HCL News: చిప్ తయారీ రంగంలోకి టెక్ దిగ్గజం అడుగులు.. మెగా పెట్టుబడికి ప్లాన్స్..

HCL News: హెచ్‌సీఎల్ టెక్నాలజీస్ వ్యాపార విస్తరణపై దృష్టి సారించింది. కంప్యూటర్ హార్డ్‌వేర్ తయారీదారు అయిన శివ్ నాడార్ నేతృత్వంలోని హెచ్‌సీఎల్ గ్రూప్ వేగంగా అభివృద్ధి చెందుతున్న సెమీకండక్టర్ ఎకోసిస్టమ్‌లోకి ప్రవేశించాలని యోచిస్తోంది.

సెమీకండక్టర్ల కోసం ఒక అసెంబ్లీ, టెస్టింగ్, మార్కింగ్ అండ్ ప్యాకేజింగ్(ATMP) యూనిట్‌ను ఏర్పాటు చేయడానికి కంపెనీ ఆసక్తిగా ఉంది. ఇందుకోసం కేంద్ర ప్రభుత్వానికి ఒక ప్రతిపాదనను సమర్పించేందుకు దగ్గరగా ఉంది. దీనికోసం 200-300 మిలియన్ డాలర్లను ఇన్వెస్ట్ చేయాలని యోచిస్తోందని సమాచారం.

గుజరాత్‌లోని సనంద్‌లో అవుట్‌సోర్స్ సెమీకండక్టర్ అసెంబ్లీ అండ్ టెస్ట్ (OSAT) ప్లాంట్ ఏర్పాటుకు 825 మిలియన్ డాలర్ల పెట్టుబడిని ప్రకటించిన మైక్రోన్ వంటి కంపెనీల సరసన హెచ్సీఎల్ చేరనుంది. యూనిట్‌లు సెమీకండక్టర్ తయారీ గొలుసులో OSAT, ATMP యూనిట్లు ముఖ్యమైనవి. ఎందుకంటే అవి సిలికాన్ చిప్‌లను పరీక్షించడంలో, ప్యాకింగ్ చేయడంలో సహాయపడతాయి.

10 బిలియన్ డాలర్ల సెమీకండక్టర్ ఇన్సెంటివ్ ప్రోగ్రామ్ కింద హెచ్‌సిఎల్ గ్రూప్ దరఖాస్తు చేసుకోనుందని నివేదికలు వస్తున్నాయి. ఈ కార్యక్రమం కింద దేశంలో చిప్‌ల తయారీ యూనిట్లను ఏర్పాటు చేసే కంపెనీలు చేసే మూలధన వ్యయంలో 75% వరకు కేంద్ర, రాష్ట్ర సబ్సిడీలు అందుతాయి. ప్రపంచ స్థాయిలో ఇంటెల్ వంటి చిప్ తయారీ సంస్థలతో కలిసి పనిచేస్తున్న హెచ్‌సీఎల్ తాజా చర్య చాలా వ్యూహాత్మకమైనదిగా తెలుస్తోంది.