MMTC-PAMPతో గూగుల్ పే భాగస్వామ్యం, బంగారం ఇలా కొనవచ్చు

టెక్ దిగ్గజం గూగుల్ తీసుకువచ్చిన గూగుల్ పే ద్వారా బంగారం కూడా కొనుగోలు చేయవచ్చు. తాజాగా నాలుగు రోజుల క్రితం MMTC-PAMP Indiaతో భాగస్వామ్యం కుదుర్చుకుంది. గూగుల్ పే ద్వారా యూజర్లు బంగారం కొనుగోలు చేయడం, విక్రయించడం చేయవచ్చు. ఈ సేవను ఇప్పటికే పేటీఎం, మొబిక్విక్, ఫోన్ పే వంటి వాటి ద్వారా ఇప్పటికే అందుబాటులో ఉంది.

దేశంలో గుర్తింపు పొందిన ఏకైక LBMA గుర్తింపు గోల్డ్ రిఫైనరీతో భాగస్వామ్యం ద్వారా గూగుల్ పే యూజర్లకు 99.99 శాతం 24 క్యారెట్ల బంగారం కొనుగోలు చేసుకోవచ్చునని గూగుల్ తెలిపింది.

భారతీయ సంస్కృతీ, సంప్రదాయాలలో బంగారం పాత్ర ఎంతో ఉంటుందని, ప్రపంచంలోనే రెండో అతిపెద్ద బంగారం వినియోగ దేశం భారత్ అని, అక్షయ తృతీయ, ధన్ తెరాస్ లేదా దీపావళి వంటి పండుగల రోజు బంగారాన్ని పెద్ద మొత్తంలో కొనుగోలు చేస్తారని ఇక నుంచి ఈ సాధనం ద్వారా ట్రాన్సాక్షన్ జరపవచ్చునని గూగుల్ పే ఇండియా డైరెక్టర్ ప్రోడక్ట్స్ మేనేజ్‌మెంట్ అంబరీష్ కెంఘే అన్నారు.

గూగుల్ పే యూజర్లు బంగారాన్ని ఎంత వ్యాల్యూకైనా కొనుగోలు చేయవచ్చు, అది యూజర్ తరఫున MMTC-PAMP స్టోర్ అవుతుందని పేర్కొన్నారు. యూజర్ బంగారాన్ని కొనుగోలు చేయవచ్చు లేదా విక్రయించవచ్చునని తెలిపారు. ఈ బంగారం ధర ఎప్పటికప్పుడు డిస్ ప్లే అవుతుందన్నారు.