హైదరాబాద్‌లో ఆల్ టైం రికార్డును తాకిన బంగారం ధర.. ఏకంగా రూ. లక్షా 23 వేల పై మాటే..

అక్టోబర్ 8, బుధవారం.. వరుసగా మూడో రోజు కూడా బంగారం, వెండి ధరలు కొత్త గరిష్ఠ స్థాయికి చేరుకున్నాయి. భౌగోళిక రాజకీయ అనిశ్చితి, వాణిజ్య సుంకాల ఉద్రిక్తతలు, అమెరికా ఫెడరల్ రిజర్వ్ వడ్డీ రేటు తగ్గింపు అంచనాలు ఈ పెరుగుదలకు ప్రధాన కారణాలుగా కనిపిస్తున్నాయి. ప్రపంచవ్యాప్తంగా పెట్టుబడిదారులు సురక్షిత ఆస్తులవైపు మొగ్గుచూపడంతో Gold ధరలు పెరుగుతూ వస్తున్నాయి. దీపావళి పండుగ సమీపిస్తున్న నేపథ్యంలో బంగారం కొనుగోలు సీజన్ మొదలైంది. చాలా మంది వినియోగదారులు ధరలు కొంత తగ్గుతాయని ఆశించగా..ఈ పెరుగుదల ఆభరణాల కొనుగోలుదారుల్లో ఆందోళనలను రేకెత్తిస్తోంది.

హైదరాబాద్‌లో ఈ రోజు 24 క్యారెట్ బంగారం ధర గ్రాముకు రూ. 191 పెరిగి రూ. 12,393కి చేరుకుంది. 22 క్యారెట్ బంగారం ధర గ్రాముకు రూ. 175 పెరిగి రూ. 11,360గా నమోదైంది. అంతేకాకుండా, 18 క్యారెట్ బంగారం ధర గ్రాముకు రూ. 143 పెరిగి రూ. 9,295కు చేరుకుంది.

10 గ్రాముల బంగారం ధరలు ఇప్పుడు కొత్త గరిష్ఠ స్థాయిని తాకాయి:

24 క్యారెట్ (10 గ్రాములు): రూ. 1,23,930
22 క్యారెట్ (10 గ్రాములు): రూ. 1,13,600
18 క్యారెట్ (10 గ్రాములు): రూ. 92,950

ఇంతకు ముందు 24 క్యారెట్ Gold ధర చరిత్రలో తొలిసారిగా రూ. లక్షా 20 వేల మార్కును దాటగా.. ఇప్పుడు అది రూ. లక్షా 23 వేల మార్కును కూడా దాటింది. 22 క్యారెట్ బంగారం ధర కూడా రూ.1 లక్ష దాటి సాధారణ రేటుగా స్థిరపడింది.

హైదరాబాద్ బంగారం ధరలు తెలుసుకోవాలనుకుంటే ఈ లింక్ మీద క్లిక్ చేసి తెలుసుకోవచ్చు

హైదరాబాద్‌లో వెండి ధర ప్రస్తుతం స్థిరంగా ఉంది. గ్రాముకు రూ. 157, కిలోగ్రాముకు రూ. 1,57,000 వద్ద నమోదైంది. పారిశ్రామిక డిమాండ్, పెట్టుబడి ఆకర్షణ పెరుగుతున్న నేపథ్యంలో, వెండి కూడా ఆల్ టైమ్ గరిష్ఠ స్థాయికి దగ్గరగా ఉంది.

దీపావళి పండుగ సమయంలో Gold కొనుగోలు చేయడం భారతీయ సంప్రదాయంలో ఒక శుభకార్యం. పండుగ సీజన్‌లో బంగారం ధరలు పెరగడం కొత్త విషయం కాదు, అయితే ఈసారి గ్లోబల్ మార్కెట్ ప్రభావం కారణంగా పెరుగుదల మరింతగా కనిపిస్తోంది. ధరలు పెరిగినా, పండుగ సమయంలో బంగారం కొనుగోలు చేయడాన్ని చాలా మంది మానుకోరని ఆభరణాల వ్యాపారులు చెబుతున్నారు.

అమెరికా ఫెడరల్ రిజర్వ్ రేటు తగ్గింపు అంచనాలు, మధ్యప్రాచ్య ప్రాంతంలో భౌగోళిక రాజకీయ ఉద్రిక్తతలు,వాణిజ్య సుంకాల చర్చలు పెట్టుబడిదారులను రిస్క్ ఆస్తుల నుండి దూరం చేశాయి. ఈ పరిస్థితుల్లో బంగారం "సేఫ్ హేవెన్" (సురక్షిత పెట్టుబడి)గా మరింత ఆకర్షణీయమవుతోంది.

ఇండియా బులియన్ & జ్యువెలర్స్ అసోసియేషన్ (IBJA) వైస్ ప్రెసిడెంట్, ఆస్పెక్ట్ గ్లోబల్ వెంచర్స్ ఎగ్జిక్యూటివ్ చైర్‌పర్సన్ అక్ష కాంబోజ్ మాట్లాడుతూ.. భౌగోళిక రాజకీయ పరిస్థితుల కారణంగా బంగారం ఒక బలమైన హెడ్జ్ ఆస్తిగా నిలిచింది. రాబోయే వారాల్లో బంగారం ధరలు మరింతగా పెరగవచ్చని పేర్కొన్నారు.క్లుప్తంగా చెప్పాలంటే.. హైదరాబాద్ సహా భారతదేశంలోని అన్ని ప్రధాన నగరాల్లో బంగారం ధరలు పండుగ సీజన్ కంటే ముందే గరిష్ఠ స్థాయికి చేరుకున్నాయి. దివాళీకి ముందు కొనుగోలు చేయాలనుకునే వినియోగదారులు ధరలు ఇంకా పెరిగే అవకాశం ఉందని గుర్తుంచుకోవాలి.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి