ఇంకా ఖర్చులు తగ్గించుకునే పనిలో కంపెనీలు.. మేలో హైరింగ్ రేట్ మరీ దారుణం

IT News: ప్రపంచ వ్యాప్తంగా ఉన్న ఆర్థిక అనిశ్చితి వల్ల లేఆఫ్‌ లు ఎక్కువయ్యాయి. ఆయా సంస్థలు ఆర్థికంగా నిలదొక్కుకునేందుకు ఉద్యోగాల్లో కోతలు విధించడం, సిబ్బందిపై వేటు వేయడం చేస్తున్నాయి. వీటికి తోడు కొత్తవారి నియామకాలను సైతం దాదాపుగా స్తంభింపజేశాయి. ఫ్రెషర్స్ ఏమి చేయాలో అర్థంకాని స్థితిలో ఉన్నారు.

గత ఏడాది మే నెలతో పోలిస్తే ఈసారి హైరింగ్ కార్యకలాపాలు 7 శాతం మందగించాయని ఫౌండ్‌ఇట్ ఇన్‌సైట్స్ ట్రాకర్ నివేదిక తెలిపింది. ఆర్థిక మందగమనం నేపథ్యంలో కంపెనీలు ఖర్చులను తగ్గించుకుంటూ, జాగ్రత్త వహించే విధానాన్ని అవలంబిస్తున్నాయని పేర్కొంది. ఈ మేరకు నెలవారీ నియామకాల ట్రెండ్‌పై ఫౌండ్‌ఇట్ తన తాజా అన్వేషణలను విడుదల చేసింది.

సాధారణ క్షీణత ఉన్నప్పటికీ అహ్మదాబాద్ మరియు జైపూర్ వంటి టైర్ II నగరాల్లో మాత్రం సానుకూల ధోరణి కనిపించినట్లు నివేదిక పేర్కొంది. అయితే 4 శాతం MoM క్షీణతతో అన్ని పరిశ్రమల్లో నియామక కార్యకలాపాలు తగ్గుముఖం పట్టాయని వెల్లడించింది. నైపుణ్యాల అంతరం వల్ల అర్హత కలిగిన అభ్యర్థులను గుర్తించడం సవాలుగా మారడమూ నియామక ప్రక్రియను క్లిష్టతరం చేసినట్లు అభిప్రాయపడింది.

"ప్రస్తుత నియామకాల ట్రెండ్.. భారతదేశ జాబ్ మార్కెట్ ఎదుర్కొంటున్న సవాళ్లను ప్రతిబింబిస్తుంది. అయితే వీటి మధ్య ఉద్యోగార్ధులకు అవకాశాలు అందించే పరిస్థితులూ ఉన్నాయి. సమీప భవిష్యత్తులో హైరింగ్ సవాలుగా ఉన్నప్పటికీ ఆర్థిక వ్యవస్థ బలపడుతున్నందున.. పరిశ్రమల అంతటా నియామకాలు పెరుగుతాయని అంచనా వేస్తున్నాము. ఉద్యోగార్ధులు కూడా మారుతున్న లేబర్ మార్కెట్‌కు అనుగుణంగా ఉండటం చాలా కీలకం. నిరంతరం నేర్చుకోవడం, కొత్త నైపుణ్యాలను పొందడం చాలా ముఖ్యం" అని మే 2023 ట్రెండ్ గురించి ఫౌండ్‌ఇట్ CEO శేఖర్ గరిసా వ్యాఖ్యానించారు.

అనేక ప్రధాన నగరాల్లోని IT హబ్స్ నియామకాల్లో భారీ క్షీణతను చవిచూశాయి. బెంగళూరు అత్యధికంగా 24 శాతం.. ఢిల్లీ, ముంబై, పూణె మరియు హైదరాబాద్‌లు 9 నుంచి 16 శాతం వరకు గణనీయమైన క్షీణతను నమోదుచేశాయి. అయితే అంచనాలను తలక్రిందులు చేస్తూ అహ్మదాబాద్ ప్రత్యేకంగా నిలిచింది. ఇక్కడ మాత్రం నియామకాల్లో 8 శాతం పెరుగుదల కనిపించింది. జైపూర్‌ కూడా 1 శాతం స్వల్ప వృద్ధిని ప్రదర్శించింది.