హైదరాబాద్ నుంచి అమరావతికి హై స్పీడ్ రైలు, మూడు నగరాలకు బుల్లెట్ రైలు కారిడార్లకు కేంద్రం సుముఖత

తెలంగాణ రాష్ట్రంలో రైల్వే నెట్‌వర్క్‌ను బలోపేతం చేయడానికి కేంద్ర, రాష్ట్ర ప్రభుత్వాలు సంయుక్తంగా కీలక నిర్ణయాలు తీసుకునే ప్రయత్నంలో ఉన్నాయి. ఈ క్రమంలో రాష్ట్ర ముఖ్యమంత్రి ఎ రేవంత్ రెడ్డి కీలక సమావేశాన్ని నిర్వహించి రాష్ట్రంలోని రైల్వే అభివృద్ధి ప్రాజెక్టుల పురోగతిని సమీక్షించేందుకు ఉన్నతాధికారులను హైదరాబాద్‌కు ఆహ్వానించారు. తెలంగాణ రాష్ట్ర రాజధాని హైదరాబాద్‌ను దేశంలోని ఇతర ప్రధాన నగరాలతో కలుపుతూ.. మూడు హైస్పీడ్ రైలు మార్గాల ఏర్పాటుకు రంగం సిద్ధమైంది.

హైదరాబాద్ నుంచి చెన్నై, బెంగళూరు, అమరావతి వంటి ప్రముఖ నగరాలకు బుల్లెట్ రైలు కారిడార్లను నిర్మించేందుకు కేంద్రం సుముఖత వ్యక్తం చేసింది. ఈ ప్రాజెక్టులు అమలు అయ్యే దశలో రాష్ట్ర ఆర్థిక వృద్ధికి, పారిశ్రామిక, వాణిజ్య రంగాల విస్తరణకు నూతన గమ్యం దొరుకుతుందని అధికారులు భావిస్తున్నారు. ప్రస్తుతం హైదరాబాద్-చెన్నై మార్గానికి సంబంధించి కాజీపేట మార్గాన్ని దాటకుండా నార్కట్‌పల్లి, సూర్యాపేట, కోదాడ ప్రాంతాల ద్వారా వెళ్లే అలైన్‌మెంట్‌ను అధికారులు ఖరారు చేశారు. ఈ మార్గంలో తెలంగాణలో కనీసం ఆరు నుంచి ఏడూ స్టేషన్ల ఏర్పాటు జరుగనున్నట్లు ప్రణాళికలు రూపొందిస్తున్నట్లు సమాచారం.

ఇప్పటి వరకు గ్రీన్‌ఫీల్డ్ ఎక్స్‌ప్రెస్‌వే ప్రాజెక్టుకు అనుగుణంగా ప్రణాళికలు సిద్ధం చేసినట్లే, ఇప్పుడు హైదరాబాద్-బెంగళూరు హైస్పీడ్ రైలు మార్గాన్ని నాగ్‌పూర్-హైదరాబాద్-బెంగళూరు గ్రీన్‌ఫీల్డ్ ఎక్స్‌ప్రెస్‌వే మార్గంలోనే నిర్మించేందుకు ఏర్పాట్లు జరుగుతున్నాయి. ఈ మార్గానికి సంబంధించిన మూడు వేరే అలైన్‌మెంట్లను అధికారులు రూపొందించారు. ప్రాథమిక అంచనాల ప్రకారం, తెలంగాణ రాష్ట్రంలో నాలుగు నుంచి అయిదు స్టేషన్లు ఏర్పాటు చేయడం పరిశీలనలో ఉందనే వార్తలు వినిపిస్తున్నాయి

ఇక హైదరాబాద్-అమరావతి మార్గంలో కూడా సమాంతరంగా హైస్పీడ్ రైలు మార్గాన్ని నిర్మించాలని తెలంగాణ ప్రభుత్వం కేంద్రంపై ఒత్తిడి తెస్తోంది. ప్రస్తుతానికి ఈ ప్రాజెక్టు సాధ్యాసాధ్యాల అధ్యయనాలు, ఖర్చు అంచనాలు వంటి తుది దశలలో ఉంది. ప్రధానంగా రాష్ట్ర రాజధాని నుంచి తీర ప్రాంతానికి వేగవంతమైన train కనెక్టివిటీని కల్పించడమే లక్ష్యంగా ఈ ప్రాజెక్టు రూపుదిద్దుకుంటోంది.

అలాగే, రీజనల్ రింగ్ రోడ్డు (RRR) పక్కన రీజనల్ రింగ్ రైలు మార్గాన్ని నిర్మించే ప్రణాళికను కూడా రూపొందించారు. ఈ ప్రాజెక్టుకు అవసరమైన భూసేకరణ ప్రక్రియ కూడా త్వరలో పూర్తి చేయాలని అధికారులు ప్రతిపాదించారు. ముఖ్యంగా, మొత్తం 45 మీటర్ల వెడల్పుతో భూమిని చదును చేయాల్సిన అవసరం ఉన్నట్లు రైల్వే అధికారులు తెలిపారు. ఈ భూమిని సమకూర్చి ప్రాజెక్టును ముందుకు నడిపేందుకు రాష్ట్ర ప్రభుత్వం రెడీ అవుతోంది. ఈ సమీక్షలో ప్రత్యేకంగా వికారాబాద్-కృష్ణా, డోర్నకల్-గద్వాల, కల్వకుర్తి-మాచర్ల వంటి కొత్త రైల్వే లైన్లపై కూడా చర్చ జరుగనుందని తెలుస్తోంది. ముఖ్యమంత్రి రేవంత్ రెడ్డి ఈ అంశాలపై కీలక అభివృద్ధి చర్యలు చేపట్టేందుకు అధికారులతో సమావేశం అవుతున్నారు.