Click it and Unblock the Notifications
H-1B వీసాదారులకు కీలక అప్‌డేట్.. రూ. 1.18 కోట్లు జీతం ఉంటేనే అమెరికాకు రమ్మంటున్న కొత్త బిల్లు..
H-1B Visa Update: అమెరికాలో ఉపాధి పొందాలని భావిస్తున్న భారతీయ ఐటీ నిపుణులకు, అమెరికన్ టెక్ సంస్థలకు కీలకమైన పరిణామం ఎదురైంది. హెచ్-1బి వీసా కార్యక్రమంలో కీలకమైన జీతభత్యాల మినహాయింపు పరిమితిని ప్రస్తుతం ఉన్న $60,000 (సుమారు రూ. 50 లక్షలు) నుండి దాదాపు $140,000 (సుమారు రూ. 1.18 కోట్లు) కు పెంచేందుకు ఉద్దేశించిన ఒక కొత్త చట్టాన్ని అమెరికా రిపబ్లికన్ చట్టసభ సభ్యులు ప్రవేశపెట్టారు.
ప్రొటెక్టింగ్ అమెరికన్ వర్కర్స్ త్రూ హెచ్-1బి మోడరనైజేషన్ యాక్ట్ పేరుతో తీసుకువచ్చిన ఈ ప్రతిపాదన.. విదేశీ నిపుణులపై ఎక్కువగా ఆధారపడే కంపెనీల నియామక నిబంధనలను మరింత కఠినతరం చేసే అవకాశం ఉంది. విస్కాన్సిన్‌కు చెందిన హౌస్ ప్రతినిధి గ్లెన్ గ్రోత్‌మన్, ఒహాయోకు చెందిన సెనేటర్ జాన్ హస్టెడ్ ఈ బిల్లును ఉమ్మడిగా ప్రవేశపెట్టారు.
ఈ ప్రతిపాదనపై వ్యక్తమవుతున్న అనేక అపోహల మధ్య, అసలు మార్పు ఏమిటో స్పష్టంగా అర్థం చేసుకోవడం అత్యంత ముఖ్యం. మొదటగా గమనించాల్సింది ఏమిటంటే.. ప్రతిపాదిత $140,000 అనేది హెచ్-1బి వీసా పొందే ప్రతి ఉద్యోగికి విధించే కనీస వేతనం కాదు. బదులుగా, ఇది ప్రత్యేక నియామక నిబంధనల నుండి పొందే మినహాయింపు కోసం నిర్ణయించిన ఒక వేతన పరిమితి మాత్రమే.
ప్రస్తుత 1998 నాటి చట్టం ప్రకారం.. హెచ్-1బి వీసాలపై ఎక్కువగా ఆధారపడే కంపెనీలు విదేశీయులను నియమించుకునే ముందు స్థానిక అమెరికన్లకు మొదటి ప్రాధాన్యం ఇచ్చామని నిరూపించుకోవాలి. అయితే, సంవత్సరానికి కనీసం $60,000 జీతం ఇచ్చే ఉద్యోగులకు లేదా మాస్టర్స్ డిగ్రీ కలిగిన వారికి ఈ కఠిన పరిశీలన నిబంధనల నుండి మినహాయింపు లభించేది.
ఇప్పుడు ప్రవేశపెట్టిన బిల్లు ద్వారా ఈ పాతబడిన $60,000 పరిమితిని మారుస్తూ.. సోషల్ సెక్యూరిటీ అడ్మినిస్ట్రేషన్ వారి జాతీయ సగటు వేతన సూచికకు రెట్టింపుతో ముడిపడి ఉండేలా నూతన ఫార్ములాను ప్రతిపాదించారు. ప్రస్తుత వేతన స్థాయిల ప్రకారం ఇది దాదాపు $140,000కు చేరుకుంటుందని చట్టసభ సభ్యులు పేర్కొన్నారు. ఈ నిబంధన వేతన సూచిక ఆధారంగా మారుతూ ఉంటుంది తప్ప స్థిరంగా ఒకే చోట ఉండదు. ప్రస్తుత వేతన పరిమితులు కాలానికి అనుగుణంగా పెరగలేదని గ్రోత్‌మన్ వ్యాఖ్యానించగా.. పాత నిబంధనలను ఆసరాగా చేసుకుని కంపెనీలు స్థానిక అమెరికన్ కార్మికులకు ఉన్న రక్షణలను తప్పించుకోకూడదని హస్టెడ్ స్పష్టం చేశారు.
అమెరికా టెక్నాలజీ రంగానికి అవసరమైన నైపుణ్యం కలిగిన విదేశీ ప్రతిభను అందించడంలో భారతదేశం అగ్రస్థానంలో ఉంది. కాబట్టి ఈ మార్పులు భారతీయ ఐటీ రంగానికి అత్యంత ప్రాముఖ్యమైనవి. ఒకవేళ ఈ బిల్లు ఆమోదం పొందితే.. హెచ్-1బి ఆధారిత కంపెనీలు $140,000 కంటే తక్కువ జీతం పొందే భారతీయ నిపుణులను నియమించుకోవడానికి మొదట అమెరికన్ వర్కర్ల కోసం అన్వేషణ జరిపామని చూపే అదనపు నియామక ప్రక్రియలను పాటించాల్సి ఉంటుంది. దీనివల్ల ప్రారంభ, మధ్యస్థాయి (ఎంట్రీ అండ్ మిడ్-లెవల్) ఉద్యోగాలకు విదేశీయులను స్పాన్సర్ చేయడం కంపెనీలకు సంక్లిష్టంగా మారే ప్రమాదం ఉంది. అయితే అధిక అనుభవం ఉండి $140,000 పైబడి వేతనం పొందే సీనియర్ నిపుణులకు మినహాయింపులు యథావిధిగా వర్తిస్తాయి.
ప్రస్తుతం ఈ ప్రతిపాదన శాసన ప్రక్రియలో ప్రారంభ దశలోనే ఉంది. ఇంకా చట్టంగా మారలేదు. సెనేటర్ హస్టెడ్ ప్రవేశపెట్టిన సెనేట్ వెర్షన్ 'ఎస్. 5638' అక్టోబర్ 14న సెనేట్ న్యాయ కమిటీకి పరిశీలన కోసం పంపబడింది. ఈ ప్రతిపాదిత మార్పులు అమలులోకి రావాలంటే.. బిల్లు అమెరికా కాంగ్రెస్‌లోని రెండు సభల్లోనూ ఆమోదం పొంది, ఆపై అధ్యక్షుడి ఆమోదముద్ర పొందాల్సి ఉంటుంది. వాషింగ్టన్‌లో హెచ్-1బి విధానంపై విరుద్ధ అభిప్రాయాలు వ్యక్తమవుతున్న నేపథ్యంలో.. స్థానిక అమెరికన్ల ప్రయోజనాల రక్షణ, టెక్ పరిశ్రమకు అవసరమైన నైపుణ్యాల లభ్యతల మధ్య ఈ బిల్లు ఎలాంటి రూపాంతరం చెందుతుందో వేచి చూడాలి.
Sign in with Google