దివాలా చట్టంలో మోడీ ప్రభుత్వం కీలక సవరణలు

ఇన్‌సాల్వెన్సీ అండ్ బ్యాంక్రప్టసీ కోడ్ (దివాలా చట్టం-IBC)లో కీలక సవరణలు చేపట్టేందుకు నరేంద్ర మోడీ ప్రభుత్వం సిద్ధమైంది. దివాళా ప్రక్రియలో భాగంగా విక్రయించిన ఆస్తుల్ని కొనుగోలు చేసిన కంపెనీలు.. గతంలో దివాలా తీసిన కంపెనీ ప్రమోటర్లు చేసిన నేరాలను ఎదుర్కొనకుండా ఈ సవరణలు ఉంటాయి.

ఈ కీలక సవరణ ద్వారా దివాలా కంపెనీల ఆస్తులను కొనుగోలు చేసేందుకు ఎక్కువ బిడ్స్ వచ్చే అవకాశాలు ఉంటాయని కేంద్రం భావిస్తోంది. దివాలా చట్టం 2016ను ఈ సమావేశాల్లోనే సవరించేందుకు సిద్ధమైంది. కోర్టు పర్యవేక్షణలో జరిగే దివాలా ప్రక్రియలో ఆస్తులను కొనుగోలు చేసిన వారు నేరపూరిత ఆరోపణలు ఎదుర్కోకుండా చూసేలా మార్పులు చేస్తున్నట్లు చెబుతున్నారు.

భూషణ్ స్టీల్స్‌కు చెందిన రూ.4,000 కోట్ల విలువైన ఆస్తుల్ని ఇటీవల ఈడీ అటాచ్ చేసింది. జేఎస్‌డబ్ల్యూ స్టీల్స్ ఈ ఆస్తుల్ని కొనుగోలు చేసేందుకు సిద్ధమైంది. ఈ నేపథ్యంలో ప్రస్తుత పరిణామాలు చోటు చేసుకున్నాయి.