IPO News: తొలిరోజే ఐపీవో 100 శాతం రాబడి.. నిమిషాల్లోనే పైసల్ డబుల్.. ఇన్వెస్టర్స్ హ్యాపీ..

Greenhitech Ventures: ఈరోజు దేశీయ స్టాక్ మార్కెట్లోకి లిస్టింగ్ నమోదు చేసిన ఐపీవో నిజంగా సంచలన రాబడిని అందించింది. మార్కెట్లు లాభాలతో ట్రేడింగ్ కొనసాగిస్తున్న వేళ ఐపీవో బంపర్ లిస్టింగ్ నమోదు చేయటం బెట్టింగ్ వేసిన ఇన్వెస్టర్ల తలరాతను మార్చేసింది. నిమిషాల్లోనే ఇన్వెస్టర్ల సంపద రెండింతలు అయ్యింది.

ఇప్పుడు మనం మాట్లాడుకోబోతున్నది నేడు మార్కెట్లో సంచలనంగా మారిన గ్రీన్‌హైటెక్ వెంచర్స్ ఐపీవో గురించే. మార్కెట్లో ఈ చిన్న కంపెనీ షేర్లు నేడు బలమైన ప్రవేశాన్ని నమోదు చేశాయి. ఈ క్రమంలో గ్రీన్‌హైటెక్ వెంచర్స్ షేర్లు 90 శాతం లాభంతో రూ.95 వద్ద మార్కెట్‌లో లిస్టయ్యాయి. వాస్తవానికి కంపెనీ తన షేర్లను ఒక్కోటి రూ.50 ధరకు ఇష్యూ సమయంలో దరఖాస్తు చేసుకున్న పెట్టుబడిదారులకు విక్రయించింది. ఏప్రిల్ 12 నుంచి 16 వరకు రిటైల్ ఇన్వెస్టర్ల సబ్‌స్క్రిప్షన్ కోసం ఐపీవో తెరచి ఉంది.

కంపెనీ తాజా ఐపీవో ద్వారా మార్కెట్ల నుంచి రూ.6.30 కోట్లను సమీకరించింది. అద్భుతమైన లిస్టింగ్ తర్వాత గ్రీన్‌హైటెక్ వెంచర్స్ షేర్లు 5% అప్పర్ సర్క్యూట్‌ తాకి రూ.99.75కి చేరుకున్నాయి. దీంతో ఐపీవో లిస్టింగ్ తొలిరోజునే.. గ్రీన్‌హైటెక్ వెంచర్స్ షేర్లు నమ్మకంతో బెట్టింగ్ వేసిన ఇన్వెస్టర్ల డబ్బును రెట్టింపు చేసింది. కంపెనీ షేర్లు బీఎస్ఈ ఎస్ఎమ్ఈ ప్లాట్‌ఫారమ్‌లో జాబితా చేయబడ్డాయి. ఐపీఓకు ముందు కంపెనీలో ప్రమోటర్ల వాటా 100% ఉండగా.. ప్రస్తుతం అది 73.19 శాతానికి తగ్గింది. వారణాసి కేంద్రంగా పనిచేస్తున్న కంపెనీ 2011లో స్థాపించబడింది.

గ్రీన్‌హైటెక్ వెంచర్స్ ఐపీవోలో మొత్తం 769.95 సార్లు బెట్టింగ్‌లు జరిగాయి. కంపెనీ IPOలో రిటైల్ ఇన్వెస్టర్ల కోటా 597.41 రెట్లు సబ్‌స్క్రైబ్ చేయబడింది. అదే సమయంలో ఇతరుల విభాగంలో 921.60 సార్లు పందాలు జరిగాయి. రిటైల్ పెట్టుబడిదారులు కంపెనీ లాట్ పరిమాణాన్ని 3000 షేర్లుగా నిర్ణయించింది. ఇందుకోసం వారు కనీసం రూ.1.50 లక్షలు పెట్టుబడి పెట్టారు. గ్రీన్‌హైటెక్ వెంచర్స్ ఐపీవో నుంచి సేకరించిన నిధులను వర్కింగ్ క్యాపిటల్ అవసరాలు, సాధారణ కార్పొరేట్ ఖర్చుల కోసం వినియోగించాలని నిర్ణయించింది.