వరుసగా రెండోసారి.. వడ్డీ రేట్లను తగ్గించిన HDFC Bank! కొత్త రేట్ల పూర్తి జాబితా ఇదీ!

ప్రైవేట్ రంగ దిగ్గజం హెచ్‌డీఎఫ్‌సీ బ్యాంక్ (HDFC Bank) తన ఖాతాదారులకు, ముఖ్యంగా స్వల్పకాలిక రుణాలు తీసుకున్న వారికి శుభవార్త అందించింది. మార్జినల్ కాస్ట్ ఆఫ్ ఫండ్స్ బేస్డ్ లెండింగ్ రేట్ (MCLR) ను ఎంపిక చేసిన కొన్ని కాలపరిమితులపై తగ్గిస్తున్నట్లు బ్యాంక్ ప్రకటించింది. కొత్త రేట్లు మే 7, 2026 నుండి అమలులోకి వచ్చాయి. గత రెండు నెలల్లో బ్యాంక్ వడ్డీ రేట్లను తగ్గించడం ఇది రెండోసారి కావడం గమనార్హం. గతంలో ఏప్రిల్ 8న ఆర్‌బీఐ మానిటరీ పాలసీకి ముందే బ్యాంక్ వడ్డీ రేట్లను సవరించింది.

హెచ్‌డిఎఫ్‌సి బ్యాంక్ కొత్త MCLR రేట్లు ఇవే (మే 2026)..

బ్యాంక్ తన ఓవర్‌నైట్ నుండి మూడు నెలల కాలపరిమితి గల MCLR రేట్లను 5 బేసిస్ పాయింట్ల (0.05%) మేర తగ్గించింది. అయితే, దీర్ఘకాలిక రేట్లలో కొన్ని మార్పులు చేసింది.

• ఓవర్‌నైట్ (Overnight): 8.05%
• ఒక నెల (1 Month): 8.05%
• మూడు నెలలు (3 Month): 8.15%
• ఆరు నెలలు (6 Month): 8.30%
• ఒక సంవత్సరం (1 Year): 8.35%
• రెండు ఏళ్లు (2 Year): 8.45%
• మూడు ఏళ్లు (3 Year): 8.60% (ఇందులో 5 బేసిస్ పాయింట్ల పెంపుదల కనిపించింది)

ముఖ్యంగా గమనించాల్సిన విషయం ఏంటంటే, స్వల్పకాలిక రేట్లు తగ్గినప్పటికీ, 3 ఏళ్ల కాలపరిమితి గల రేటును 8.55% నుండి 8.60% కి పెంచింది. ఏడాది , రెండేళ్ల రేట్లలో ఎలాంటి మార్పు చేయలేదు.

MCLR అంటే ఏమిటి?

MCLR (Marginal Cost of Funds-based Lending Rate) అనేది ఒక బ్యాంక్ తన కస్టమర్లకు ఇచ్చే రుణాలపై వసూలు చేసే కనీస వడ్డీ రేటు. దీనికంటే తక్కువ రేటుకు బ్యాంక్ రుణాలు ఇవ్వడానికి వీలుండదు. 2016లో ఆర్‌బీఐ ప్రవేశపెట్టిన ఈ విధానం, పాత బేస్ రేట్ సిస్టమ్ స్థానంలో వచ్చింది. ఇది హోమ్ లోన్, పర్సనల్ లోన్ , బిజినెస్ లోన్ల వడ్డీ రేట్లను నిర్ణయించడంలో కీలక పాత్ర పోషిస్తుంది.

RBI కీలక వడ్డీ రేట్లు (మే 2026 నాటికి)..

ఇటీవల ఏప్రిల్ 8న జరిగిన భేటీలో ఆర్‌బీఐ మానిటరీ పాలసీ కమిటీ (MPC) కీలక రేట్లలో ఎలాంటి మార్పులు చేయకుండా యథాతథంగా కొనసాగించాలని నిర్ణయించింది..

• రెపో రేటు: 5.25%
• రివర్స్ రెపో రేటు: 3.35%
• SDF (Standing Deposit Facility): 3.25%
• MSF & బ్యాంక్ రేటు: 5.50%

ప్రస్తుత అంతర్జాతీయ భౌగోళిక రాజకీయ పరిస్థితులు , ద్రవ్యోల్బణాన్ని దృష్టిలో ఉంచుకుని ఆర్‌బీఐ తన తటస్థ వైఖరిని (Neutral Stance) కొనసాగిస్తోంది.

మీ EMI పై ప్రభావం ఎలా ఉంటుంది?

ఒకవేళ మీ రుణం (Loan) MCLR రేటుతో ముడిపడి ఉంటే, బ్యాంక్ రేట్లను తగ్గించినప్పుడు మీ EMI భారం తగ్గే అవకాశం ఉంటుంది. అయితే, ఇది మీ లోన్ రీసెట్ డేట్ (Reset Date) మీద ఆధారపడి ఉంటుంది. స్వల్పకాలిక రుణగ్రహీతలకు ఈ తగ్గింపు తక్షణమే ప్రయోజనం చేకూరుస్తుంది.