గూగుల్ కొత్త షాక్! ఇకపై CAPTCHA కి బదులు QR స్కాన్! ఇదెలా పని చేస్తుందంటే..

ఇంటర్నెట్‌లో ఏదైనా వెబ్‌సైట్ ఓపెన్ చేసినప్పుడు "I am not a robot" అని బాక్స్‌ను క్లిక్ చేయడం లేదా ట్రాఫిక్ సిగ్నల్స్, సైకిళ్లను గుర్తించడం మనకు అలవాటే. దీనినే CAPTCHA అంటారు. అయితే, ఈ పద్ధతిని తీసేసి గూగుల్ త్వరలో QR Code వెరిఫికేషన్‌ను తీసుకురాబోతోంది. ఇది వినడానికి సులభంగా అనిపించినా, దీని వెనుక ఉన్న 'ప్రైవసీ' అంశం ఇప్పుడు టెక్ ప్రపంచంలో చర్చనీయాంశంగా మారింది.

ఏమిటీ కొత్త పద్ధతి?

ప్రస్తుత సమాచారం ప్రకారం, గూగుల్ తన తదుపరి తరం reCAPTCHA వ్యవస్థను సిద్ధం చేస్తోంది. ఇకపై మీరు వెబ్‌సైట్‌ను విజిట్ చేసినప్పుడు ఇమేజ్‌లను గుర్తించే బదులు, స్క్రీన్‌పై కనిపించే ఒక QR Code ను మీ ఫోన్ ద్వారా స్కాన్ చేయాల్సి ఉంటుంది.

• లింక్: ఈ స్కాన్ చేసిన వెంటనే మీ ఫోన్‌లోని 'గూగుల్ ప్లే సర్వీసెస్' (Google Play Services) తో ఆ వెబ్‌సైట్ అనుసంధానించబడుతుంది.
• నిర్ధారణ: మీ ఫోన్ డేటా ఆధారంగా మీరు మనిషేనని గూగుల్ నిర్ధారిస్తుంది.

ప్రైవసీ విషయంలో ఆందోళనలు

ఈ కొత్త విధానం వల్ల యూజర్ల ప్రైవసీ దెబ్బతినే అవకాశం ఉందని నిపుణులు హెచ్చరిస్తున్నారు:

1. ట్రాకింగ్: మీరు బ్రౌజర్‌లో సైన్-ఇన్ అవ్వకపోయినా, ఈ QR Code స్కాన్ చేయడం వల్ల మీరు ఏ వెబ్‌సైట్ విజిట్ చేస్తున్నారు, ఎంతసేపు ఉంటున్నారు అనే వివరాలు గూగుల్‌కు తెలిసిపోతాయి.
2. ‌ఫోన్ డేటా: ఆండ్రాయిడ్ ఫోన్లలో గూగుల్ ప్లే సర్వీసెస్ ద్వారా గూగుల్ మీ ఫోన్‌ను , మీ వెబ్ యాక్టివిటీని నేరుగా లింక్ చేస్తుంది.
3. iPhone యూజర్లు: ఐఫోన్ వాడేవారు ఈ వెరిఫికేషన్ పూర్తి చేయాలంటే ప్రత్యేకంగా 'reCAPTCHA యాప్' డౌన్‌లోడ్ చేసుకోవాల్సి ఉంటుంది.

డీ-గూగుల్డ్ (De-Googled) ఫోన్లకు ముప్పు?

గూగుల్ యాప్స్ , సర్వీసెస్ లేని కస్టమ్ రోమ్స్ (ఉదాహరణకు GrapheneOS) వాడేవారికి ఇది పెద్ద సమస్యగా మారనుంది. గూగుల్ ప్లే సర్వీసెస్ లేకపోతే ఈ QR Code వెరిఫికేషన్ ఫెయిల్ అయ్యే అవకాశం ఉంది. అంటే, గూగుల్ సర్వీసెస్ వాడని వారు కొన్ని లక్షల వెబ్‌సైట్లను యాక్సెస్ చేయలేకపోవచ్చు. ప్రపంచవ్యాప్తంగా సుమారు 53 లక్షల కంపెనీలు గూగుల్ reCAPTCHA ను వాడుతున్నాయి.

ఎప్పటి నుంచి అమల్లోకి వస్తుంది?

గూగుల్ ఈ విధానంపై గత అక్టోబర్ 2025 నుంచే కసరత్తు చేస్తోంది. గూగుల్ సపోర్ట్ పేజీ ప్రకారం, ఆండ్రాయిడ్ ఫోన్లలో దీని కోసం ప్లే సర్వీసెస్ వర్షన్ 25.41.30 లేదా అంతకంటే ఎక్కువ ఉండాలి. అయితే గూగుల్ దీనిపై ఇంకా అధికారిక ప్రకటన చేయలేదు.

ట్రాఫిక్ లైట్లు, బస్సులను గుర్తించే విసుగు తగ్గుతుంది అనుకుంటే, గూగుల్ ఇప్పుడు మన ఫోన్‌ను నేరుగా వెబ్‌సైట్లతో లింక్ చేయాలని చూస్తోంది. భద్రత కోసం చేసే ఈ ప్రయత్నం యూజర్ల వ్యక్తిగత సమాచారాన్ని గూగుల్ చేతుల్లో పెట్టడమేనని నెటిజన్లు విమర్శిస్తున్నారు. ఒకవేళ ఈ QR Code విధానం అమల్లోకి వస్తే, ఇంటర్నెట్ బ్రౌజింగ్ అనుభవం పూర్తిగా మారిపోనుంది.