పేరుకే రూ. 25 కోట్లు.. చేతికి వచ్చేది కేవలం రూ.9. 74 కోట్లు.. కామెరాన్ గ్రీన్‌పై ట్యాక్స్ బాదుడు..

డిసెంబర్ 16న దుబాయ్‌లో జరిగిన ఐపీఎల్ మినీ వేలంలో ఆస్ట్రేలియా ఆల్‌రౌండర్ కామెరాన్ గ్రీన్‌ను రూ. 25.20 కోట్లకు కోల్‌కతా నైట్ రైడర్స్ (KKR) దక్కించుకోవడం క్రికెట్ ప్రపంచంలో సంచలనంగా మారిన సంగతి విదితమే. ఈ బిడ్‌తో గ్రీన్ ఐపీఎల్ చరిత్రలోనే అత్యంత ఖరీదైన విదేశీ ఆటగాడిగా నిలిచాడు. అయితే బయట కనిపించే ఈ భారీ మొత్తానికి వెనుక.. అంతగా చర్చకు రాని కఠినమైన ఆర్థిక వాస్తవాలు దాగి ఉన్నాయి.

పేపర్ హెడ్‌లైన్‌ల్లో కనిపించే రూ. 25.20 కోట్లు గ్రీన్ నిజంగా తన చేతికి వచ్చే మొత్తం కాదు. ఐపీఎల్ నిబంధనలు, బీసీసీఐ ఆర్థిక విధానం, భారత పన్ను చట్టాల కారణంగా అతని వాస్తవ ఆదాయం గణనీయంగా తగ్గిపోతుంది. అన్ని తగ్గింపులు వర్తింపజేసిన తర్వాత, గ్రీన్ భారతదేశం నుంచి ఇంటికి తీసుకువెళ్లగల మొత్తం సుమారు రూ. 13 కోట్లు మాత్రమే ఉంటుంది.

ఇటీవలి కాలంలో విదేశీ స్టార్ ఆటగాళ్లు మెగా వేలాలకు దూరంగా ఉండి, మినీ వేలాల్లో మాత్రమే పేరు నమోదు చేయడం ద్వారా కొరత ఆధారిత బిడ్డింగ్ యుద్ధాలను సృష్టిస్తున్నారన్న ఆందోళన బీసీసీఐలో పెరిగింది. దీనిని నియంత్రించేందుకు బోర్డు గరిష్ట రుసుము (Maximum Fee) విధానాన్ని అమలు చేసింది. ఈ విధానం ప్రకారం.. ఒక విదేశీ ఆటగాడికి ఫ్రాంచైజీ ఎంత ఎక్కువ బిడ్ చేసినా, అతనికి నేరుగా చెల్లించే గరిష్ట మొత్తం రూ. 18 కోట్లకే పరిమితం అవుతుంది. ఆ పరిమితికి మించిన మొత్తం బీసీసీఐ ఆధ్వర్యంలోని PWF (Paying Welfare Fund)కు మళ్లించడం జరుగుతుంది.

దీంతో గ్రీన్‌కు రూ. 25.20 కోట్లలో నేరుగా లభించేది కేవలం రూ. 18 కోట్లు మాత్రమే. మిగిలిన మొత్తం అతని ఖాతాకు చేరదు. అయితే ఇది కూడా తుది ఆదాయం కాదు. ఇక్కడి నుంచే అసలు పన్నుల భారము ప్రారంభమవుతుంది. ఐపీఎల్ ద్వారా వచ్చే ఆదాయాన్ని భారత పన్ను చట్టం వృత్తిపరమైన ఆదాయంగా పరిగణిస్తుంది. భారతీయ ఆటగాళ్లకు సెక్షన్ 194J కింద 10 శాతం మాత్రమే TDS వర్తిస్తుంది. కానీ విదేశీ ఆటగాళ్లను నాన్-రెసిడెంట్లుగా వర్గీకరించి సెక్షన్ 115BBA కింద పన్ను విధిస్తారు. ఇందులో ఫ్లాట్‌గా 20 శాతం TDS ఉంటుంది. అంతేకాదు, ఆదాయం ఎక్కువగా ఉండటం వల్ల సర్‌ఛార్జ్‌లు సెస్‌లు కూడా వర్తిస్తాయి.

గ్రీన్ విషయంలో.. రూ. 18 కోట్లపై 20 శాతం TDSగా సుమారు రూ. 3.60 కోట్లు తగ్గిస్తారు. దీని మీద 25 శాతం సర్‌ఛార్జ్‌గా సుమారు రూ. 90 లక్షలు పడుతుంది. అదనంగా 4 శాతం సెస్‌గా మరో రూ. 18 లక్షలు కట్ అవుతాయి. ఇలా భారత ప్రభుత్వం వద్దే మొత్తం దాదాపు రూ. 4.68 కోట్లు పన్నుల రూపంలో నిలిచిపోతాయి. ఈ అన్ని తగ్గింపుల తర్వాత.. Cameron Green భారతదేశం నుంచి సుమారు రూ. 13.32 కోట్లను మాత్రమే ఇంటికి తీసుకువెళ్తాడు. అయితే కథ ఇక్కడితో ముగియదు.

అతను ఆస్ట్రేలియా పౌరుడు కావడం వల్ల, స్వదేశంలో కూడా ఆదాయపు పన్ను, మెడికేర్ లెవీ వర్తిస్తుంది. భారత్-ఆస్ట్రేలియా మధ్య ఉన్న డబుల్ టాక్సేషన్ అవాయిడెన్స్ ఒప్పందం (DTAA) ప్రకారం.. భారత్‌లో చెల్లించిన పన్నుకు అతనికి క్రెడిట్ లభించినప్పటికీ, ఆస్ట్రేలియాలో అదనపు పన్ను భారం తప్పదు.అక్కడ అతను వివిధ రకాల పన్నుల కింద దాదాపు రూ. 3.58 కోట్లు చెల్లించాల్సి ఉంటుంది. ఈ మొత్తం పోగా గ్రీన్ ఇంటికి తీసుకువెళ్లేది కేవలం రూ. 25 కోట్లలో రూ. 9.74 కోట్లు మాత్రమేనని చెప్పవచ్చు.