Hyderabad: ట్రాఫిక్ కష్టాలకు చెక్! హైదరాబాద్‌లో18 కిలోమీటర్ల భారీ స్టీల్ బ్రిడ్జి..! ఎక్కడో తెలుసా?

భాగ్యనగర వాసులకు గుడ్ న్యూస్! ముఖ్యంగా సికింద్రాబాద్, శామీర్‌పేట వైపు ప్రయాణించే వారికి ఇది నిజంగా తీపి కబురు అనే చెప్పాలి. ఎందుకంటే.. ఆ రూట్ లో భారీ ఫ్లైఓవర్ రానుంది. హైదరాబాద్ (Hyderabad ) నగరంలో రోజురోజుకూ పెరుగుతున్న ట్రాఫిక్ రద్దీని తగ్గించేందుకు ప్రభుత్వం ఈ ప్రతిష్టాత్మక ప్రాజెక్టుకు శ్రీకారం చుట్టింది. ప్యారడైజ్ జంక్షన్ నుంచి శామీర్‌పేట వరకు నిర్మించనున్న 'ఎలివేటెడ్ కారిడార్-2' ప్రాజెక్టు పనులు త్వరలోనే ప్రారంభం కానున్నాయి. ఇది పూర్తయితే నగరంలోనే అతి పెద్ద స్టీల్ బ్రిడ్జిగా రికార్డు సృష్టించనుంది. ఈ ప్రాజెక్ట్ విశేషాల గురించి ఇప్పుడు తెలుసుకుందాం.

ఏమిటి ఈ ప్రాజెక్ట్ ప్రత్యేకత?

ప్రస్తుతం ఇందిరాపార్క్ నుంచి వీఎస్టీ వరకు ఉన్న స్టీల్ బ్రిడ్జిని మనం చూస్తున్నాం. అయితే దానికంటే ఎన్నో రెట్లు పెద్దదైన స్టీల్ బ్రిడ్జిని ఈ కొత్త కారిడార్‌లో నిర్మించబోతున్నారు. మొత్తం 18.15 కిలోమీటర్ల పొడవున్న ఈ ప్రాజెక్టు లో ఏకంగా 11.52 కిలోమీటర్ల మేర స్టీల్ బ్రిడ్జి ఉండబోతోంది. ఇందుకోసం ప్రభుత్వం సుమారు రూ. 4,263 కోట్లను వెచ్చిస్తోంది.

హకీంపేట వద్ద అండర్ గ్రౌండ్ టన్నెల్!

ఈ ప్రాజెక్టులో మరో వినూత్నమైన అంశం ఏమిటంటే.. హకీంపేట ఎయిర్‌ఫోర్స్ స్టేషన్ సమీపంలో రక్షణ కారణాల దృష్ట్యా ఎలివేటెడ్ బ్రిడ్జికి అనుమతి లేదు. అందుకే అక్కడ సుమారు 6 కిలోమీటర్ల మేర 6 లేన్ల అండర్ గ్రౌండ్ టన్నెల్ (సొరంగ మార్గం) నిర్మించాలని అధికారులు నిర్ణయించారు. అంటే ఒకే ప్రయాణంలో మీరు ఆకాశ మార్గంలో (ఎలివేటెడ్) అలాగే భూగర్భ మార్గంలో ప్రయాణించే అద్భుత అనుభూతిని పొందొచ్చన్న మాట.

ఎవరు లబ్ధి పొందుతారు?

సికింద్రాబాద్ నుంచి వెస్ట్ మారేడ్‌పల్లి, కార్ఖానా, తిరుమలగిరి, అల్వాల్, బొల్లారం మీదుగా శామీర్‌పేట ఔటర్ రింగ్ రోడ్డు (ORR) వరకు ఈ కారిడార్ సాగుతుంది. రాజీవ్ రహదారి ప్రయాణికులు అంటే.. సిద్దిపేట, గజ్వేల్, కరీంనగర్ వెళ్లే వారికి ట్రాఫిక్ నరకం నుంచి విముక్తి లభిస్తుంది. అలాగే తిరుమలగిరి, అల్వాల్ ప్రాంతాల్లో ఎగ్జిట్, ఎంట్రీ పాయింట్లు ఇస్తుండటంతో స్థానిక ప్రజలు నేరుగా బ్రిడ్జి పైకి చేరుకోవచ్చు.

భూసేకరణ, టెండర్లు

ఈ భారీ ప్రాజెక్టు కోసం ఇప్పటికే టెండర్ల ప్రక్రియ పూర్తయ్యింది. సుమారు 192 ఎకరాల భూమిని సేకరిస్తున్నారు. ఇందులో 114 ఎకరాల రక్షణ శాఖ భూములు ఉండటం విశేషం. భూసేకరణ కసరత్తు దాదాపు ముగింపు దశకు చేరుకోవడంతో, మరో రెండు నెలల్లోనే నిర్మాణ పనులు ప్రారంభం కానున్నాయి.

మారుతున్న హైదరాబాద్ రూపురేఖలు

హైదరాబాద్(Hyderabad) నగరం గ్లోబల్ సిటీగా ఎదుగుతున్న తరుణంలో ఇలాంటి మౌలిక సదుపాయాలు అత్యవసరం. ఎలివేటెడ్ కారిడార్-1 (ప్యారడైజ్ టు బోయిన్‌పల్లి) పనులు ఇప్పటికే ఊపందుకున్నాయి. ఇప్పుడు కారిడార్-2 కూడా తోడైతే ఉత్తర హైదరాబాద్ ట్రాఫిక్ సమస్యలు పూర్తిగా తొలగిపోతాయి. మూడేళ్లలో ఈ ప్రాజెక్టును పూర్తి చేయాలని లక్ష్యంగా పెట్టుకున్నారు.

ఈ భారీ స్టీల్ బ్రిడ్జి అందుబాటులోకి వస్తే, సికింద్రాబాద్ నుంచి ఓఆర్ఆర్ చేరుకోవడం కేవలం నిమిషాల పని అవుతుంది. హైదరాబాద్ (Hyderabad) ట్రాఫిక్ నుంచి మనల్ని మనం కాపాడుకోవడానికి ఇలాంటి ఆధునిక ఇంజనీరింగ్ అద్భుతాలే మార్గం!