IT News: అంచనాలు మించి రాణించిన HCL టెక్.. FY24లో మొదటి డివిడెండ్ ప్రకటన

IT News: మార్చితో ముగిసిన త్రైమాసికానికిగాను HCL టెక్నాలజీస్ 3 వేల 983 కోట్ల నికర లాభాన్ని ఆర్జించినట్లు ప్రకటించింది. గతేడాది ఇదే సమయంలో పోస్ట్ చేసిన 3 వేల 593 కోట్లతో పోలిస్తే, 11 శాతం పెరుగుదల నమోదుచేసినట్లు వెల్లడించింది. ఈ క్వార్టర్లో కంపెనీ కార్యకలాపాల ద్వారా ఆదాయం 18 శాతం పెరిగి 26 వేల 606 కోట్లకు చేరింది. క్రితం సంవత్సరంలో చూస్తే ఈ సంపాదన 22 వేల 597 కోట్లకు పరిమితమైంది. అయితే అంతకు ముందు త్రైమాసికంతో పోలిస్తే మాత్రం నికర లాభం 4 వేల 96 కోట్ల నుంచి 3 శాతం మేర క్షీణించింది

మార్కెట్ వర్గాల అంచనాను మించి నికర లాభాన్ని HCL పోస్ట్ చేసింది. FY24కి గాను స్థిరమైన కరెన్సీ (CC) వద్ద దాని ఆదాయం 6-8 శాతం వరకు పెరుగుతుందని కంపెనీ అంచనా వేస్తోంది. EBDIT మార్జిన్ గైడెన్స్ 18-19 శాతం మధ్య ఉంటుందని భావిస్తోంది. అయితే ఫలితాల ప్రకటనకు ముందు బుధవారం నాటికి NSEలో HCL టెక్ షేర్ల ట్రేడింగ్ 0.16 శాతం నష్టంతో రూ.1,037 వద్ద ముగిసింది.

ఇంతకు ముందటి త్రైమాసికాలతో పోలిస్తే నాల్గవ దానిలో స్థిరమైన కరెన్సీ రాబడి వృద్ధి 1.2 శాతం క్షీణించింది కానీ ఏడాదికేడాది 10 శాతం మేర పెరిగినట్లు తెలుస్తోంది. ఆదాయం సంవత్సరానికి 8 శాతం చొప్పున 3 వేల 235 మిలియన్ డాలర్లకు చేరుకుంది. విభాగాల వారీగా చూస్తే, సేవల ద్వారా రాబడి 11 శాతం YoY పెరిగింది. సాఫ్ట్ ‌వేర్ రంగం నుంచి వచ్చే ఆదాయంలో 8.2 శాతం వృద్ధిని సాధించింది. వీటికితోడు డిజిటల్ ఆదాయం 17 శాతం పెరిగింది.

నోయిడాకు చెందిన ఈ IT కంపెనీ EBDIT 4 వేల 836 కోట్లు కాగా.. సంవత్సరానికి 19 శాతం చొప్పున రాణించింది. ఈ త్రైమాసికంలో కంపెనీ 13 పెద్ద డీల్స్ (సర్వీసెస్ - 10, సాఫ్ట్ వేర్ - 10) గెలుచుకుంది. వీటి మొత్తం కాంట్రాక్ట్ విలువ 2.07 బిలియన్ డాలర్ల వద్ద ఉంది. గతేడాదితో కలిపి చూస్తే 8 శాతం వృద్ధి సాధించింది. అయితే మార్చి 2023తో ముగిసిన పూర్తి సంవత్సరానికి, కంపెనీ ఆదాయం 18 శాతం వృద్ధితో 1 లక్ష కోట్ల మార్కును దాటింది.

మంచి లాభాల మీద జోరుగా ఉన్న HCL టెక్, ఈక్విటీ షేరుకి 18 చొప్పున గురువారం మధ్యంతర డివిడెండును ప్రకటించింది. కాగా FY24 ఆర్థిక సంవత్సరానికి ఇది మొదటి డివిడెండ్ కావడం విశేషం. దానికి సంబంధించి ఇప్పటికే రికార్డు తేదీని ఈనెల 28గా నిర్ణయించింది. పెట్టుబడిదారులకు పెద్ద మొత్తంలో డివిడెండ్ ఇచ్చే కంపెనీల్లో HCL టెక్ ఒకటి కావడం గమనార్హం.