Gowtham Adani@60: 60వ పుట్టిన రోజుకు రూ.60 వేలకోట్లు దానమిచ్చిన అదానీ.. ట్విట్టర్ వేదికగా వెల్లడి..

Adani Birthday: దేశంలోని అగ్రవ్యాపారవేత్త, సంపన్నుడుగా ఉన్న గౌతమ్ అదానీ తన దాతృత్వాన్ని చాటుకున్నారు. గౌతమ్ అదానీ 60వ పుట్టినరోజు, ఆయన తండ్రి శాంతిలాల్ అదానీ 100వ పుట్టినరోజు సందర్భంగా అదానీ కుటుంబం జూన్ 23న అతిపెద్ద ప్రకటన చేశారు. రూ. 60,000 కోట్లను ఛారిటీ కార్యక్రమాలకు వెచ్చిచనున్నట్లు వెల్లడించారు. ఈ విరాళాన్ని అదానీ ఫౌండేషన్ నిర్వహిస్తుందని స్పష్టం చేశారు. ఈ మెుత్తాన్ని ఆరోగ్య సంరక్షణ, విద్య, నైపుణ్యం అభివృద్ధికి సంబంధించిన కార్యకలాపాలకు వెచ్చించనున్నట్లు తెలిపారు. 1962 జూన్ 24న అదానీ గుజరాత్ లో జన్మించారు. 1988లో కమోడిటీస్ ట్రేడింగ్ ప్రారంభించిన ఆయన ఇప్పుడు దేశంలోని అనేక రంగాల్లో తన వ్యాపారాలను విస్తరించి ఆసియాలోని కుబేరుల జాబితాలోకి ఎక్కారు.

ట్విట్టర్ లో వెల్లడి..

ట్విట్టర్ వేదికగా గౌతమ్ అదానీ విరాళాన్ని ప్రకటించారు. "సమానమైన, భవిష్యత్తు-సన్నద్ధమైన భారతదేశాన్ని నిర్మించడంలో" సహాయం చేయడమే ఈ విరాళ మూల ఉద్దేశ్యమని అన్నారు. అదానీ తండ్రి 100వ జన్మదినోత్సవం & అదానీ 60వ పుట్టినరోజు సందర్భంగా, భారతదేశం అంతటా ఆరోగ్య సంరక్షణ, విద్య & స్కిల్-డవలప్ మెంట్ కోసం రూ. 60,000 కోట్లను దాతృత్వానికి ఇస్తున్నందుకు అదానీ కుటుంబం సంతోషంగా ఉందని అదానీ తెలిపారు. "భారీ ప్రాజెక్ట్ ప్లానింగ్, అమలులో మా అనుభవం, అదానీ ఫౌండేషన్ చేసిన పని నుంచి నేర్చుకున్న అంశాలు ఈ కార్యక్రమాలను ప్రత్యేకంగా వేగవంతం చేయడంలో మాకు సహాయపడతాయి" అని గౌతమ్ అదానీ చెప్పారు.

అజీమ్ ప్రేమ్‌జీ ప్రశంశలు..

గౌతమ్ అదానీ చేసిన ఈ ప్రకటనపై అజీమ్ ప్రేమ్‌జీ ఫౌండేషన్ ఛైర్మన్, విప్రో లిమిటెడ్ వ్యవస్థాపక ఛైర్మన్ అజీమ్ ప్రేమ్‌జీ స్పందిస్తూ, "గౌతమ్ అదానీ, అతని కుటుంబం దాతృత్వం పట్ల ఉన్న నిబద్ధత మనమందరం మహాత్మా గాంధీ 'ట్రస్టీషిప్' సూత్రాన్ని జీవించడానికి ప్రయత్నించగలమని ఒక ఉదాహరణగా చెప్పాలి. మా వ్యాపార విజయ శిఖరం. మన సూర్యాస్తమయ సంవత్సరాల కోసం వేచి ఉండాల్సిన అవసరం లేదు" అని ప్రేమ్ జీ అన్నారు.

భిన్నత్వంలో ఏకత్వం..

దేశ సవాళ్లు, అవకాశాలు, సంపద, ప్రాంతం, మతం, కులం మరెన్నో విభజనలకు అతీతంగా ప్రజలు కలిసి పనిచేయాలని కోరుతున్నాయని ప్రేమ్ జీ అన్నారు. "ఈ ముఖ్యమైన జాతీయ ప్రయత్నంలో గౌతమ్ అదానీ, అతని ఫౌండేషన్ అత్యుత్తమంగా ఉండాలని నేను కోరుకుంటున్నాను" అని అజీమ్ ప్రేమ్‌జీ అన్నారు.