Google Pay: పోటీదారులను ఫాలో అవుతున్న గూగుల్‌ పే.. ఇకమీద రీఛార్జెస్‌పై బాదుడు షురూ..

Google Pay: అప్పట్లో దాదాపు అన్నిటెల్కోలు ఇన్ కమింగ్ సేవలను ఫ్రీగా అందించేవి. కాగా గతంలో ఇచ్చిన ఉచితాలకు ఆయా కంపెనీలు ఇటీవల మంగళం పాడాయి. ఇప్పుడు ఇదే పద్ధతిని టెక్ దిగ్గజం గూగుల్ సైతం అనుసరించనుంది. మొబైల్ రీఛార్జ్‌లపై రుసుము విధించడం ప్రారంభించబోతున్నట్లు తెలుస్తోంది.

మొబైల్ ప్రీపెయిడ్ ప్లాన్స్ రీఛార్జ్ చేసే వినియోగదారుల నుంచి రూ.3 వరకు సౌకర్య రుసుమును వసూలు చేయాలని గూగుల్ పే భావిస్తోంది. పేటీఎం, ఫోన్‌ పే వంటి ఇతర పేమెంట్ ప్లాట్‌ఫారమ్‌లు ఇప్పటికే ఈ ఛార్జీలు విధిస్తుండగా.. ఇప్పుడు గూగుల్ పే సైతం ఆ లిస్టులో చేరనుంది.

ప్రస్తుతం ఈ రుసుమును కేవలం మొబైల్ రీఛార్జ్‌లకు మాత్రమే పరిమితం చేయనున్నట్లు కనిపిస్తోంది. విద్యుత్ బిల్లులు, ఫాస్ట్‌ట్యాగ్ వంటి ఇతర లావాదేవీలకు దీన్ని వర్తింపచేయడం లేదు. అయితే 200 వరకు రీఛార్జ్ ప్లాన్‌లపై కన్వీనియన్స్ ఫీజు వసూలు చేసే అవకాశం లేదని మీడియా నివేదికలు స్పష్టం చేస్తున్నాయి.

రుసుములకు సంబంధించి గూగుల్ ఇంకా అధికారికంగా ప్రకటించలేదు. నవంబర్ 10న గూగుల్ పే సేవా తన నిబంధనలను అప్‌డేట్ చేసింది. ఇందులో 'గూగుల్ ఫీజ్' అనే కొత్త పదాన్ని ప్రవేశపెట్టినట్లు చెబుతున్నారు. ప్రస్తుతానికి రీఛార్జ్‌లపై సౌలభ్య రుసుము విధించబడకపోగా.. దశలవారీగా ఈ మార్పులు అమలు చేయాలని చూస్తున్నట్లు అర్థమవుతోంది.