ATM card: కొత్త ఏటీఎం కార్డు కోసం అప్లై చేయడం ఎలా? పూర్తి వివరాలు మీకోసం!

ప్రస్తుత డిజిటల్ యుగంలో జేబులో నగదు కంటే చేతిలో ఒక ఏటీఎం కార్డు ఉండటం చాలా ముఖ్యం. షాపింగ్ నుండి అత్యవసర నగదు విత్ డ్రాయల్స్ వరకు ప్రతిదానికీ డెబిట్ కార్డు కావాల్సిందే. అయితే, చాలామంది కొత్తగా బ్యాంక్ అకౌంట్ తెరిచినప్పుడు లేదా ఉన్న కార్డు గడువు ముగిసినప్పుడు కొత్త కార్డును ఎలా పొందాలో తెలియక ఇబ్బంది పడుతుంటారు. మీ బ్యాంక్ అకౌంట్ కోసం ఏటీఏం కార్డు (ATM card) ఎలా అప్లై చేయాలో తెలుసుకోవడం ముఖ్యం. సాధారణంగా బ్యాంకులు మూడు రకాలుగా డెబిట్ కార్డు దరఖాస్తులను స్వీకరిస్తాయి. అవేంటో ఇప్పుడు చూద్దాం..

1. మొబైల్ బ్యాంకింగ్ ద్వారా (చాలా సులభమైన పద్ధతి)..

మీరు ప్రస్తుతం వాడుతున్న బ్యాంక్ మొబైల్ యాప్ (ఉదాహరణకు SBI YONO, ICICI iMobile, HDFC Mobile Banking) ద్వారా నిమిషాల్లో అప్లై చేయవచ్చు.

• ముందుగా మీ బ్యాంక్ యాప్‌లోకి లాగిన్ అవ్వండి.
• 'Cards' లేదా 'Service Request' విభాగంలోకి వెళ్ళండి.
• 'Debit Card' లేదా 'ATM Card' ఆప్షన్‌ ను ఎంచుకోండి.
• అక్కడ 'Request New Card' పై క్లిక్ చేసి, మీకు నచ్చిన కార్డు రకాన్ని (Visa, Master, Rupay) ఎంచుకుని సబ్మిట్ చేయండి.

2. నెట్ బ్యాంకింగ్ ద్వారా..

మీరు కంప్యూటర్ లేదా లాప్‌టాప్ వాడుతుంటే.. బ్యాంక్ అధికారిక వెబ్‌సైట్ ద్వారా కూడా ఏటీఎం కార్డు అప్లై చేయవచ్చు. నెట్ బ్యాంకింగ్‌లోకి లాగిన్ అయి, 'e-Services' సెక్షన్‌లో డెబిట్ కార్డు కోసం రిక్వెస్ట్ పెట్టవచ్చు. ఇక్కడ మీ అడ్రస్‌ను సరిచూసుకోవడం చాలా ముఖ్యం, ఎందుకంటే కార్డు మీ రిజిస్టర్డ్ అడ్రస్‌కే పోస్ట్ ద్వారా వస్తుంది.

3. నేరుగా బ్యాంక్ బ్రాంచ్‌కు వెళ్లడం..

మీకు ఆన్‌లైన్ పద్ధతులు తెలియకపోతే, నేరుగా మీ బ్యాంక్ బ్రాంచ్‌కు వెళ్లి 'ATM Card Requisition Form' అడిగి తీసుకోండి. ఆ ఫారమ్‌ను నింపి, మీ సంతకం చేసి బ్యాంక్ సిబ్బందికి అందజేస్తే, వారం లేదా పది రోజుల్లో కార్డు మీ ఇంటికి వస్తుంది.

ఏటీఎం కార్డు రకాలు - ఏది ఎంచుకోవాలి?

మీరు కార్డు కోసం అప్లై చేసేటప్పుడు రూబే (RuPay), వీసా (Visa), మాస్టర్ కార్డ్ (MasterCard) అనే ఆప్షన్లు కనిపిస్తాయి.

• RuPay: ఇది కేవలం భారత్‌లో వాడటానికి , తక్కువ ఛార్జీలకు ఉత్తమమైనది.
• Visa/MasterCard: మీరు అంతర్జాతీయ ప్రయాణాలు చేసినా లేదా విదేశీ సైట్లలో షాపింగ్ చేయాలన్నా ఇవి ఉపయోగపడతాయి.

కొత్త కార్డు వచ్చిన తర్వాత చేయాల్సిన పనులు..

మీ కార్డు ఇంటికి వచ్చిన వెంటనే అది పని చేయదు. మీరు ఏటీఎం సెంటర్‌కు వెళ్లి లేదా మొబైల్ యాప్ ద్వారా కొత్త 'ఏటీఎం పిన్' (ATM PIN) సెట్ చేసుకోవాల్సి ఉంటుంది. కొన్ని బ్యాంకులు గ్రీన్ పిన్ (Green PIN) సౌకర్యాన్ని కూడా కల్పిస్తున్నాయి, దీని ద్వారా మీ మొబైల్‌కు వచ్చే ఓటీపీతో పిన్ జనరేట్ చేసుకోవచ్చు.

టెక్నాలజీ పెరగడంతో ఏటీఎం కార్డు అప్లై చేయడం చాలా తేలికైంది. బ్యాంకుకు వెళ్లి గంటల తరబడి వేచి చూడాల్సిన అవసరం లేదు. పైన పేర్కొన్న ఏదైనా పద్ధతిని అనుసరించి మీరు సులభంగా కొత్త కార్డును పొందవచ్చు. ఒకవేళ మీ కార్డు పోతే వెంటనే కస్టమర్ కేర్‌కు ఫోన్ చేసి బ్లాక్ చేయడం మాత్రం మర్చిపోకండి.