Layoffs News: మరోసారి గూగుల్‌లో లేఆఫ్స్‌ కలకలం.. వరుస ఫెయిల్యూర్స్‌తో కీలక నిర్ణయం

Google News: అంతర్జాతీయ టెక్ దిగ్గజం గూగుల్‌లో మరోసారి లేఆఫ్స్ కలకలం సృష్టించబోతున్నాయి. వీటి ప్రభావం ఎక్కువ మందిపై ఉండకపోయినా.. బూమింగ్ టెక్నాలజీకి సంబంధించిన ఇండస్ట్రీలో తగులుతున్న ఎదురుదెబ్బలు ఇందుకు కారణమని తెలుస్తోంది.

గూగుల్ తన ట్రస్ట్ మరియు సేఫ్టీ టీమ్ నుంచి కొంతమంది ఉద్యోగులకు ఉద్వాసన పలకనున్నట్లు బ్లూమ్‌బెర్గ్ నివేదించింది. తన ఉత్పాదక AI సాధనం జెమినిలో సమస్యలు తలెత్తుతుండటంతో మిగిలిన వారిని స్టాండ్‌బైలో ఉండమని చెప్పినట్లు పేర్కొంది. మొత్తం 250 మంది ఉద్యోగులు కలిగిన ఈ గ్రూప్‌ నుంచి పదుల సంఖ్యలో ఉద్వాసనలు ఉండవచ్చని అంచనా.

AI ఉత్పత్తుల నియమాలను తారుమారు చేసే సామర్థ్యం ఉన్న అవకాశాలను తగ్గిస్తూ, పలు అవసరమైన రూల్స్ సెటప్ చేసేందుకు ఈ టీమ్ బాధ్యత వహిస్తుంది. గూగుల్ గ్లోబల్ యూజర్ బేస్ వినియోగించే సాధనాలు సురక్షితంగా ఉన్నాయని నిర్ధారించడానికి పలు తనిఖీలను కూడా వీరు నిర్వహిస్తుంటారు.

జెమినిలో వరుసగా లోపాలు తలెత్తుతుండటంతో టూల్ ద్వారా మరిన్ని పొరపాట్లు జరగకుండా జాగ్రత్త వహించాలని గూగుల్ కొంతమంది ఉద్యోగులను కోరినట్లు నివేదిక పేర్కొంది. చారిత్రక చిత్రాలను రిట్రైవ్ చేయడంలో జెమిని ఫెయిల్ కావడంతో ఈ వ్యవహారంపై కంపెనీ లోతుగా పనిచేస్తోందని, కాబట్టి సిబ్బందిపై అధిక పనిభారం ఉన్నట్లు ఇటీవల కంపెనీ CEO సుందర్ పిచాయ్ కూడా అంగీకరించారు.