LPG: సిలిండర్ ఎక్కువ రోజులు రావాలంటే ఈ ట్రిక్స్ ఫాలో అవ్వండి.. మీ డబ్బు ఆదా చేసుకోండి.

ప్రస్తుతం ప్రపంచవ్యాప్తంగా నెలకొన్న ఇంధన సంక్షోభం, పెరుగుతున్న ధరల నేపథ్యంలో, సామాన్యులకు వంట గ్యాస్ పొదుపుగా వాడుకోవడం అనివార్యంగా మారింది. ముఖ్యంగా మధ్యప్రాచ్యంలో యుద్ధ మేఘాల వల్ల అంతర్జాతీయంగా ఇంధన సరఫరాపై ప్రభావం పడుతోంది, ఇది పరోక్షంగా మన దేశంలో గ్యాస్ (LPG) లభ్యత, ధరలపై ఆందోళన కలిగిస్తోంది. ఈ తరుణంలో, మన ఇంట్లోని గ్యాస్ స్టవ్ గంటకు ఎంత గ్యాస్ వినియోగిస్తుందో తెలుసుకోవడం వల్ల, సిలిండర్ ఎప్పుడు అయిపోతుందో ముందే అంచనా వేయవచ్చు, వృథాను అరికట్టవచ్చు.

భారత్‌ లో గ్యాస్ సిలిండర్ సైజులు

సాధారణంగా మన దేశంలో గృహ అవసరాల కోసం 14.2 కిలోల బరువున్న సిలిండర్లను ఉపయోగిస్తాము. అయితే హోటళ్లు, రెస్టారెంట్లు వంటి వాణిజ్య అవసరాల కోసం 17 కిలోలు లేదా 21 కిలోల పెద్ద సిలిండర్లను వాడుతుంటారు. ఒక్క కిలో ఎల్పీజీలో దాదాపు 46.1 మెగాజూల్స్ (MJ) శక్తి ఉంటుంది. దీని ఆధారంగానే మన స్టవ్ ఎంత గ్యాస్ వాడుతుందో లెక్కించవచ్చు.

గ్యాస్ వినియోగాన్ని లెక్కించడం ఎలా?

మీ స్టవ్ ఎంత గ్యాస్ వాడుతుందో ఒక చిన్న లెక్క ద్వారా తెలుసుకోవచ్చు. సాధారణంగా ఒక గ్యాస్ బర్నర్ సామర్థ్యం కిలోవాట్లలో (kW) ఉంటుంది. ఉదాహరణకు, మీ స్టవ్ 5 kW రేటింగ్ కలిగి ఉంటే, దాన్ని 3.6 తో గుణించాలి (5 x 3.6 = 18 MJ/hr). ఇప్పుడు ఈ విలువను ఎల్పీజీ శక్తి విలువ (46.1) తో భాగిస్తే, గంటకు ఎంత గ్యాస్ ఖర్చవుతుందో తెలుస్తుంది. అంటే దాదాపు గంటకు 0.39 కిలోల గ్యాస్ వినియోగం అవుతుంది. ఈ లెక్కన 14.2 కిలోల సిలిండర్ నిరంతరంగా వాడితే 36 గంటల పాటు వస్తుంది.

వంట చేసేటప్పుడు ఎంత ఖర్చవుతుంది?

సాధారణంగా మనం వాడే టూ-బర్నర్ స్టవ్‌లో ఒక బర్నర్ గంటకు సుమారు 7 MJ శక్తిని వాడుకుంటుంది. ఒకవేళ మీరు రెండు బర్నర్లను ఒకేసారి వాడితే, గంటకు సుమారు 0.30 కిలోల గ్యాస్ ఖర్చవుతుంది. అంటే రెండు బర్నర్లను నిరంతరం వాడితే సిలిండర్ 46 గంటల పాటు వస్తుంది. అయితే మనం రోజుకు కేవలం 2-3 గంటలు మాత్రమే వంట చేస్తాం కాబట్టి, సగటున ఒక సిలిండర్ కొన్ని వారాల పాటు వస్తుంది.

ఏ బర్నర్ వాడితే గ్యాస్ ఆదా అవుతుంది?

చాలామందికి ఉండే సందేహం ఏంటంటే.. ఏ బర్నర్ వాడితే తక్కువ గ్యాస్ ఖర్చవుతుంది? పెద్ద బర్నర్ల కంటే చిన్న బర్నర్లు తక్కువ గ్యాస్‌ను వినియోగిస్తాయి. కాబట్టి రోజువారీ చిన్న చిన్న వంటలకు చిన్న బర్నర్‌ను ఉపయోగించడం వల్ల గ్యాస్‌ను ఆదా చేయవచ్చు.

గ్యాస్ ఆదా చేయడానికి కొన్ని చిట్కాలు..

కిచెన్‌లో ఈ చిన్న జాగ్రత్తలు పాటిస్తే మీ సిలిండర్ ఎక్కువ రోజులు వస్తుంది..

• మూతలు వాడండి: వంట చేసేటప్పుడు గిన్నెలపై మూతలు పెట్టడం వల్ల ఉష్ణోగ్రత బయటకు పోకుండా త్వరగా ఉడుకుతుంది.
• నానబెట్టడం: పప్పులు, ధాన్యాలను వండే ముందు కాసేపు నానబెడితే అవి త్వరగా ఉడికి గ్యాస్ ఆదా అవుతుంది.
• చిన్న మంట: వీలైనంత వరకు తక్కువ లేదా మధ్యస్థ మంటపై వండండి. హై ఫ్లేమ్ వల్ల గ్యాస్ వృథా అవుతుంది.
• బర్నర్ క్లీనింగ్: బర్నర్ రంధ్రాలలో చెత్త పేరుకుపోకుండా క్రమం తప్పకుండా శుభ్రం చేయాలి, దీనివల్ల మంట నీలి రంగులో వచ్చి సమర్థవంతంగా మండుతుంది.

ఇలాంటి చిన్న చిన్న పద్ధతులను పాటించడం ద్వారా మీ గ్యాస్ ఖర్చును తగ్గించుకోవడమే కాకుండా, సిలిండర్ బుకింగ్ విషయంలో సరైన ప్రణాళికతో ఉండవచ్చు.