IDBI Bank: అదరగొట్టిన ఐడిబిఐ బ్యాంక్.. 62 శాతం పెరిగిన లాభాలు..

IDBI Bank Q1 Results: దేశంలోని బ్యాంకింగ్ రంగంలోని కంపెనీలు మెరుగైన పనితీరును కనబరుస్తున్నాయి. గడచిన దశాబ్ధకాలంలో ఎన్నడూ చూడని రీతిలో మెరుగైన పనితీరును కనబరుస్తున్నాయి.

ఈ క్రమంలో తాజాగా ప్రభుత్వ యాజమాన్యంలోని IDBI బ్యాంక్ మొదటి త్రైమాసిక ఫలితాలను విడుదల చేసింది. ఏడాది ప్రాతిపధికన బ్యాంక్ నికర లాభం 62 శాతం పెరిగి రూ.1,224 కోట్లుగా నమోదైంది. గత ఏడాది ఇదే త్రైమాసికంలో లాభం కేవలం రూ.756 కోట్లుగా ఉంది. జూన్ త్రైమాసికంలో బ్యాంక్ నికర వడ్డీ ఆదాయం(NII) 61% పెరిగి రూ.3,998 కోట్లకు చేరుకుంది.

జూన్‌తో ముగిసిన త్రైమాసికంలో నిర్వహణ లాభం గత ఏడాది ఇదే కాలంలో నమోదైన రూ.2,051 కోట్లతో పోలిస్తే 47% పెరిగి రూ.3,019 కోట్లకు చేరుకుంది. ఇదే క్రమంలో కేటాయింపులు ఏడాది ప్రాతిపదికన 24 శాతం పెరిగి రూ.1,190 కోట్లకు చేరుకున్నాయి. అలాగే నిరర్థక ఆస్తులకు కేటాయింపులు రూ.581 కోట్లుగా ఉన్నాయి. రిపోర్టింగ్ త్రైమాసికంలో నికర NPAలు 0.44%కి తగ్గాయి.

ప్రొవిజన్ కవరేజ్ రేషియో ఏడాది క్రితం 97.78% నుంచి జూన్ 2023 నాటికి 98.99%కి మెరుగుపడింది. బ్యాంక్ నికర వడ్డీ మార్జిన్ గత ఏడాది ఇదే కాలంలోని 4.02%తో పోలిస్తే.. 178 బేసిస్ పాయింట్లు మెరుగుపడి 5.8%కి చేరుకుంది. నికర అడ్వాన్సులు 20% జంప్ చేసి రూ.1.65 లక్షల కోట్లకు చేరుకున్నాయి. క్యూ1లో డిపాజిట్ వ్యయం 4.12%గా, నిధుల వ్యయం 4.40%గా ఉంది. సోమవారం మార్కెట్లు ముగిసే సమయంలో ఎన్ఎస్ఈలో ఐడిబిఐ బ్యాంక్ షేర్లు రూ.57.90 వద్ద ఉన్నాయి.