Forbes 30 under 30 list: ఇద్దరు హైదరాబాదీలకు చోటు

హైదరాబాద్: ఫోర్బ్స్ 30 అండర్ 30 జాబితాలో ఇద్దరు హైదరాబాదీలకు చోటు దక్కింది. వీరితో పాటు ఘోరక్‌పూర్‌కు చెందిన యువతి శ్రిష్టి పాండే, హెలిన్ స్పార్క్ ఫౌండర్ శుభమ్ శర్మ, బెంగళూరుకు చెందిన హెర్బల్ న్యూట్రిషన్ అండ్ ప్లాంట్ ఫౌండర్ విభా హరీష్ తదితరులు చోటు దక్కించుకున్నారు. తొమ్మిదిమంది బంగ్లాదేశ్ వాసులు కూడా ఫోర్బ్స్ 30 అండర్ 30 ఏషియా జాబితాలో చోటు దక్కించుకున్నారు.

ఫోర్బ్స్ 30 అండర్ 30 జాబితాలో ఇద్దరు యువ హైదరాబాదీలు స్థానం సంపాదించారు. తాజాగా విడుదలైన ఈ జాబితాలో మేకర్స్ హైవ్ఇన్నోవేషన్స్ సీఈఓ ప్రణవ్ వెంపటి, డిజి ప్రెక్స్ వ్యవస్థాపకుడు సమర్థ్ సింధీ ఉన్నారు. ప్రణవ్ వెంపటికి చెందిన హైవ్ఇన్నోవేషన్స్ కృత్రిమ అవయవాల తయారీలో నిమగ్నమైన సంస్థ. ఈ స్టార్టప్ కల్‌ఆర్మ్ అనే పేరుతో బయోనిక్ హ్యాండ్ తయారు చేసి, ఎంతో తక్కువ ధరకు అందిస్తోంది. ఈ కృత్రిమ చేత్తో టైపింగ్ సహా అన్ని రకాల పనులు చేయవచ్చు.

స్టార్ ఫిష్ గ్రోత్ పార్టనర్స్‌తో పాటు మరిన్ని పెట్టుబడి సంస్థల నుండి హైవ్ఇన్నోవేషన్స్ కొద్దికాలం క్రితం 9 మిలియన్ డాలర్లు (దాదాపు రూ.65 కోట్లు) సమీకరించింది. డిజి-ప్రెక్స్ ఆన్‌లైన్ ఫార్మసీ సేవల సంస్థ. డాక్టర్ ప్రిస్కిప్షన్‌ను వాట్సాప్‌లో పంపించి, నెలకు సరిపడా మందులకు డబ్బు చెల్లిస్తే, ఉచితంగా డెలివరీ చేస్తుంది.