అమెరికాలోని భారత ఐటీ ఉద్యోగులకు బిగ్ షాక్.. ప్రముఖ IT సంస్థకు చెందిన H-1B వీసాలు రద్దు..

అమెరికా పౌరసత్వం, వలస సేవల విభాగం (USCIS) హెచ్-1బి (H-1B) వీసాల వినియోగంపై కఠిన చర్యలు చేపట్టింది. ఒక ప్రముఖ అంతర్జాతీయ ఐటీ కన్సల్టింగ్ కంపెనీ, అత్యంత నైపుణ్యం కలిగిన టెక్నాలజీ ఉద్యోగాలకు ఇచ్చే వేతన స్థాయిలను (Wage Levels) ఆయా పోస్టుల బాధ్యతలు, అవసరాల కంటే తక్కువగా వర్గీకరించి వేతనాలు తగ్గిస్తున్నట్లు గుర్తించింది. ఈ క్రమంలో సదరు కన్సల్టింగ్ సంస్థ సమర్పించిన పలు H-1B పిటిషన్లను తిరస్కరించడంతో పాటు.. అంతకుముందు ఆమోదించిన కొన్ని పిటిషన్లను కూడా రద్దు (Revoke) చేసినట్లు యూఎస్‌సిఐఎస్ వెల్లడించింది. సెప్టెంబర్ 5, 2026న సామాజిక మాధ్యమం 'X' (ట్విట్టర్) వేదికగా అమెరికా వీసా ఏజెన్సీ ఈ అమలు చర్యలను అధికారికంగా ప్రకటించింది.

USCIS వెర్మాంట్ (Vermont) కార్యాలయం నిర్వహించిన తనిఖీలలో ఈ అక్రమాలు వెలుగులోకి వచ్చాయి. హెచ్-1బి నిబంధనల ప్రకారం ప్రాయోజిత (Sponsoring) యజమానులు సదరు ఉద్యోగానికి వర్తించే చట్టబద్ధమైన వేతనాన్ని (Prevailing Wage) విధిగా చెల్లించాలి. అయితే ఈ కన్సల్టింగ్ సంస్థ నైపుణ్యం ఉన్న ఉద్యోగాలకు కూడా లెవెల్-1 వంటి తక్కువ వేతన వర్గీకరణలను కేటాయించడం ద్వారా కార్మికులకు దక్కాల్సిన వేతనాలను తగ్గించిందని ఏజెన్సీ స్పష్టం చేసింది. ఈ పద్ధతి వల్ల అమెరికన్ స్థానిక కార్మికులకు అన్యాయమైన పోటీ ఎదురవుతుందని.. స్థానిక ఉపాధి ప్రయోజనాలు దెబ్బతింటాయని పేర్కొంది. అమెరికా ఉపాధి ఆధారిత వలస విధానాల సమగ్రతను కాపాడటానికి, స్థానిక ఉద్యోగుల ప్రయోజనాలు పరిరక్షించడానికే ఈ రద్దు నిర్ణయాలు తీసుకున్నట్లు స్పష్టం చేసింది.

USCIS తమ ప్రకటనలో సదరు ఐటీ కన్సల్టింగ్ కంపెనీ పేరునుగానీ, రద్దయిన లేదా తిరస్కరించబడిన పిటిషన్ల ఖచ్చితమైన సంఖ్యనుగానీ వెల్లడించలేదు. అయినప్పటికీ, ఈ పరిణామం భారతీయ టెక్ రంగానికి మరియు హెచ్-1బి వీసాదారులకు తీవ్ర ఆందోళన కలిగిస్తోంది. USCIS వార్షిక గణాంకాల ప్రకారం 2024 ఆర్థిక సంవత్సరంలో ఆమోదించబడిన మొత్తం H-1B పిటిషన్లలో ఏకంగా 71 శాతం (దాదాపు 2,83,397 మంది) లబ్ధిదారులు భారతదేశానికి చెందినవారే కావడం గమనార్హం.

Also Read

హెచ్-1బి వీసా హోల్డర్లకు బిగ్ షాక్..అమెరికాలో ఉద్యోగం పోతే వెంటనే దేశం విడిచిపోవాల్సిందే..

ఐటీ కన్సల్టింగ్ సంస్థల్లో పనిచేస్తున్న H-1B ఉద్యోగులందరిపై ఈ నిర్ణయం ప్రభావం చూపకపోయినప్పటికీ.. భవిష్యత్తులో సమర్పించే ప్రతి పిటిషన్‌లో కేటాయించే ఉద్యోగ బాధ్యతలు, విద్యార్హతలు, కేటాయించిన వేతన స్థాయి (Wage Level) అనుగుణంగా ఉన్నాయో లేదో ఏజెన్సీ అత్యంత నిశితంగా పరిశీలించనుందని స్పష్టమవుతోంది. పిటిషన్లు రద్దయిన కన్సల్టింగ్ కంపెనీల్లో పనిచేస్తున్న ఉద్యోగులు తమ వీసా హోదా (Immigration Status), చట్టబద్ధమైన ఉపాధిని కోల్పోయే ప్రమాదం ఉంది. వారు తక్షణమే చట్టపరమైన పరిష్కారాలను వెతుక్కోవాల్సి వస్తుంది.

డొనాల్డ్ ట్రంప్ యంత్రాంగం ఉపాధి ఆధారిత వలసలు, H-1B వీసా దుర్వినియోగంపై సమీక్షను తీవ్రతరం చేసిన తరుణంలోనే ఈ కఠిన చర్యలు వెలువడటం గమనార్హం. రాబోయే రోజుల్లో కన్సల్టింగ్ సంస్థలు H-1B పిటిషన్లు దాఖలు చేసేటప్పుడు వేతన నిబంధనలను పక్కాగా పాటించక తప్పదని విశ్లేషకులు భావిస్తున్నారు.