సేవింగ్స్ అకౌంట్, ఫిక్స్డ్ డిపాజిట్ వడ్డీ రేట్లు సవరించిన HDFC బ్యాంకు

ప్రయివేటురంగ బ్యాంకింగ్ దిగ్గజం HDFC బ్యాంకు సేవింగ్స్ అకౌంట్స్ వడ్డీ రేట్లను సవరించింది. బ్యాంకు అధికారిక వెబ్ సైట్ ప్రకారం రూ.50 లక్షల లోపు బ్యాలెన్స్ కలిగిన సేవింగ్స్ ఖాతాలకు 3 శాతం, రూ.50 లక్షలకు పైన బ్యాలెన్స్ ఉంటే అలాంటి సేవింగ్స్ ఖాతాలకు 3.50 శాతం వడ్డీ రేటును అందిస్తోంది. ఈ సవరించిన వడ్డీ రేట్లు ఏప్రిల్ 6, 2022 నుండి అమలు కానున్నాయి.

డొమెస్టిక్, ఎన్ఆర్ఓ, ఎన్ఆర్ఈ డిపాజిట్లతో సహా అన్ని సేవింగ్స్ ఖాతాలకు ఏప్రిల్ 6, 2022 నుండి ఈ కొత్త వడ్డీ రేట్లు అమల్లోకి వచ్చాయని తెలిపింది. బ్యాంకు ఖాతాదారు ఖాతాలో నిర్వహించే రోజువారీ నిల్వల ఆధారంగా వడ్డీని లెక్కించి మూడు నెలలకు ఓసారి వడ్డీ మొత్తాన్ని జమ చేస్తారు.

కేవలం సేవింగ్స్ అకౌంట్స్ మాత్రమే కాదు, ఫిక్స్డ్ డిపాజిట్ వడ్డీ రేట్లను కూడా పెంచింది HDFC బ్యాంకు. FD వడ్డీ రేట్లను పది బేసిస్ పాయింట్ల మేరకు పెంచింది. ఏడాది కాలపరిమితి ఫిక్స్డ్ డిపాజిట్స్ పైన ఇప్పటి వరకు ఉన్న 5 శాతం వడ్డీ రేటును 5.10 శాతానికి పెంచింది.

7 నుండి 14 రోజుల కాలపరిమితిపై 2.50 శాతం, 15 రోజుల నుండి 29 రోజుల కాలపరిమితిపై 2.50 శాతం, 30 రోజుల నుండి 45 రోజుల కాలపరిమితిపై 3 శాతం, 61 రోజుల నుండి 90 రోజుల కాలపరిమితిపై 3 శాతం, 91 రోజుల నుండి ఆరు నెలల కాలపరిమితిపై 3.5 శాతం, ఆరు నెలల ఒక రోజు నుండి 9 నెలల కాలపరిమితిపై 4.4 శాతం వడ్డీ రేటు వర్తిస్తుంది.

అలాగే, 9 నెలల ఒక రోజు నుండి ఏడాది వరకు 4.4 శాతం, ఏడాది కాలపరిమితిపై 5.10 శాతం, ఏడాది ఒకరోజు నుండి రెండేళ్ల కాలపరిమితిపై 5.10 శాతం, రెండేళ్ల ఒకరోజు నుండి మూడేళ్ల కాలపరిమితిపై 5.20 శాతం, మూడేళ్ల ఒకరోజు నుండి అయిదేళ్ల కాలపరిమితిపై 5.45 శాతం, అయిదేళ్ల ఒకరోజు నుండి పదేళ్ల కాలపరిమితిపై 5.60 శాతం వడ్డీ రేటు వర్తిస్తుంది.