బెంగళూరులో వింత కల్చర్ : పగలు టీమ్ లీడర్.. రాత్రికి క్యాబ్ డ్రైవర్!

కర్ణాటక రాజధాని బెంగళూరును ఇండియన్ టెక్ హబ్ లేదా సిలికాన్ వ్యాలీ అని పిలుస్తారు. ఈ నగరం నిరంతర కృషికి, పురోగతి కోరికకు చిహ్నం. ఇక్కడ ప్రజలు ఎక్కువగా ఉద్యోగంతో పాటు సైడ్ బిజినెస్‌లు కూడా చేస్తుంటారు. ఎందుకంటే ఎక్కువ డబ్బు సంపాదించడానికి లేదా వారి కోరికలను తీర్చుకోవడానికి ఇలా చేస్తుంటారు. అయితే ఇటీవల సోషల్ మీడియాలో వైరల్ అవుతున్న ఒక పోస్ట్ బెంగళూరు టెక్ లైఫ్ స్టయిల్ విచిత్రమైన కోణాన్ని బయటపెట్టింది.

పగలు టీమ్ లీడర్, రాత్రికి క్యాబ్ డ్రైవర్: తాజాగా X (గతంలో ట్విట్టర్)లో వైరల్ అయిన ఒక పోస్ట్‌లో ఒక వ్యక్తి ఆశ్చర్యకరమైన సంఘటనను షేర్ చేసాడు. అతను ఉబర్ నుండి క్యాబ్ బుక్ చేసుకోగా ఆ క్యాబ్ డ్రైవర్ తన ఆఫీస్ లీడర్షిప్ టీంలో సీనియర్ మెంబర్ అని తేలింది. ఆశ్చర్యకరంగా, ఆ టీమ్ లీడర్ క్యాబ్ నడుపుతున్నది డబ్బు సంపాదించడానికి కాదని, తన బోరింగ్ లైఫ్ వదిలించుకోవడానికి అని తెలుసుకుని ఆ వ్యక్తి మరింత ఆశ్చర్యపోయాడు. ప్రతిరోజు ఆఫీసు లైఫ్ బోర్ కొట్టడంతో ఇలా చేస్తున్నానని ఆ డ్రైవర్ చెప్పాడని ఆ మెసేజ్‌లో ఉంది.

ఈ సంఘటన ఆన్‌లైన్‌లో షేర్ అవ్వగానే ప్రజలు దీన్ని లైక్ చేయడం స్టార్ట్ చేసారు. అంతేకాదు ఈ సంఘటన బెంగళూరులో పనిచేసే విధానాన్ని చూపిస్తుందని Xలోని చాలా మంది అన్నారు. ఒక టెక్ ప్రొఫెషనల్ క్యాబ్ నడుపుతూనే మీటింగ్స్ కూడా నిర్వహిస్తున్నారనే విషయం ప్రజలను ఆకట్టుకుంది. బెంగళూరును సృజనాత్మకత, మార్పుకు కేంద్రంగా ఇది చూపిస్తుందని కొందరు అన్నారు. ఇక్కడి టెక్కీలు డబ్బు సంపాదించడానికే కాకుండా వారి మనస్సులను హుషారుగా ఉంచుకోవడానికి కొత్త అనుభవాలను పొందడానికి కూడా వివిధ పనులు చేస్తారని చూపిస్తుంది.

ప్రజల నుంచి రకరకాల స్పందన: ఈ పోస్ట్‌కి ప్రజలు రకరకాలుగా స్పందించారు. చాలా మంది దీనిని టెక్ సంస్కృతికి ఒక సరదా ఉదాహరణగా అభివర్ణించారు. బెంగళూరు లాంటి స్టార్టప్ హబ్‌లో జీవితం అనిశ్చితిని ఈ కథ చూపిస్తుందని కొందరు అన్నారు. అయితే, కొంతమందికి అది అంత ఫన్నీగా అనిపించలేదు. బెంగళూరు ట్రాఫిక్‌లో క్యాబ్ నడపడం తెలివైన పని కాదని, కేవలం సమయం గడపడానికి అంత రద్దీగా ఉండే రోడ్లపైకి వెళ్లనని మరికొందరు అన్నారు. బహుశా ఆ వ్యక్తికి ఆర్థిక ఇబ్బందులు ఉండవచ్చు కానీ అతను సరదాగా చూపిస్తున్నాడని ఇంకొందరు అనుమానం వ్యక్తం చేశారు. ఇలాంటివి బెంగళూరులోనే కాదు, ఇతర టెక్ నగరాల్లో కూడా జరుగుతాయని, నగరాల్లో నివసించడం ఖరీదైనది కాబట్టి ఎక్కువ సంపాదించే వ్యక్తులు కూడా సైడ్ బిజినెస్‌లు ప్రారంభించవచ్చని కొందరు అభిప్రాయపడ్డారు.

దీనిపై కొంతమంది మాత్రం తీవ్రంగా స్పందించారు. ఇది కేవలం ఒక వింత నిర్ణయం మాత్రమే కాదని, ఆర్థిక ఇబ్బందులకు సంకేతం కూడా కావచ్చని అన్నారు. కార్పొొరేట్ ప్రపంచంలో కనిపించేది ఎప్పుడూ నిజం కాదని, ఈ 'ఫన్నీ' నిర్ణయం వెనుక నగరంలో నివసించడానికి సంబంధించిన కొన్ని చెప్పలేని సమస్యలు ఉండవచ్చని వారు అభిప్రాయపడ్డారు.

గతంలో కూడా బెంగళూరుకు చెందిన ఒక వ్యక్తి మైక్రోసాఫ్ట్‌లో సాఫ్ట్‌వేర్ ఇంజనీర్‌గా పనిచేస్తున్న ఒక ఆటో-రిక్షా డ్రైవర్‌ను చూశానని చెప్పాడు. ఆ ఇంజనీర్ వీకెండ్ రోజుల్లో నమ్మ యాత్రి ప్లాట్‌ఫారమ్ వద్ద ఆటో నడుపుతాడని, ఒంటరితనాన్ని అధిగమించడానికి అతను ఇలా చేసేవాడని తెలిపాడు. మైక్రోసాఫ్ట్ బ్రాండ్ హూడీ ధరించి ఆటో నడుపుతుండటం ప్రజలను అత్యంత ఆశ్చర్యపరిచింది.