బెంగళూరులో పని చేసే కార్మికులకు గుడ్ న్యూస్.. గృహ కార్మికుల ముసాయిదా బిల్లు గురించి తెలుసుకోండి

బెంగళూరులోని ఎక్కువ కుటుంబాలు పనిమనిషి, వంటమనిషి, బట్టలు ఉతికే వారు, ఇళ్ళు శుభ్రం చేసే వారు, పిల్లలను చూసుకునే వాళ్లు, అలాగే డ్రైవర్లు, తోటమాలిలపై ఆధారపడుతుంటాయి. ప్రత్యేకించి రెండు ఆదాయ కుటుంబాల్లో (dual-income families) గృహ కార్మికులు ఓనర్ల జీవనశైలిలో భాగంగా మారిపోయారు. అయితే గృహ కార్మికుల నియామకం ఇప్పటివరకు పూర్తిగా అనధికారిక, నోటి మాటల ఆధారంగా సాగుతోంది.

అపార్ట్‌మెంట్ కాంప్లెక్స్‌లలో మహిళలు వాట్సాప్ గ్రూపుల ద్వారా కార్మికుల వివరాలు పంచుకోవడం, ఇంటర్వ్యూలు కూడా అనధికారికంగా జరుగుతాయి. వేతనాలు పెంచాలని గృహ కార్మికులు కోరడం, పనిగంటలు, సెలవు హక్కులపై చర్చలు తరచూ వివాదాస్పదంగా మారుతుంటాయి. నేపథ్య తనిఖీల కోసం రేటింగ్ యాప్‌లు, ఇంటి సిఫార్సులు, వాట్సాప్ చర్చలు ఇప్పటి వరకు ప్రధాన మార్గాలు.

ఇప్పుడు పరిస్థితిని మార్చేందుకు కర్ణాటక ప్రభుత్వం ముందుకొచ్చింది. గృహ కార్మికుల నియామకాన్ని అధికారికీకరించేందుకు, కార్మిక విభాగం ఇటీవల గృహ కార్మికుల బిల్లు ముసాయిదా విడుదల చేసింది. ఈ బిల్లు ప్రకారం, ప్రతి యజమాని తన గృహ కార్మికుడితో లిఖితపూర్వక ఉద్యోగ ఒప్పందం చేయాలి. ఇందులో పని గంటలు, వేతనం, సెలవులు, పని చేసే పరిధి, అదనపు పనికి చెల్లించే ఓవర్‌టైం, సంక్షేమ ప్రయోజనాలు వంటి అంశాలు స్పష్టంగా పేర్కొనాలి.

అదనంగా, కార్మికుడు, యజమాని ఇద్దరూ ఉద్యోగం ప్రారంభించిన 30 రోజుల్లో కార్మిక శాఖలో నమోదు చేసుకోవాల్సి ఉంటుంది. ఇందుకోసం డిజిటల్ పోర్టల్, మొబైల్ యాప్‌ను ప్రభుత్వం ప్రణాళిక చేస్తోంది. ఈ డేటాబేస్ గృహ కార్మికుల సంక్షేమ పథకాలను సరైన వారికి చేర్చడానికి కీలకమని డొమెస్టిక్ వర్కర్స్ యూనియన్ నేత గీతా మీనన్ పేర్కొన్నారు.

వేతనాల విషయంలో కూడా బిల్లు స్పష్టతనిస్తుంది. ప్రభుత్వ 2025 కనీస వేతన నోటిఫికేషన్ ప్రకారం, వంట పనులకు నెలకు రూ. 20,112.75 లేదా రోజుకు రూ. 773.57, ఇతర గృహపనులకు నెలకు రూ. 18,209.42 లేదా రోజుకు రూ. 700.36 నిర్ణయించబడింది. అదనంగా, వారానికి గరిష్టంగా 48 పని గంటలు, వారాంతం తప్పనిసరి సెలవు, వార్షిక వేతనంతో కూడిన సెలవులు, ప్రసూతి సెలవు హక్కులు కూడా ఇవ్వాలని బిల్లు సూచిస్తుంది. ఓవర్ టైమ్‌కు తగిన భత్యం తప్పనిసరిగా చెల్లించాలి.

అయితే ఇందులో కొన్ని వివాదాస్పద అంశాలు ఉన్నాయి. లిఖితపూర్వక ఒప్పందం లేకుండా కార్మికుడిని నియమిస్తే మూడు నెలల జైలు శిక్ష లేదా జరిమానా వంటి కఠిన చర్యలు ఉండటం అనేకమంది పౌరుల్లో ఆందోళన కలిగిస్తోంది. దీనివల్ల ప్రజలు కొత్తగా కార్మికులను నియమించడానికి భయపడవచ్చని వారు భావిస్తున్నారు. అయితే, కార్మిక మంత్రి సంతోష్ ఎస్ లాడ్ ఈ బిల్లు ప్రధాన ఉద్దేశ్యం శిక్షించడమో, బెదిరించడమో కాకుండా, సామాజిక భద్రతను పెంపొందించడం అని అన్నారు. గృహ కార్మికులపై దాడులు, దుర్వినియోగం జరిగినప్పుడు ఇప్పటికే ఉన్న చట్టాలు సహాయం చేయగలవని ఆయన స్పష్టం చేశారు.

పౌరులు, కార్మికుల మధ్య మిశ్రమ స్పందనలు కనిపిస్తున్నాయి. కొంత మంది ఈ బిల్లును స్వాగతిస్తూ, గృహ కార్మికులు కూడా గౌరవం, హక్కులకు అర్హులని చెబుతున్నారు. మరికొందరు ఇది ఆచరణలో క్లిష్టంగా మారకుండా చూడాలని కోరుతున్నారు.క్లుప్తంగా చెప్పాలంటే ఈ బిల్లు అమలైతే గృహ కార్మికుల ఉపాధి రంగంలో భారీ మార్పు వస్తుంది. ఇది బహుళ సంవత్సరాలుగా అనధికారికంగా కొనసాగిన వ్యవస్థను క్రమబద్ధీకరించే ముఖ్యమైన అడుగుగా నిపుణులు చెబుతున్నారు.