Bengaluru: పల్లెటూరి నుంచి గూగుల్ వరకు.. తండ్రిని ఆఫీసుకు తీసుకెళ్లిన కొడుకు, నెటిజన్ల ఫిదా!

ప్రతి బిడ్డ తన జీవితంలో సాధించే అతిపెద్ద విజయం ఏదైనా ఉందంటే.. అది తన తల్లిదండ్రుల కళ్లలో కనిపించే గర్వం. తాజాగా బెంగళూరు (Bengaluru) లోని గూగుల్ ఆఫీసులో పనిచేస్తున్న ఒక సాఫ్ట్‌వేర్ ఇంజనీర్ తన తండ్రికి ఆఫీస్ చూపిస్తూ చేసిన వీడియో ఇప్పుడు సోషల్ మీడియాలో అందరి హృదయాలను గెలుచుకుంటోంది. ఒక సామాన్య మధ్యతరగతి కుటుంబం నుంచి వచ్చి, ప్రపంచంలోనే అతిపెద్ద టెక్ దిగ్గజం గూగుల్‌లో ఉద్యోగం సంపాదించడం ఆ తండ్రికి ఎంతటి ఆనందాన్ని ఇచ్చిందో ఆ వీడియోలో స్పష్టంగా కనిపిస్తోంది.

పల్లెటూరి నుంచి గూగుల్ అనంత వరకు..

వినీత్ శర్మ బుద్దారపు అనే యువకుడు బెంగళూరు (Bengaluru)లోని గూగుల్ ఆఫీసులో సాఫ్ట్‌వేర్ ఇంజనీర్‌గా పనిచేస్తున్నాడు. ఇటీవల తన తండ్రిని (నాన్నను) మొదటిసారి తను పనిచేసే ఆఫీసుకి తీసుకెళ్లాడు. ఆ అనుభవాన్ని వినీత్ తన ఇన్‌స్టాగ్రామ్ ఖాతాలో పంచుకుంటూ, "మాది ఒక చిన్న గ్రామం, నాన్నకు ఇది మొదటి కార్పొరేట్ ఆఫీస్ విజిట్. ఆఫీసులో ఉన్న ప్రతి విషయాన్ని చూసి ఆయన ఎంతో ఆశ్చర్యపోయారు. ఇది నాకూ, నాన్నకు చాలా ఎమోషనల్ మూమెంట్" అని రాసుకొచ్చాడు.

ఆఫీసు సౌకర్యాలు చూసి ఆశ్చర్యం

గూగుల్ ఆఫీసు అంటే కేవలం పని చేసే చోటు మాత్రమే కాదు, అక్కడ ఉండే కేఫెటేరియా, గార్డెన్స్, ఆర్కేడ్ గేమ్స్ వంటి సౌకర్యాలు చూసి ఆ తండ్రి ఆశ్చర్యపోయారు. తన కొడుకు ఇంతటి గొప్ప వాతావరణంలో పనిచేస్తున్నాడని తెలిసి ఆయన కళ్లలో గర్వం తొణికిసలాడింది. ఇద్దరూ కలిసి కాఫీ తాగుతూ ముచ్చటించుకున్నారు, మంచి భోజనం చేశారు , ఆర్కేడ్ గేమ్స్ కూడా ఆడారు. "నాన్న ఇంత సంతోషంగా ఉండటం నేను ఎప్పుడూ చూడలేదు. నేను ఇక్కడ ఉద్యోగం సంపాదించడానికి పడ్డ కష్టానికి ప్రతిఫలం దక్కిందని ఆయన అర్థం చేసుకున్నారు" అని వినీత్ పేర్కొన్నాడు.

అద్భుతమైన గూగుల్ క్యాంపస్

వినీత్ పనిచేస్తున్న బెంగళూరు గూగుల్ ఆఫీస్.. 2025 ఫిబ్రవరిలో ప్రారంభించబడింది. దాదాపు 1.6 మిలియన్ చదరపు అడుగుల విస్తీర్ణంలో ఉన్న ఈ క్యాంపస్ ఒక వింత ప్రపంచంలా ఉంటుంది. ఇందులో 'అరణ్య' అనే చిన్న అడవిని కూడా సృష్టించారు, ఇది శబ్దాన్ని లోపలికి రాకుండా అడ్డుకుంటుంది. బెంగళూరు నగరంలోని పచ్చదనాన్ని ప్రతిబింబించేలా ఈ ఆఫీసును తీర్చిదిద్దారు. ప్రతి ఫ్లోర్‌లో టీమ్స్ కోసం ప్రత్యేక 'నెబర్‌హుడ్స్' , అందరూ కలిసి సమావేశమయ్యేందుకు 'సభ' అనే యాంఫీథియేటర్ కూడా ఉన్నాయి.

నెటిజన్ల ప్రశంసలు

ఈ వీడియో వైరల్ కావడంతో నెటిజన్లు వినీత్‌పై ప్రశంసల వర్షం కురిపిస్తున్నారు. "ప్రతి తల్లిదండ్రులు గర్వపడే క్షణం ఇది", "నా జీవితంలో కూడా నా తండ్రికి ఇలాంటి సంతోషాన్ని ఇవ్వడమే నా కల" అంటూ చాలా మంది కామెంట్స్ చేస్తున్నారు. తండ్రి పడ్డ కష్టాన్ని గుర్తించి.. ఆయనకు ఆ గౌరవాన్ని అందించిన వినీత్ నిజంగా అందరికీ స్ఫూర్తిగా నిలిచాడు.

కన్నవారి కల నిజమైన వేళ

జీవితంలో ఎంత ఎత్తుకు ఎదిగినా.. మన ఎదుగుదలకు కారణమైన తల్లిదండ్రులను గౌరవించడం అత్యంత ముఖ్యం. బెంగళూరులోని ఈ ఐటీ నిపుణుడు చేసిన చిన్న ప్రయత్నం.. ఎంతో మంది యువతకు తమ తల్లిదండ్రుల పట్ల ఉండాల్సిన బాధ్యతను గుర్తుచేస్తోంది. ఒక గ్రామం నుంచి వచ్చి ప్రపంచ స్థాయి కంపెనీలో స్థానం సంపాదించడమే కాకుండా, ఆ విజయాన్ని కన్నవారితో పంచుకోవడం నిజమైన సాఫల్యం. ఈ ఎమోషనల్ జర్నీ ప్రతి ఒక్కరినీ ఆలోచింపజేస్తోంది.