Click it and Unblock the Notifications
బంగారం ధరలు భారీగా పతనం కాబోతున్నాయి.. అప్పటి వరకు కొనడం బంద్ చేయమంటున్న గోల్డ్మన్ సాచ్స్..
అమెరికా ఫెడరల్ రిజర్వ్ వడ్డీ రేట్ల విషయంలో అనుసరిస్తున్న కఠిన వైఖరి, ఆర్థిక పరిస్థితుల నేపథ్యంలో, గోల్డ్మన్ సాచ్స్ తన బంగారం ధర అంచనాలను గణనీయంగా తగ్గించింది. గతంలో ఔన్సుకు $5,400గా ఉన్న తన సంవత్సరాంతపు అంచనాను $4,900కు సవరించింది. వాల్ స్ట్రీట్లో అత్యంత సానుకూల దృక్పథం కలిగిన సంస్థలలో ఒకటిగా పేరున్న గోల్డ్మన్ సాచ్స్, ఇప్పుడు Gold విషయంలో కొంత జాగ్రత్తగా వ్యవహరిస్తోంది. గతంలో "బంగారం వైపు వెళ్ళండి" అని పెట్టుబడిదారులకు సూచించిన ఈ బ్యాంకు, ఇప్పుడు మాత్రం ఆ ర్యాలీ చాలా నిదానంగా ఉంటుందని భావిస్తోంది.
గోల్డ్మన్ సాచ్స్ తన రేటింగ్ను తగ్గించడానికి ప్రధానంగా రెండు కారణాలను పేర్కొంది. మొదటిది ఏంటంటే 2026లో ఫెడరల్ రిజర్వ్ వడ్డీ రేట్లను తగ్గిస్తుందన్న అంచనాలను బ్యాంకు ఉపసంహరించుకుంది. ఫెడ్ రేట్ల కోతలను జూన్, డిసెంబర్ 2027కి వాయిదా వేయడంతో, ఇది బంగారం వంటి రాబడినివ్వని ఆస్తులపై ప్రభావం చూపుతోంది. రెండో కారణం ఏమిటంటే.. వడ్డీ రేట్ల తగ్గింపు ఆలస్యం కావడంతో, బంగారం ఆధారిత ఎక్స్ఛేంజ్-ట్రేడెడ్ ఫండ్లలోకి (ETFs) పెట్టుబడుల ప్రవాహం తగ్గడం. అంతేకాకుండా, కొత్త ఫెడ్ ఛైర్మన్ కెవిన్ వార్ష్ ధరల స్థిరత్వానికి ప్రాధాన్యతనిస్తూ, అవసరమైతే వడ్డీ రేట్లను తగ్గించడం కాకుండా పెంచే అవకాశాన్ని కూడా సూచించడం మార్కెట్లో అనిశ్చితిని పెంచింది.
ఇరాన్-అమెరికా-ఇజ్రాయెల్ మధ్య ఉద్రిక్తతలు, ముఖ్యంగా హార్ముజ్ జలసంధి సమస్య చమురు ధరలు, ద్రవ్యోల్బణ భయాలను పెంచడంతో గత ఫిబ్రవరి చివరి నుండి Gold ధరలు దాదాపు 20% పడిపోయాయి. అయితే, అమెరికా-ఇరాన్ మధ్య 60 రోజుల్లోగా శాంతి ఒప్పందానికి అంగీకారం కుదిరిందన్న వార్తలతో చమురు ధరలు తగ్గి, బంగారం ధర తిరిగి పుంజుకుంది. సోమవారం నాటికి ఔన్సు బంగారం ధర $4,200 వైపు కదిలింది. జూన్ 25న విడుదల కానున్న అమెరికా 'కోర్ PCE' (ద్రవ్యోల్బణ కొలమానం) ఫలితాలు బంగారం తదుపరి దిశను నిర్దేశించనున్నాయని ఆగ్మాంట్ రీసెర్చ్ హెడ్ డాక్టర్ రెనిషా చైనానీ అభిప్రాయపడ్డారు.
ఫెడరల్ రిజర్వ్ విధానకర్తలలో మెజారిటీ సభ్యులు (19 మందిలో 9 మంది) ఈ సంవత్సరం కనీసం ఒక రేటు పెంపును అంచనా వేస్తున్నారు. ఒకవేళ ఫెడ్ రేట్లను పెంచితే, బంగారం ధర సంవత్సరాంతానికి $4,400కు కూడా పడిపోయే ప్రమాదం ఉందని విశ్లేషకులు హెచ్చరిస్తున్నారు. అయితే, బ్యాంకులన్నింటినీ గోల్డ్మన్ సాచ్స్ లాగే ఆలోచించడం లేదు. జేపీ మోర్గాన్ గ్లోబల్ రీసెర్చ్ బంగారంపై అత్యంత ఆశాజనకంగా ఉంది. 2026 చివరి నాటికి బంగారం ఔన్సుకు సగటున $6,000, 2027 చివరి నాటికి $6,300కు చేరుకుంటుందని వారు అంచనా వేస్తున్నారు.
ప్రస్తుత కఠిన పరిస్థితులు ఉన్నప్పటికీ.. బంగారానికి కొన్ని సానుకూల అంశాలు మద్దతునిస్తూనే ఉన్నాయి. సెంట్రల్ బ్యాంకుల కొనుగోళ్లు నిరంతరాయంగా కొనసాగుతున్నాయి. వరల్డ్ గోల్డ్ కౌన్సిల్ నివేదికల ప్రకారం.. 2026 మొదటి త్రైమాసికంలో సెంట్రల్ బ్యాంకులు 244 టన్నుల బంగారాన్ని కొనుగోలు చేశాయి (గత త్రైమాసికంలో ఇది 208 టన్నులు). ఈ నిరంతర కొనుగోళ్లు ధరలకు ఒక కనీస మద్దతును (Floor support) అందిస్తున్నాయి. మొత్తంగా చూస్తే, గోల్డ్మన్ సాచ్స్ వంటి సంస్థలు అంచనాలను తగ్గిస్తున్నప్పటికీ, బంగారం విషయంలో పెట్టుబడిదారులు రెండు విభిన్న దృక్పథాలను బేరీజు వేసుకోవాల్సిన అవసరం ఉందని ఈ తాజా పరిణామాలు స్పష్టం చేస్తున్నాయి.
డిస్క్లైమర్: ఈ వెబ్సైట్లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్సైట్లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.
Sign in with Google