Hyderabad: అమీర్‌పేట్ మెట్రో స్టేషన్లో గోల్డ్ ఏటీఎం.. కొనేవాళ్లతో కిటకిట.. పూర్తి వివరాలు

Ameerpet Metro: హైదరాబాద్ నగరంలో గోల్డ్ ఏటీఎంల సంఖ్య నానాటికీ పెరుగుతోంది. కొనుగోలుదారుల నుంచి వస్తున్న ఆసక్తితో గోల్డ్ సిక్కా లిమిటెడ్ మరిన్ని ఏర్పాటుతో ముందుకు సాగుతోంది.

తాజాగా గోల్డ్‌సిక్కా లిమిటెడ్‌ అమీర్‌పేట మెట్రో స్టేషన్‌లో వినూత్నమైన గోల్డ్ ఏటీఎం రెండో వెర్షన్‌ను ప్రారంభించింది. ప్రయాణికుల రద్దీ ఎక్కువగా ఉండే జంక్షన్ మెట్రో స్టేషన్ కావటంతో ఈ గోల్డ్ ఏటీఎం పసిడి ప్రియులను ఆకర్షిస్తోంది.

వినియోగదారులు తాజాగా మెట్రో స్టేషన్లో ఏర్పాటు చేసిన గోల్డ్ ఏటీఎం ద్వారా 0.5 నుంచి 20 గ్రాముల వరకు బంగారు నాణేలను కొనుగోలు చేసేందుకు వెసులుబాటు ఉంది. అలాగే ఇందులో 10 నుంచి 100 గ్రాముల వరకు వెండి నాణేలను సైతం షాపింగ్ చేయెుచ్చని కంపెనీ అధికారి వెల్లడించారు. ATM LBMA నుంచి లైవ్ రేట్లను కూడా క్యాప్చర్ చేస్తుంది. కస్టమర్‌లు అత్యంత తాజా ధరలకు యాక్సెస్‌ను కలిగి ఉండేలా చూస్తుందని చెప్పారు.

కంపెనీ డెబిట్, క్రెడిట్ కార్డ్‌లతో పాటు UPIని ఉపయోగించి గోల్డ్ సిల్వర్ కాయిన్స్ కొనుగోలు చేసేందుకు సౌకర్యాన్ని కస్టమర్‌లకు పరిచయం చేసింది. గోల్డ్‌సిక్కా లిమిటెడ్ సీఈవో Sy Taruj, బంగారు ATM నూతన వెర్షన్ ప్రారంభ వెర్షన్ కంటే కొత్త ఫీచర్లతో అభివృద్ధి చేయబడిందని పేర్కొన్నారు. గతంలో ఏటీఎం నుంచి కేవలం గోల్డ్ కాయిన్స్ మాత్రమే పొందేందుకు వీలు ఉన్న విషయం మనకు తెలిసిందే. దీంతో హైదరాబాద్ నగరంలో రెండో గోల్డ్ ఏటీఎం ఏర్పాటు జరగటంపై అటు కంపెనీ, ఇటు పసిడి ప్రియులు సంతోషం వ్యక్తం చేస్తున్నారు.