Windfall Tax: పెట్రోలియం క్రూడ్‌పై విండ్‌ఫాల్ టాక్స్ పెంచిన కేంద్రం..!

Windfall Tax: భారత ప్రభుత్వం విండ్‌ఫాల్ పన్నుల విషయంలో కీలక ప్రకటన చేసింది. గత నెల ఈ పన్నును తగ్గించిన కేంద్రం తాజాగా మరోసారి పెంచుతున్నట్లు ప్రకటించింది.

భారత ప్రభుత్వం పెట్రోలియం క్రూడ్‌పై విండ్‌ఫాల్ పన్నును నవంబర్ 1 నుంచి టన్నును రూ.9,050 నుంచి రూ.9,800కి పెంచినట్లు ప్రభుత్వ నోటిఫికేషన్‌లో పేర్కొంది. ఈ క్రమంలో డీజిల్ ఎగుమతులపై పన్నును తగ్గించగా.. దేశీయంగా ఉత్పత్తి చేయబడిన ముడి చమురుపై ప్రభుత్వం మంగళవారం విండ్ ఫాల్ ప్రాఫిట్ పన్నును పెంచుతున్నట్లు ప్రకటించింది.

దేశీయంగా ఉత్పత్తి చేయబడిన ముడి చమురుపై స్పెషల్ అడిషనల్ ఎక్సైజ్ డ్యూటీ లేదా SAED రూపంలో విధించే పన్ను టన్నుకు రూ.9,800కి పెరిగింది. ఇదే క్రమంలో ఏవియేషన్ టర్బైన్ ఇంధనంపై విండ్ ఫాల్ ట్యాక్స్ లీటరుకు రూ.1 నుంచి సున్నా రూపాయలకు తగ్గించినట్లు నోటిఫికేషన్ వెల్లడించింది. అలాగే డీజిల్‌పై విండ్‌ఫాల్ ట్యాక్స్‌ని లీటర్‌కు రూ.4 నుంచి రూ.2కి తగ్గించింది.

భారత ప్రభుత్వం అక్టోబర్ 18న పెట్రోలియం క్రూడ్‌పై విండ్‌ఫాల్ పన్నును టన్నుకు రూ.12,100 నుంచి రూ.9,050కి తగ్గించిన సంగతి తెలిసిందే. దేశంలో గత ఏడాది జూలైలో ముడి చమురు ఉత్పత్తిదారులపై విండ్‌ఫాల్ పన్నును తొలిసారిగా విధించారు. గ్యాసోలిన్, డీజిల్, విమానయాన ఇంధనాల ఎగుమతులపై పన్నును పొడిగించింది. ప్రైవేట్ రిఫైనర్లు స్థానికంగా విక్రయించటానికి బదులుగా విదేశీ మార్కెట్లలో అమ్మటం ద్వారా బలమైన రిఫైనింగ్ మార్జిన్లు పొందటాన్ని అరికట్టేందుకు కేంద్రం దీనిని ప్రవేశపెట్టింది.