జీఎస్టీ మినహాయింపు గిఫ్ట్! హెల్త్ ఇన్సూరెన్స్ ఖర్చులు నిజంగా తగ్గుతాయా, లేక ఇంకా పెరుగుతాయా?

జీఎస్టీ (GST) కౌన్సిల్ 56వ సమావేశం మొదలైంది, మరియు లైఫ్, హెల్త్ ఇన్సూరెన్స్ ప్రీమియంల పై 18% జీఎస్టీని పూర్తిగా మినహాయించే ప్రతిపాదన ప్రధాన అంశంగా ఉంది. ఈ నిర్ణయం ఆమోదమైతే, ప్రజలకు 'దీపావళి గిఫ్ట్'గా ప్రభుత్వం ప్రకటించవచ్చని అంచనా. కానీ ఈ ప్రతిపాదన వెనుక ఒక పెద్ద మిస్టరీ ఉంది నిజంగా వినియోగదారులు లాభపడతారా, లేదా లాభం కంపెనీలకే వెళ్తుందా?

కేంద్రం మినహాయింపు కోసం ముందుకు వస్తోంది, కానీ కొన్ని రాష్ట్రాలు జాగ్రత్తగా ఉండాల్సిందని సూచిస్తున్నాయి. వారి అభిప్రాయం ఏమిటంటే, ఇన్సూరెన్స్ కంపెనీలు ప్రీమియంలను తగ్గించకపోతే, వినియోగదారులు ఏ తేడా చూడరు. అప్పుడు కేవలం కంపెనీల లాభ ఖాతాలో మాత్రమే చేరిపోతుంది.

ఇన్సూరెన్స్ నిపుణుల మాటల ప్రకారం, జీఎస్టీ మినహాయింపు మొదట తక్షణ లాభం లాగా అనిపించవచ్చు. కానీ ఇక్కడ సమస్య కూడా ఉంది. ITC (ఇన్‌పుట్ టాక్స్ క్రెడిట్) కోల్పోవడం వల్ల, ఇన్సూరర్‌లు టెక్నాలజీ, కన్సల్టెన్సీ, యుటిలిటీస్ వంటి ఖర్చులను తిరిగి పొందలేరు. ఆ ఖర్చులు చివరికి ప్రీమియంలలో మిక్స్ అయి, వినియోగదారులకు నిజమైన లాభం చేరకపోవచ్చు.

ITC అంటే ఏంటి?
ITC అంటే ఇన్సూరెన్స్ కంపెనీలకు జీఎస్టీ చెల్లించిన పన్నును తిరిగి పొందే అవకాశమే. అంటే, కంపెనీలు తమ వ్యాపారం కోసం కొనుగోలు చేసిన వస్తువులు, సర్వీసులపై చెల్లించిన GSTను తమ కస్టమర్ల నుండి వసూలు చేసే GST లోంచి తగ్గించుకోవచ్చు.

హెల్త్ ఇన్సూరెన్స్‌కి వస్తే, ITC ఉంటే కంపెనీలు టెక్నాలజీ, సాఫ్ట్వేర్, కన్సల్టెన్సీ, ఆఫీస్ ఖర్చులపై చెల్లించిన GST ను తిరిగి పొందగలవు. ITC లేకుంటే, ఈ ఖర్చులు ప్రీమియంలలో కలిపబడతాయి. ఫలితంగా, జీఎస్టీ మినహాయింపు ఉన్నా వినియోగదారులు తక్కువ ప్రీమియం చెల్లించకపోవచ్చు. ఎందుకంటె ITC ఉంటే కంపెనీలు ఖర్చులు తగ్గించి వినియోగదారులకు లాభం ఇస్తారు, ITC లేకపోతే మినహాయింపు లాభం వినియోగదారికి చేరదు.

తక్షణ రిలీఫ్ vs దీర్ఘకాల ప్రభావం:
స్వస్తిక ఇన్వెస్ట్‌మార్ట్ రీసెర్చ్ హెడ్ సంతోష్ మీనా చెప్పినట్టు, "తక్షణంగా డిమాండ్ పెరుగుతుంది, కానీ ITC కోల్పోవడం వల్ల ప్రీమియంలు పెరిగే అవకాశం ఉంది. దీర్ఘకాలంలో వినియోగదారులకు నిజమైన లాభం తగ్గే అవకాశం ఉంది. అందుకే 5% టాక్స్ రేటు + ITC కొనసాగించడం బెస్ట్ సొల్యూషన్. ఇలా చేస్తే, వినియోగదారులు తక్కువ చెల్లిస్తారు, ఇన్సూరర్‌లు ఖర్చులు సులభంగా నిర్వహిస్తారు, పరిశ్రమ కూడా సుస్థిరంగా అభివృద్ధి అవుతుంది.

గత జీఎస్టీ అనుభవం ఏం చెప్తుందంటే పూర్తి మినహాయింపులు ఎప్పుడూ వినియోగదారులకు నిజమైన లాభం ఇవ్వవు. ITC లేకపోవడం వల్ల క్రెడిట్ చైన్ డిస్రప్ట్ అవుతుంది, ధరలు అస్థిరంగా మారతాయి, పారదర్శకత తగ్గుతుంది. కనీసం 5% రేటుతో ITC కొనసాగించడం సరిగ్గా పనిచేస్తుంది, వినియోగదారులకు నిజమైన రిలీఫ్, పరిశ్రమకు సుస్థిరత ఇస్తుంది.

సంతోష్ మీనా సూచనల ప్రకారం మూడు ప్రధాన సన్నివేశాలు ఉన్నాయి:

1. GST తగ్గితే, ఇన్సూరెన్స్ ఖర్చులు తగ్గి, డిమాండ్ పెరుగుతుంది, స్టాక్‌లు ఎక్కువవుతాయి.
2. పూర్తి మినహాయింపు ITC కోల్పోవడం వల్ల ఖర్చులు పెరిగి వినియోగదారుల లాభం రాకపోవచ్చు.
3. 5% రేట్ + ITC కొనసాగించడం, వినియోగదారులకు తక్కువ చెల్లింపు, ఇన్సూరర్‌లు ఖర్చులు నిర్వహించడం, పరిశ్రమ సుస్థిరంగా వృద్ధి చెందడం.

కౌన్సిల్ తుది నిర్ణయం చాలా కీలకంగా ఉంది. దీర్ఘకాలంలో నిజమైన రిలీఫ్ ఇస్తుందా, లేక షార్ట్‌-టర్మ్ ఎఫెక్ట్‌లతో ఒక కొత్త జీఎస్టీ షాక్‌గా మిగిలిపోతుందా అనే అంశం ఆసక్తికరంగా ఉంది.