GST రిటర్న్ డెడ్‌లైన్ పొడిగింపు, జీఎస్టీ ఫైలింగ్ లేట్‌ఫీ మాఫీ

మార్చి, ఏప్రిల్ నెలల జీఎస్టీఆర్-3బీ ఫైలింగ్, పన్ను చెల్లింపు లేట్ ఫీజును ప్రభుత్వం మాఫీ చేసింది. దీంతో ఆలస్యంగా చేసే చెల్లింపులపై వడ్డీని కూడా తగ్గించింది. రూ.5 కోట్లు దాటిన టర్నోవర్ ఉన్న వ్యాపారులు జీఎస్టీఆర్-3బీ, పన్నుల చెల్లింపులకు పదిహేను రోజుల అదనపు సమయాన్ని ఇచ్చింది. వీరు పదిహేను రోజులు ఆలస్యంగా చెల్లించే పన్నులపై విధించే వడ్డీ 18 శాతం నుండి 9 శాతానికి తగ్గించింది.

రూ.5 కోట్ల వరకు టర్నోవర్ కలిగిన వ్యాపారులు 3B రిటర్న్స్ వేసేందుకు 30 రోజుల వరకు గడువు ఇవ్వడంతో పాటు వీరు చెల్లించాల్సిన వడ్డీని తొలి 15 రోజుల ఆలస్యానికి మాఫీ చేశారు. ఆ తర్వాత పదిహేను రోజులకు తొమ్మిది శాతానికి కుదించారు.

సెంట్రల్ బోర్డ్ ఆఫ్ ఇండైరెక్ట్ ట్యాక్సెస్ అండ్ కస్టమ్స్ ఈ మేరకు మే 1వ తేదీన నోటిఫికేషన్ జారీ చేసింది. ఏప్రిల్ 18వ తేదీ నుండి ఈ ఉత్తర్వులు అమలులోకి వస్తాయని తెలిపింది. ఏప్రిల్ విక్రయాల జీఎస్టీఆర్ 1ను దాఖలు చేయడానికి గడువు తేదీని మే 11వ తేదీ నుండి మే 26వ తేదీ వరకు పొడిగించింది. కాంపొజిషన్ డీలర్లు మార్చి 31వ తేదీ నాటికి చేయాల్సిన ఫైలింగ్స్ గడువును మే 31వ తేదీ వరకు పెంచింది.