GST News: వ్యాపారులకు కొత్త జీఎస్టీ రూల్స్.. ఇకపై అవి వారం రోజుల్లో అందించాల్సిందే..

GST News: కేంద్ర ప్రభుత్వం వస్తు సేవల పన్ను(GST) విషయంలో కొత్త నిబంధనలను ప్రకటించింది. ప్రస్తుతం రూ.100 కోట్లు లేదా అంతకంటే ఎక్కువ టర్నోవర్ ఉన్న వ్యాపారాలు తమ ఎలక్ట్రానిక్ ఇన్‌వాయిస్‌లను ఇన్‌వాయిస్ రిజిస్ట్రేషన్ పోర్టల్(IRP)కి మే 1 నుంచి ఏడు రోజుల్లో అప్‌లోడ్ చేయాల్సి ఉంటుంది.

టాక్స్ పేయర్లకు జీఎస్టీ నెట్ వర్క్ తాజాగా నిబంధనలను మార్చింది. దీని ప్రకారం పాత ఇన్‌వాయిస్‌లను.. ఈ-ఇన్‌వాయిస్ IRP పోర్టల్‌లలో పన్ను చెల్లింపుల కోసం అప్ లోడ్ చేసేందుకు కాల పరిమితి పెట్టాలని నిర్ణయించింది. అయితే ఈ రూల్స్ రూ.100 కోట్లు లేదా అంత కంటే ఎక్కువ టర్నోవర్ కలిగిన వ్యాపారులకు వర్తించనున్నాయి.

సకాలంలో ఇన్‌వాయిస్‌లను రిపోర్టింగ్ చేసేందుకు 7 రోజులను గడువుగా జీఎస్టీఎన్ నిర్ణయించినట్లు ప్రకటించింది. అంటే ఏడు రోజులకంటే పాత ఇన్‌వాయిస్‌లను గడువు తర్వాత అప్ లోడ్ చేయటం ఇకపై కుదరదని వ్యాపారులు గుర్తుంచుకోవాలి. ఈ కొత్త ఫార్మాట్ మే 1, 2023 నుంచి అమలు చేయబడుతుంది. అయితే డెబిట్/క్రెడిట్ నోట్‌లను నివేదించడంలో సమయ పరిమితి ఉండదు.

ఉదాహరణకు ఏప్రిల్ 1, 2023కి చెందిన ఇన్‌వాయిస్‌ను 7 రోజుల తర్వాత అంటే ఏప్రిల్ 8, 2023 తర్వాత అప్ లోడ్ చేయటం ఇకపై కుదరదు. అందువల్ల పన్ను చెల్లింపుదారులు కొత్త సమయ పరిమితి ద్వారా అందించబడిన 7-రోజుల విండోలో ఇన్‌వాయిస్‌ను పోర్టల్ లో నివేదించినట్లు నిర్ధారించుకోవడం చాలా అవసరమని GSTN తెలిపింది. గడువులోపు అలా చేయకపోతే ఇన్ పుట్ టాక్స్ క్రెడిట్ పొందటం కుదరదు.