భారతీయులకు బిగ్ షాక్.. వీసా ప్రీమియం ప్రాసెసింగ్‌ ఫీజులు పెంచిన అమెరికా.. మార్చి 1 నుంచి అమల్లోకి..

అమెరికా సిటిజన్‌షిప్ అండ్ ఇమ్మిగ్రేషన్ సర్వీసెస్ (USCIS) ప్రీమియం ప్రాసెసింగ్ సేవల ఫీజులను పెంచుతున్నట్లు అధికారికంగా ప్రకటించింది. ఈ కొత్త ఫీజులు 2026 మార్చి 1 నుంచి అమల్లోకి రానున్నాయి. జూన్ 2023 నుంచి జూన్ 2025 మధ్య నమోదైన ద్రవ్యోల్బణాన్ని పరిగణలోకి తీసుకుని ఈ నిర్ణయం తీసుకున్నట్లు USCIS స్పష్టం చేసింది.ప్రధానంగా ఉద్యోగ ఆధారిత, నాన్-ఇమ్మిగ్రెంట్ వీసా దరఖాస్తులకు ఈ మార్పులు వర్తించనున్నాయి.ఈ పెంపుతో అమెరికాలో ఉద్యోగాలు చేస్తున్న లేదా చదువుతున్న భారతీయులపై తీవ్ర ప్రభావం పడే అవకాశం ఉంది.

ప్రీమియం ప్రాసెసింగ్ అనేది వీసా లేదా ఇమ్మిగ్రేషన్ దరఖాస్తులను సాధారణ సమయానికి ముందే వేగంగా పరిశీలించి నిర్ణయం తీసుకునే ప్రత్యేక సేవ. సాధారణంగా కొన్ని నెలలు పట్టే ఈ ప్రక్రియను ఈ సేవ ద్వారా కొన్ని వారాల్లోనే పూర్తి చేయవచ్చు. ఉద్యోగ మార్పులు, వీసా పొడిగింపులు, అత్యవసర ప్రయాణాలు వంటి సందర్భాల్లో ఈ సేవపై చాలా మంది ఆధారపడతారు. అందుకే ఈ ఫీజు పెంపు నేరుగా వలసదారుల ఖర్చులను పెంచనుంది.

కొత్త ఫీజుల ప్రకారం.. ఫారమ్ I-129 కింద వచ్చే H-2B, R-1 వీసాల ప్రీమియం ప్రాసెసింగ్ ఫీజు 1,685 డాలర్ల నుంచి 1,780 డాలర్లకు పెరిగింది. అదే ఫారమ్ I-129లోని H-1B, L-1, O-1, P-1, TN వంటి ప్రముఖ ఉద్యోగ వీసాలకు సంబంధించిన ప్రీమియం ప్రాసెసింగ్ ఫీజు 2,805 డాలర్ల నుంచి 2,965 డాలర్లకు పెరిగింది. ఉద్యోగ ఆధారిత గ్రీన్ కార్డ్ దరఖాస్తులకు ఉపయోగించే ఫారమ్ I-140కు కూడా ఇదే స్థాయిలో పెంపు జరిగింది.

ఇక స్టేటస్ పొడిగింపు లేదా మార్పు కోసం ఉపయోగించే ఫారమ్ I-539 కింద F-1, F-2 విద్యార్థులు, J-1, J-2 ఎక్స్చేంజ్ విజిటర్లు, అలాగే M-1, M-2 వృత్తిపర విద్యార్థులకు ఫీజు 1,965 డాలర్ల నుంచి 2,075 డాలర్లకు పెరిగింది. ఉద్యోగ అనుమతికి సంబంధించిన ఫారమ్ I-765లో OPT, STEM-OPT దరఖాస్తుల ప్రీమియం ప్రాసెసింగ్ ఫీజు 1,685 డాలర్ల నుంచి 1,780 డాలర్లకు పెరిగింది.

ఈ పెరిగిన ఫీజుల ద్వారా వచ్చే ఆదాయాన్ని ప్రీమియం ప్రాసెసింగ్ సేవలను మరింత సమర్థవంతంగా నిర్వహించడానికి.. దరఖాస్తుల పరిశీలనను వేగవంతం చేయడానికి, పెండింగ్ కేసుల భారాన్ని తగ్గించడానికి, మొత్తం USCIS సేవల నాణ్యతను మెరుగుపరచడానికి ఉపయోగిస్తామని సంస్థ వెల్లడించింది. గత కొన్నేళ్లుగా పెరుగుతున్న దరఖాస్తుల సంఖ్య కారణంగా ఏర్పడిన ఆలస్యాలను తగ్గించడమే ఈ చర్యల ప్రధాన లక్ష్యంగా పేర్కొంది.

భారతీయులపై ఈ ఫీజు పెంపు ప్రభావం ఎక్కువగా ఉండడానికి ప్రధాన కారణం H-1B, L-1 వంటి ఉద్యోగ వీసాల్లో భారతీయులే ఎక్కువగా ఉండటం అని చెప్పవచ్చు. అలాగే ఉద్యోగ ఆధారిత గ్రీన్ కార్డ్ పెండింగ్‌లలో కూడా భారతీయుల వాటా అధికంగా ఉంది. అమెరికాలో చదువుతున్న భారతీయ విద్యార్థులు పెద్ద సంఖ్యలో OPT, STEM-OPTలపై ఆధారపడి ఉద్యోగ అవకాశాలు పొందుతున్నారు. ఉద్యోగ మార్పులు.. వీసా పొడిగింపులు లేదా విదేశీ ప్రయాణాల కోసం వేగవంతమైన నిర్ణయాలు కావాలంటే ప్రీమియం ప్రాసెసింగ్ అనివార్యమవుతోంది. అందువల్ల ఫీజులు పెరిగితే ఆర్థిక భారం ప్రధానంగా భారతీయులపైనే ఎక్కువగా పడనుంది.