పార్కింగ్!

భాగ్యనగర వాసులకు, ముఖ్యంగా నాంపల్లి వంటి అత్యంత రద్దీ ప్రాంతాల్లో తిరిగే వారికి ఒక తీపి కబురు. గత కొన్నేళ్లుగా వేధిస్తున్న పార్కింగ్ సమస్యలకు పరిష్కారంగా హైదరాబాద్ (Hyderabad) లో దేశంలోనే మొట్టమొదటి పూర్తిస్థాయి ఆటోమేటెడ్ మల్టీ లెవల్ పార్కింగ్ (MLP) కాంప్లెక్స్ సిద్ధమైంది. ఆదివారం (జనవరి 25) నుండి ఇది ప్రజలకు అందుబాటులోకి రానుంది.

15 అంతస్తుల అద్భుతం.. అన్నీ ఒకే చోట!

నాంపల్లి రోడ్డులో నిర్మించిన ఈ భారీ భవనం మొత్తం 15 అంతస్తులతో అలరారుతోంది. ఇందులో మూడు బేస్‌మెంట్ స్థాయిలు ఉండగా, పైన ఏడు అంతస్తులను కేవలం పార్కింగ్ కోసమే కేటాయించారు. అంటే మొత్తం 10 లెవల్స్ పార్కింగ్‌ కు అందుబాటులో ఉంటాయి. మిగిలిన 5 అంతస్తులను కమర్షియల్ అవసరాల కోసం రూపొందించారు. కేవలం పార్కింగ్ మాత్రమే కాకుండా.. ఈ కాంప్లెక్స్‌లో రెండు అత్యాధునిక సినిమా థియేటర్లు మరియు 11వ అంతస్తులో సిటీ వ్యూ గ్యాలరీ ఉండటం విశేషం.

జర్మన్ టెక్నాలజీతో 'పజిల్' పార్కింగ్

ఈ ప్రాజెక్ట్ ప్రత్యేకత ఏమిటంటే.. ఇందులో వాడిన జర్మనీకి చెందిన 'Palis' టెక్నాలజీ. ఇది ఒక ఆటోమేటెడ్ పజిల్ పార్కింగ్ సిస్టమ్. మీరు మీ వాహనాన్ని ఎంట్రీ పాయింట్ వద్ద వదిలితే చాలు, సిస్టమే దానంతట అదే ఖాళీ ఉన్న చోటికి వాహనాన్ని తరలిస్తుంది. హైదరాబాద్ (Hyderabad) లో ఇటువంటి అత్యాధునిక టెక్నాలజీ వాడటం ఇదే తొలిసారి. ఇందులో 250 కార్లు, దాదాపు 200 ద్విచక్ర వాహనాలను పార్క్ చేసే వెసులుబాటు ఉంది. రక్షణ కోసం అధునాతన స్మోక్ డిటెక్టర్లు, ఫైర్ ఫైటింగ్ సిస్టమ్స్, ఆటోమేటిక్ స్ప్రింక్లర్లను కూడా ఏర్పాటు చేశారు.

ఎంత ఖర్చవుతుంది? ఎవరు నిర్మించారు?

హైదరాబాద్ జిల్లా ఇన్-ఛార్జ్ మంత్రి పొన్నం ప్రభాకర్ ఈ కేంద్రాన్ని ప్రారంభించనున్నారు. పార్కింగ్ ధరల విషయానికి వస్తే, కార్లకు గంటకు రూ. 30, బైక్‌లకు రూ. 10 గా నిర్ణయించే అవకాశం ఉంది. HMRL పర్యవేక్షణలో పబ్లిక్ ప్రైవేట్ పార్టనర్‌షిప్ (PPP) పద్ధతిలో నోవమ్ సంస్థ దీనిని నిర్మించింది. దాదాపు రూ. 100 కోట్లకు పైగా ప్రైవేట్ పెట్టుబడితో హరిక్రిషన్ రెడ్డి, బృందం దీనిని పూర్తి చేశారు. 50 ఏళ్ల లీజు ప్రాతిపదికన ఈ భూమిని కేటాయించారు.

నగరానికే తలమానికం

నాంపల్లి రైల్వే స్టేషన్, ఎగ్జిబిషన్ గ్రౌండ్స్ (నుమాయిష్) కి వెళ్లే వారికి ఈ పార్కింగ్ కాంప్లెక్స్ ఒక పెద్ద ఊరట. సాధారణంగా ఇక్కడ రోడ్లపై వాహనాలు నిలపడం వల్ల ట్రాఫిక్ జామ్ అవుతుంటుంది. ఇప్పుడు ఈ సమస్య తీరనుంది. భవిష్యత్తులో హైదరాబాద్ (Hyderabad) లోని ఇతర రద్దీ ప్రాంతాలైన చార్మినార్, అబిడ్స్, బంజారాహిల్స్ వంటి చోట్ల కూడా ఇలాంటి ప్రాజెక్టులు వస్తే నగరం మరింత స్మార్ట్‌గా మారుతుంది అనడంలో సందేహం లేదు. టెక్నాలజీతో పాటు వినోదాన్ని కలగలిపి నిర్మించిన ఈ MLP కాంప్లెక్స్ ఇప్పుడు నగరానికే కొత్త ఆకర్షణగా నిలవనుంది.