అమెరికాను వీడి ఎవరూ బయటకెళ్లొద్దు.. ఉద్యోగులకు ముందస్తు హెచ్చరికలు జారీ చేసిన గూగుల్..కారణం ఏంటంటే..

అమెరికా ప్రభుత్వం ఇటీవల అమలు చేసిన కొత్త సోషల్ మీడియా వెట్టింగ్ పాలసీ కారణంగా వీసా దరఖాస్తు ప్రక్రియ మరింత కఠినంగా మారింది. ఈ కొత్త నిబంధనల ప్రభావంతో అనేక మంది అభ్యర్థుల వీసా అపాయింట్‌మెంట్‌లు భారీగా ఆలస్యం అవుతున్నట్లు వార్తలు వెలువడుతున్నాయి. కొన్ని సందర్భాల్లో అపాయింట్‌మెంట్‌లు 2026 అక్టోబరు చివరి వరకు వాయిదా పడినట్లు సమాచారం.

ఈ పరిణామాల నేపథ్యంలో.. ప్రముఖ టెక్ దిగ్గజం గూగుల్ తన కొంతమంది ఉద్యోగులకు ముందస్తు హెచ్చరికలు జారీ చేసినట్లు తెలుస్తోంది. ముఖ్యంగా వర్క్ వీసాలపై అమెరికాలో పనిచేస్తున్న సిబ్బంది విదేశాలకు ప్రయాణించే ముందు పరిస్థితిని జాగ్రత్తగా అంచనా వేయాలని Google కంపెనీ సూచించింది. వీసా స్టాంపింగ్ ప్రక్రియలో అనిశ్చితి పెరిగినందున, అమెరికా వెలుపలికి వెళ్లిన తర్వాత తిరిగి ప్రవేశించడంలో తీవ్ర జాప్యాలు ఎదురయ్యే అవకాశం ఉందని గూగుల్ అంతర్గతంగా హెచ్చరించినట్లు నివేదికలు చెబుతున్నాయి.

బిజినెస్ ఇన్‌సైడర్ నివేదిక ప్రకారం.. గూగుల్‌లోని ఇమ్మిగ్రేషన్ న్యాయవాదులు ప్రస్తుతం అమెరికా రాయబార కార్యాలయాలు, కాన్సులేట్‌లలో నెలకొన్న పరిస్థితిపై తీవ్ర ఆందోళన వ్యక్తం చేస్తున్నారు. అనేక దేశాల్లో వీసా అపాయింట్‌మెంట్‌లు దొరకడం చాలా కష్టంగా మారింది. కొన్నిచోట్ల మూడు నుంచి ఆరు నెలలు మాత్రమే కాకుండా, దాదాపు ఒక సంవత్సరం వరకు వేచి ఉండాల్సిన పరిస్థితి నెలకొంది.

అమెరికాలో పనిచేస్తున్న చాలా మంది విదేశీ కార్మికులకు వీసా స్టాంపింగ్ తప్పనిసరి. వారు అమెరికా వెలుపలికి వెళ్లిన తర్వాత తిరిగి ప్రవేశించాలంటే తమ దేశంలోని అమెరికా రాయబార కార్యాలయం లేదా కాన్సులేట్‌లో వీసా స్టాంపింగ్ చేయించుకోవాలి. అయితే ప్రస్తుతం అపాయింట్‌మెంట్‌ల కొరత, ప్రాసెసింగ్ ఆలస్యాలు, పెరిగిన భద్రతా తనిఖీల కారణంగా ఈ ప్రక్రియ తీవ్రంగా ఆలస్యం అవుతోంది.

ఈ పరిస్థితుల్లో విదేశాలకు వెళ్లిన ఉద్యోగులు ఊహించని విధంగా నెలల తరబడి అమెరికా వెలుపలే ఉండిపోవాల్సి రావచ్చని గూగుల్ సిబ్బందిని హెచ్చరించింది. కుటుంబ కార్యక్రమాలు, పెళ్లిళ్లు, అంత్యక్రియలు లేదా ఇతర వ్యక్తిగత అత్యవసర పరిస్థితుల కోసం కూడా ప్రయాణించడం ఇప్పుడు అనిశ్చితితో నిండి ఉందని కంపెనీ అంతర్గతంగా సూచించినట్లు సమాచారం.

అమెరికా అధికారులు వీసా దరఖాస్తులపై గతంతో పోలిస్తే మరింత కఠినమైన పరిశీలన చేపడుతున్నారు. నేపథ్య తనిఖీలు, భద్రతా వెరిఫికేషన్ ప్రక్రియలు పెరగడంతో రాయబార కార్యాలయాల్లో పని భారం పెరిగింది. ఫలితంగా రోజుకు అందుబాటులో ఉండే అపాయింట్‌మెంట్‌ల సంఖ్య తగ్గిపోయి, పెండింగ్ దరఖాస్తులు భారీగా పేరుకుపోతున్నాయి.

ఈ ఆలస్యాల ప్రభావం ఉద్యోగుల వ్యక్తిగత, వృత్తిపరమైన జీవితాలపై తీవ్రంగా పడుతోంది. నెలల తరబడి విదేశాల్లో ఉండిపోతే, అమెరికాలోని ఉద్యోగ బాధ్యతలు నిర్వర్తించడం కష్టం అవుతుంది. ప్రతి ఉద్యోగానికి రిమోట్ వర్క్ అనుమతి ఉండదు. దీర్ఘకాలిక గైర్హాజరు ఉద్యోగ భద్రత, కెరీర్ వృద్ధి, వ్యక్తిగత జీవనంపై ప్రతికూల ప్రభావం చూపే అవకాశం ఉంది.

ఇది గూగుల్‌కు మాత్రమే పరిమితమైన సమస్య కాదు. అమెరికా టెక్ రంగంలో పనిచేస్తున్న వేలాది మంది విదేశీ ఉద్యోగులు ఇదే పరిస్థితిని ఎదుర్కొంటున్నారు. వీసా విధానంలో స్పష్టత, వేగవంతమైన ప్రాసెసింగ్ వచ్చే వరకు అనవసరమైన విదేశీ ప్రయాణాలను వాయిదా వేసుకోవడమే సురక్షితమని చాలా మంది నిర్ణయించుకుంటున్నారు. గూగుల్ ఇప్పటివరకు ఈ విషయంపై అధికారిక ప్రకటన విడుదల చేయలేదు. అయినప్పటికీ. కాని అమెరికాలో వీసాలపై పనిచేస్తున్న ఉద్యోగులు అత్యవసరం కాకపోతే విదేశాలకు వెళ్లవద్దని కంపెనీ పరోక్షంగా సూచిస్తోంది.