హెల్త్ ఇన్స్యూరెన్స్ యూజర్లకు గుడ్‌న్యూస్.. క్లెయిమ్ కోసం 24 గంటలు ఆస్పత్రిలో ఉండక్కర్లే..!

Helath Insurance: ప్రజల్లో పెరుగుతున్న ఆర్థిక అక్షరాస్యత, తడిసి మోపెడవుతున్న వైద్య ఖర్చులు వెరసి.. ఆరోగ్య బీమా తీసుకునే వారి సంఖ్య ఏటా పెరుగుతూ వస్తోంది. అయితే దాని నుంచి ప్రతిఫలం పొందాలంటే బీమా కంపెనీలు సవాలక్ష కొర్రీలు పెడుతుంటాయి. వాటిలో ముఖ్యమైనది 24 గంటల హాస్పిటలైజేషన్. దీనిపై వినియోగదారుల ఫోరం కీలక తీర్పు ఇచ్చింది.

ఆరోగ్య బీమా పాలసీ ప్రయోజనాలు పొందాలంటే ఇన్స్యూరెన్స్ చేయబడిన వ్యక్తులు కొన్ని నియమాలను తప్పనిసరిగా పాటించాల్సి ఉంటుంది. వాటిలో ఒకటి 24 గంటలపాటు హాస్పిటల్ లో ఉండాల్సి రావడం. అయితే దీనివల్ల పలువురు బీమా మొత్తాన్ని అందుకునేందుకు తరచూ సమస్యలు ఎదుర్కొంటున్నారు. దీన్ని గమనించిన కన్స్యూమర్ కోర్టు కీలక తీర్పు ఇచ్చింది.

మెడికల్ ఇన్స్యూరెన్స్ క్లెయిమ్ కి అర్హత సాధించాలంటే 24 గంటల పాటు ఆస్పత్రిలోై ఉండాల్సిన అవసరం లేదని వడోదరలోని కన్స్యూమర్ కోర్టు స్పష్టం చేసింది. ఇన్స్యూరెన్స్ రెగ్యులేటరీ అండ్ డెవలప్‌మెంట్ అథారిటీ ఆఫ్ ఇండియా కూడా ఈ వ్యవహారంలో ప్రత్యేక నిబంధనలు అమలుచేస్తోంది. 24 గంటలు ఆస్పత్రిలో ఉండకుండానే.. డే-కేర్ కింద పొందిన వైద్య సేవలకు బీమా క్లెయిమ్ చేసుకోవచ్చని తెలిపింది.

24 గంటల్లోపు పూర్తిచేసే ఆపరేషన్స్ విషయంలో ఈ నిబంధన వర్తించదని IRDAI తెలిపింది. అనస్థీషియా వినియోగించే ఏ వైద్య సేవలైనా ఓ రోజు ఆస్పత్రిలో ఉండకుండానే క్లెయిమ్ తీసుకోవచ్చని వెల్లడించింది. అయితే కన్సల్టేషన్ ఫీజు, ఇతర పరీక్షల ఖర్చులను డే-కేర్ ట్రీట్‌మెంట్ కింద పొందడం కుదరదని వినియోగదారులు గమనించాల్సి ఉంటుంది.