GST News: రూ.2 లక్షల కోట్లు జీఎస్టీ ఎగవేత.. తాట తీస్తున్న అధికారులు.. ఆ వ్యాపారాలే టార్గెట్..

GST Evasion: దేశంలో జీఎస్టీ పన్ను విధాన్ని ప్రతిష్ఠాత్మకంగా బీజేపీ ప్రభుత్వం ప్రవేశపెట్టింది. మెుదట్లో దీనిపై తీవ్ర స్థాయిలో విమర్శలు వచ్చినప్పటికీ వెనక్కి తగ్గలేదు. తాజాగా పన్ను ఎగవేతలను అరికట్టేందుకు ప్రభుత్వం టెక్నాలజీని విరివిగా వినియోగిస్తోంది.

2023-24లో దాదాపు రూ.2.01 లక్షల కోట్ల పన్ను ఎగవేతను జీఎస్టీ అధికారులు పట్టుకున్నారు. మొత్తం 2023-24 ఆర్థిక సంవత్సరానికి సంబంధించిన మొత్తం జీఎస్టీ వసూళ్లలో దాదాపు 10 శాతానికి సమానమైనది. 2023-24 ఆర్థిక సంవత్సరంలో GST ఎగవేత ఎన్నడూ లేనంత అత్యధికంగా అధికారులు గుర్తించారు. గత ఆర్థిక సంవత్సరంలో జీఎస్టీ వసూళ్లు 11.6 శాతం పెరిగిన సంగతి తెలిసిందే.

జీఎస్టీ వసూళ్లు అత్యధికంగా నమోదైన రంగాలను పరిశీలిస్తే.. ఆన్‌లైన్ గేమింగ్ అండ్ క్యాసినోలు రూ.83,588 కోట్లతో మెుదటి స్థానంలో నిలిచాయి. దీని తర్వాతి స్థానంలో కో-ఇన్సూరెన్స్/రీ-ఇన్స్యూరెన్స్ రూ.16,305 కోట్లుగా ఉన్నట్లు ఆర్థిక మంత్రిత్వ శాఖకు చెందిన రెవెన్యూ విభాగానికి చెందిన ఇంటెలిజెన్స్ విభాగం GST ఇంటెలిజెన్స్ డైరెక్టరేట్ జనరల్(DGGI) కనుగొన్నారు. జీఎస్టీ పన్ను ఎగవేతకు సంబంధించి మొత్తం 6074 కేసులు నమోదు కాగా.. ఇందులో మెుత్తంగా రూ.2,01,931 కోట్లు పన్ను వసూలు కావాల్సి ఉందని వెల్లడైంది.

2022-23 ఆర్థిక సంవత్సరంలో రూ.20,713 కోట్ల స్వచ్ఛంద చెల్లింపులతో సహా రూ.1,01,354 కోట్లకు సంబంధించిన 4,872 జీఎస్‌టీ ఎగవేత కేసులు కనుగొనబడ్డాయి. వీటికి సంబంధించి 92 మందిని అధికారులు అరెస్టు చేశారు. పరోక్ష పన్ను విధానంలో.. మోసం, ఎగవేతలు, నకిలీ కంపెనీల రిజిస్ట్రేషన్‌కు వ్యతిరేకంగా కొనసాగుతున్న అణిచివేత మధ్య .. బోగస్ ఇన్‌పుట్ టాక్స్ క్రెడిట్ క్లెయిమ్‌లు GST అధికారులను ఆందోళనకు గురిచేస్తున్నాయి. టాక్స్ క్రెడిట్ మోసాలకు సంబంధించి 2,200 కేసులు నమోదయ్యాయి. FY24లో ప్రభుత్వ ఆదాయాన్ని కోల్పోకుండా ఉండేందుకు నకిలీ ITCకి వ్యతిరేకంగా DGGI ప్రత్యేక ప్రచారాన్ని ప్రారంభించింది.