ఎంసీఎల్ఆర్ వడ్డీ రేటును 35 బేసిస్ పాయింట్లు పెంచిన HDFC బ్యాంకు

దేశీయ అతిపెద్ద ప్రయివేటురంగ HDFC బ్యాంకు నిధుల వ్యయ ఆధారిత రుణ రేటును (MCLR) అన్ని కాలపరిమితుల రుణాలపై 35 బేసిస్ పాయింట్ల మేర పెంచింది. మంగళవారం నుండి ఈ కొత్త రుణ వడ్డీ రేట్లు అమలు అవుతాయని HDFC బ్యాంకు ఓ ప్రకటనలో తెలిపింది. సవరించిన వడ్డీ రేటు ప్రకారం బ్యాంకు రుణ రేట్లు 7.50 శాతం నుండి 8.05 శాతం మధ్య ఉంటున్నాయి. మార్జినల్ కాస్ట్ ఆధారంగా నెలవారీగా రుణ రేట్లను సవరించాలని ఆర్బీఐ సూచించిన మేరకు HDFC బ్యాంకు రేట్లను సవరించింది.

క్రితం ఆర్బీఐ మానిటరీ పాలసీ సమావేశ సమీక్ష అనంతరం HDFC బ్యాంకు ఎంసీఎల్ఆర్‌ను 60 బేసిస్ పాయింట్ల మేర పెంచింది. మే ప్రారంభంలోనే 40 బేసిస్ పాయింట్లు పెంచింది. ఆ తర్వాత గత నెలలో ఆర్బీఐ రెపో రేటును 40 బేసిస్ పాయింట్లు పెంచిన అనంతరం మరో 25 బేసిస్ పాయింట్లు పెంచింది. ఆర్బీఐ ద్రవ్య పరపతి సమావేశం నేపథ్యంలో రేపు, కీలక ప్రకటన వెలువడే అవకాశాలు ఉన్నాయి. ఈ నేపథ్యంలో మరోసారి పెంచింది.

సవరించిన వడ్డీ రేటు ప్రకారం ఓవర్ నైట్ వడ్డీ రేటు 7.50 శాతం, ఒక నెల 7.55 శాతం, మూడు నెలలు 7.60 శాతం, ఆరు నెలలు 7.70 శాతం, ఒక సంవత్సరం 7.85 శాతం, రెండేళ్లు 7.95 శాతం, మూడేళ్లు 8.05 శాతంగా ఉంది.