రూ.177 కోట్ల జీతం.. ఐటీ రంగంలో అత్యధిక వేతనం అందుకున్న సీఈఓగా HCLTech విజయ్‌కుమార్..

భారతదేశంలోని ఐటీ పరిశ్రమలో అత్యధిక పారితోషికం పొందే చీఫ్ ఎగ్జిక్యూటివ్‌గా హెచ్‌సిఎల్‌టెక్ (HCLTech) సీఈఓ సి విజయకుమార్ వరుసగా మూడో ఏడాది కూడా తన అగ్రస్థానాన్ని నిలబెట్టుకున్నారు. కంపెనీ వార్షిక నివేదిక ప్రకారం.. 2026 ఆర్థిక సంవత్సరంలో ఆయన మొత్తం పారితోషికం ఏకంగా 67 శాతం పెరిగి 18.3 మిలియన్ డాలర్లకు, అంటే సుమారు రూ. 177 కోట్లకు చేరింది.

దీనితో భారతదేశపు 315 బిలియన్ డాలర్ల ఐటీ సేవల పరిశ్రమలోని ఇతర పోటీ కంపెనీల సారథులతో పోలిస్తే ఆయన వేతన వ్యత్యాసం మరింత పెరిగింది. విజయకుమార్ జీతం.. ఇన్ఫోసిస్ సీఈఓ సలీల్ పరేఖ్ (రూ. 82.5 కోట్లు) కంటే రెట్టింపు కాగా.. విప్రో సీఈఓ శ్రీని పల్లియా (రూ. 49.2 కోట్లు) కంటే మూడున్నర రెట్లకు పైగా ఉంది. ఇక టీసీఎస్ సీఈఓ కె. కృతివాసన్ (రూ. 28 కోట్లు) కంటే ఏకంగా ఆరు రెట్లకు పైగా ఎక్కువగా ఉండటం గమనార్హంగా చూడవచ్చు. వార్షిక జీతాల సవరణల కంటే ఎక్కువగా.. వాయిదా వేయబడిన ప్రోత్సాహకాల చెల్లింపుల వల్లే ఈ భారీ పెరుగుదల చోటుచేసుకుందని చెప్పుకోవచ్చు.

విజయకుమార్ పొందిన భారీ పారితోషికంలో 2.4 మిలియన్ డాలర్ల మూల వేతనం.. 2 మిలియన్ డాలర్ల పనితీరు ఆధారిత బోనస్, దీర్ఘకాలిక ప్రోత్సాహకాల కింద 3.9 మిలియన్ డాలర్ల నగదు, వినియోగించిన రిస్ట్రిక్టెడ్ స్టాక్ యూనిట్ల ప్రయోజనాల కింద 9.4 మిలియన్ డాలర్లు ఉన్నాయి. సాధారణ వార్షిక జీతాల సవరణల కంటే కూడా.. గత ఆర్థిక సంవత్సరాల పనితీరుకు సంబంధించి వాయిదా పడిన ప్రోత్సాహకాలు, బోనస్‌లు ఈ ఏడాదే వర్తించడం వల్లనే ఆయన వేతనంలో ఈ స్థాయి పెరుగుదల చోటుచేసుకుంది.

Also Read

స్టాక్ మార్కెట్ క్లోజింగ్ బెల్..కుప్పకూలిన ఐటీ స్టాక్స్ .. టెక్ మహీంద్రా, HCL ఇన్వెస్టర్లు విలవిల..

అమెరికాలో నివసిస్తున్న విజయకుమార్, హెచ్‌సిఎల్‌టెక్ అమెరికా అనుబంధ సంస్థ ద్వారా ఈ వేతనాన్ని పొందుతున్నారు. అదే సమయంలో.. ఈ ఆర్థిక సంవత్సరంలో హెచ్‌సిఎల్‌టెక్ సంస్థ డాలర్ల రూపంలో 6 శాతం ఆదాయ వృద్ధితో 14.6 బిలియన్ డాలర్ల రాబడిని సాధించింది. కొనుగోలు శక్తి సమానత (PPP) ప్రాతిపదికన లెక్కించినప్పుడు. విజయకుమార్ పొందుతున్న వేతనం హెచ్‌సిఎల్‌టెక్ ప్రపంచవ్యాప్త ఉద్యోగుల మధ్యస్థ వేతనం కంటే 291.9 రెట్లు ఎక్కువగా ఉంది.

ఈ ఆర్థిక సంవత్సరంలో కంపెనీలోని ఉద్యోగుల మధ్యస్థ వేతనం 5.4 శాతం పెరగ్గా నిర్వాహకేతర ఉద్యోగుల సగటు జీతాల పెంపు 2.9 శాతంగా నమోదైంది. ప్రస్తుతం హెచ్‌సిఎల్‌టెక్ తన అనుబంధ సంస్థలతో కలిపి ప్రపంచవ్యాప్తంగా 2,27,000 కంటే ఎక్కువ మంది ఉద్యోగులతో తన కార్యకలాపాలను విస్తరిస్తోంది. వీరిలో స్వతంత్ర విభాగాలలో 1,70,811 మంది శాశ్వత ఉద్యోగులు కాగా.. అనుబంధ సంస్థలలో మరో 56,370 మంది ఉద్యోగులు ఉన్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.