HP నుంచి 6 వేల మంది ఉద్యోగులు ఔట్.. కాస్ట్ కటింగ్ ప్లాన్ చేస్తున్న టెక్ దిగ్గజం

కృత్రిమ మేధస్సు (AI) ఆధారిత మార్పుల దిశగా వ్యూహాత్మక ప్రయాణంలో భాగంగా..2028 ఆర్థిక సంవత్సరం నాటికి ప్రపంచవ్యాప్తంగా 4 వేల నుండి 6 వేల ఉద్యోగాలను తగ్గించాలనే లక్ష్యాన్ని HP ప్రకటించింది. వ్యాపార కార్యకలాపాలను మరింత క్రమబద్ధీకరించడం, ఉత్పత్తి అభివృద్ధిని వేగవంతం చేయడం, కస్టమర్ సంతృప్తిని పెంపొందించడం, మొత్తం ఉత్పాదకతను పెంచడమే ఈ చర్య యొక్క ప్రధాన ఉద్దేశమని కంపెనీ పేర్కొంది. అయితే ఈ ప్రకటన తరువాత, HP పాలో ఆల్టో ఆధారిత కంపెనీ షేర్లు అవుట్-ఆఫ్-ఆవర్స్ ట్రేడింగ్‌లో 5.5 శాతం వరకు పడిపోయాయి. ఇది పెట్టుబడిదారుల్లో ఆందోళన కలిగించింది.

HP CEO ఎన్రిక్ లోర్స్ మాట్లాడుతూ, ఉత్పత్తి అభివృద్ధి, అంతర్గత కార్యకలాపాలు, కస్టమర్ సపోర్ట్‌కు సంబంధించిన బృందాలలో ఉద్యోగాల కోతలు ప్రభావం చూపనున్నాయని వెల్లడించారు. కంపెనీ మూడు సంవత్సరాలలో సుమారు US$1 బిలియన్ స్థూల ఖర్చు పొదుపును ఆశిస్తున్నట్లు ఆయన తెలిపారు. ఇది సంస్థ పునర్ నిర్మాణ ప్రణాళికలో ఒక కీలక దశగా పేర్కొన్నారు.HP ఇప్పటికే 2024లో ప్రకటించిన పెద్ద రీస్ట్రక్చరింగ్ కార్యక్రమంలో భాగంగా అదనంగా 1,000-2,000 ఉద్యోగాలను తొలగించిన సంగతి తెలిసిందే. ఇంత పెద్ద పరిమాణంలో ఉద్యోగాల కోత నిర్ణయం టెక్ రంగంలో AI ప్రభావం మరింత వేగంగా పెరుగుతోందనడానికి స్పష్టమైన నిదర్శనంగా పరిశ్రమ నిపుణులు భావిస్తున్నారు.

AI బూమ్ కారణంగా, ప్రపంచవ్యాప్తంగా AI-enabled personal computers కు డిమాండ్ అధికమవుతోంది. ఈ సంవత్సరం అక్టోబర్ 31తో ముగిసిన నాల్గవ త్రైమాసికంలో, HP మొత్తం షిప్‌మెంట్లలో 30 శాత కంటే ఎక్కువ భాగం AI ఆధారిత PCలదే అని కంపెనీ వెల్లడించింది. ఇది HP వ్యాపార దారిలో ప్రధాన మలుపుగా పరిగణించబడుతోంది.డేటా సెంటర్లు, బిగ్-టెక్ కంపెనీల అధిక అవసరాల కారణంగా DRAM, NAND వంటి మెమరీ చిప్ ధరలు ప్రపంచవ్యాప్తంగా భారీగా పెరుగుతున్నాయి. మోర్గాన్ స్టాన్లీ విశ్లేషకులు హెచ్చరికలు చేస్తూ.. ఈ పెరుగుదల HP, Dell, Acer వంటి ప్రముఖ PC తయారీదారుల లాభాలను తగ్గించే ప్రమాదం ఉందని సూచించారు.

AI మౌలిక సదుపాయాలను నిర్మించడంలో Google, AWS, Microsoft వంటి టెక్ దిగ్గజాలు ఏర్పరుస్తున్న పోటీ సర్వర్ మార్కెట్ ఒత్తిడిని మరింత తీవ్రతరం చేసింది. HP CEO లోర్స్ పేర్కొన్నదాని ప్రకారం..2026 ఆర్థిక సంవత్సరం రెండో భాగంలో ఈ ధరల పెరుగుదల ప్రభావం కంపెనీ ఆర్థిక ఫలితాల్లో స్పష్టంగా కనిపించ ప్రారంభమవుతుంది. అయితే, మొదటి అర్థభాగం కోసం HP వద్ద తగినంత ఇన్వెంటరీ ఉన్నందున తక్షణ ప్రభావం తక్కువగా ఉంటుందని తెలిపారు.

ఏదేమైనా HP ఉద్యోగాల కోత నిర్ణయం ఒక ప్రస్ఫుటమైన వ్యూహాత్మక మార్పును సూచిస్తోంది. తక్షణ కాలంలో ఇది ఉద్యోగులకు, పెట్టుబడిదారులకు ఆందోళన కలిగించినప్పటికీ, దీర్ఘకాలంలో AI ఆధారిత ఉత్పత్తులు, అధిక సామర్థ్యంతో పనిచేసే కార్యకలాపాలు, ఖర్చు తగ్గింపు HP వ్యాపార ప్రగతికి కీలకంగా మారవచ్చు.