Hp layoffs : టెక్ ఉద్యోగులకు దెబ్బ మీద దెబ్బ.. హెచ్‌పీలో భారీ లేఆఫ్‌లు! అసలు కారణం ఇదేనట!

టెక్ ఉద్యోగులకు లేఆఫ్ ల తిప్పలు తప్పడం లేదు. టెక్నాలజీ రంగంలో పనిచేసే ఉద్యోగులకు ఈ సంవత్సరం కూడా కష్టకాలమే. గతేడాది ఆర్థిక మాంద్యం భయాలతో వేలమందిని ఇంటికి పంపిన టెక్ కంపెనీలు ఇప్పుడు మరో కొత్త కారణంతో మళ్లీ కోతలకు సిద్ధమవుతున్నాయి. అదేంటంటే..
టెక్ రంగంలో దిగ్గజ కంపెనీ అయిన హెచ్‌పీ (HP) కూడా ఈ లేఆఫ్‌ల పరంపరలో చేరింది. పీసీ, ప్రింటర్ల తయారీలో అగ్రగామిగా ఉన్న ఈ సంస్థ రెండు నుంచి మూడేళ్లలో దాదాపు 4,000 నుంచి 6,000 మంది ఉద్యోగులను తొలగించేందుకు సిద్ధమవుతున్నట్లు ప్రకటించింది. దీంతో టెక్ ప్రపంచంలో మరోసారి కలకలం రేగింది.

కారణాలు ఇవే..

HP ఉద్యోగులను తొలగించడానికి(Hp layoffs ) గల కొన్ని ప్రధాన కారణాలు ఉన్నాయి.

1. నిర్వహణ ఖర్చులు తగ్గించుకోవడం: కంపెనీ నిర్వహణ ఖర్చులను తగ్గించుకుని మరింత సమర్థంగా పనిచేయడం.

2. AI వినియోగం: ప్రొడక్ట్ డెవలప్‌మెంట్‌లో ఏఐ వినియోగాన్ని పెంచడం.
ప్రస్తుతం ప్రపంచవ్యాప్తంగా HPలో సుమారు 58,000 మంది ఉద్యోగులు ఉన్నారు. ఈ తాజా లేఆఫ్ లు చూస్తే సుమారు 6 వేల మంది ఉన్నారు. అంటే కంపెనీ మొత్తం ఉద్యోగుల్లో దాదాపు 10 శాతం మందికి లేఆఫ్ ప్రకటించారు. ముఖ్యంగా ప్రొడక్ట్ డెవలప్‌మెంట్, కస్టమర్ సపోర్ట్, ఇతర అంతర్గత విభాగాలపై ఈ తొలగింపుల ప్రభావం ఎక్కువగా పడింది.

3. బిలియన్ డాలర్లు ఆదా..

ఈ కఠిన నిర్ణయాల గురించి కంపెనీ సీఈఓ ఎన్రిక్ లారెస్‌ మాట్లాడుతూ.. "పోటీ ప్రపంచంలో నిలబడాలంటే ఈ చర్యలు తప్పవు. ఈ లేఆఫ్‌ల ద్వారా కంపెనీకి సుమారు ఒక బిలియన్ డాలర్ల (సుమారు రూ. 8,300 కోట్లు) మేర ఖర్చు ఆదా అవుతుందని అంచనా వేస్తున్నాం" అని పేర్కొన్నారు.

4. చిప్‌ల డిమాండ్

అమెరికాలో విధించిన ట్రంప్ టారిఫ్‌ల కారణంగా HP కంపెనీకి ఉత్పత్తుల తయారీ ఖర్చు పెరిగింది. దీనికి తోడు, కస్టమర్లు ఇప్పుడు ఏఐ ఫీచర్లు ఉన్న కొత్త కంప్యూటర్ల వైపు మొగ్గు చూపుతున్నారు. దీనివల్ల కంపెనీపై మెమొరీ చిప్‌ల ధరల భారం కూడా అధికమవుతోంది. డేటా సెంటర్ల నుండి పెరుగుతున్న డిమాండ్ కారణంగా మెమొరీ చిప్‌ల ధరలు విపరీతంగా పెరగడం హెచ్‌పీ వంటి సంస్థల లాభాలపై భారం మోపుతోంది. ఈ కారణాలన్నీ ఖర్చు తగ్గింపు చర్యలు చేపట్టడానికి దారితీశాయి. ఈ భారీ తొలగింపుల ప్రకటన ప్రభావం కంపెనీ షేర్లపైనా పడింది. మంగళవారం నాటి అమెరికా మార్కెట్లలో హెచ్‌పీ షేరు ఏకంగా 5.5 శాతం మేర పడిపోయింది. టెక్ రంగంలో ఏఐ విప్లవం ఒకవైపు కొత్త ఆశలు చిగురింపజేస్తున్నా, మరోవైపు వేలమంది ఉద్యోగుల భవిష్యత్తును ప్రశ్నార్థకంగా మారుస్తోంది.

కొనసాగుతున్న కోతలు

ఓవరాల్ గా టెక్ రంగంలో ఈ కోతలు మున్ముందు కొనసాగే అవకాశం ఉంది. హెచ్‌పీ మాత్రమే కాదు టెక్ రంగంలో విస్తృత స్థాయిలో పునర్నిర్మాణం జరుగుతోంది. అమెజాన్ 14,000 మంది ఉద్యోగులను తొలగించాలని యోచిస్తుండగా యాపిల్ కూడా ఉద్యోగులను తొలగించింది. మెటా (Meta) సైతం ఏఐ బృందాలలో వందల కొద్దీ ఉద్యోగాలను తగ్గించింది.