Google Pixel 5a 5G: స్మార్ట్‌ఫోన్ ప్రియులకు ఓ గుడ్‌న్యూస్..ఓ బ్యాడ్‌ న్యూస్

ముంబై: ప్రముఖ సెర్చ్ ఇంజిన్ గూగుల్.. స్మార్ట్‌ఫోన్ల తయారీ రంగంలోకి అడుగు పెట్టబోతోంది. పిక్సెల్ 5ఎ 5జీ (Pixel 5a 5G) పేరుతో హ్యాండ్‌సెట్‌ను తయారు చేయనుంది. ఈ స్మార్ట్‌ఫోన్ల తయారీని గూగుల్ నిలిపివేసిందనే వార్తలు తెగ చక్కర్లు కొట్టాయి. దీనితో కొంత గందరగోళ పరిస్థితులు నెలకొన్నాయి. ఈ వార్తలకు గూగుల్ యాజమాన్యం పుల్‌స్టాప్ పెట్టింది. ఈ స్మార్ట్‌ఫోన్లను తాము తయారు చేస్తున్నామని గూగుల్ అనుబంధ సంస్థ 9 టు 5 గూగుల్ (9to5Google) వెల్లడించింది.

ఈ మేరకు ఆ సంస్థ అధికార ప్రతినిధి ఓ ప్రకటన విడుదల చేసింది. ఈ ఏడాదే ఈ ఫోన్‌ను మార్కెట్‌లోకి సైతం అందుబాటులోకి తీసుకొస్తామని స్పష్టం చేశారు. అదే సమయంలో భారతీయ మార్కెట్‌లో ఈ స్మార్ట్‌ఫోన్‌ను ప్రవేశపెట్టడంలో మరింత జాప్యం ఏర్పడుతుందని స్పష్టం చేశారు. అంతర్జాతీయ మార్కెట్‌లో పిక్సెల్ 5ఎ 5జీ స్మార్ట్‌ఫోన్ ఈ ఏడాదిలోనే అందుబాటులోకి వచ్చినప్పటికీ.. మనదేశంలో మాత్రం ఇప్పుడప్పుడే అది ప్రత్యక్షం కాదు. వచ్చే ఏడాదే అది మనదేశ మార్కెట్‌లో ఎంట్రీ ఇస్తుంది.

గూగుల్ పిక్సెల్ 5ఎ 5జీ స్మార్ట్‌ఫోన్ ప్రాజెక్ట్ రద్దు కాలేదని 9 టు 5 గూగుల్ సంస్థ అధికార ప్రతినిది స్పష్టం చేశారు. ఈ ఏడాదిలోనే అమెరికా, జపాన్‌లల్లో దాన్ని లాంచ్ చేస్తామని తెలిపారు. మరిన్ని దేశాలు పైప్‌లైన్‌లో ఉన్నాయని పేర్కొన్నారు. గూగుల్ అభివృద్ధి చేసిన పిక్సెల్ 4ఎ స్మార్ట్‌ఫోన్ గత ఏడాది ఆగస్టులో అంతర్జాతీయ మార్కెట్‌లో విడుదలైంది. ఈ ఏడాది ఆగస్టులోనే పిక్సెల్ 5ఏ 5జీ కూడా ఆవిష్కరించే అవకాశాలు లేకపోలేదని భావిస్తున్నారు.

చిప్‌ల కొరత వల్ల పిక్సెల్ 5ఎ 5జీ స్మార్ట్‌ఫోన్ల తయారీని గూగుల్ నిలిపివేసిందంటూ మొదట్లో వార్తలొచ్చినప్పటికీ.. తాజాగా ఇచ్చిన వివరణతో అది వాస్తవం కాదని తేలిపోయినట్టయింది. కాకపోతే- ఈ స్మార్ట్‌ఫోన్ మనదేశంలో అడుగు పెట్టడానికి చాలా సమయం పట్టే అవకాశాలు లేకపోలేదు.వెస్టర్న్ కంట్రీస్‌లో అమెరికా, ఆసియన్ దేశాల్లో జపాన్‌ను మాత్రమే ఈ స్మార్ట్‌ఫోన్‌ను లాంచ్ చేయడానికి ఎంచుకుందా సంస్థ. అక్కడి డిమాండ్‌కు అనుగుణంగా ప్రొడక్ట్‌ను చేపట్టిన తరువాతే భారత్‌లో దాన్ని విడుదల చేయొచ్చు.