Gold ETF: వెండి ధరకు రెక్కలు.. కేజీ రూ. 3 లక్షలకు చేరువలో! గోల్డ్ ఈటీఎఫ్ లలో కూడా భారీ లాభాలు!

మే 13న భారతీయ కమొడిటీ మార్కెట్లో మునుపెన్నడూ చూడని వింత చోటుచేసుకుంది. అటు అంతర్జాతీయ మార్కెట్ ప్రభావం, ఇటు దేశీయంగా పెరిగిన సుంకాల నేపథ్యంలో బంగారం , వెండి ధరలు ఆకాశాన్ని తాకాయి. మల్టీ కమొడిటీ ఎక్స్ఛేంజ్ (MCX)లో పసిడి ధర ఏకంగా 6 శాతం పెరిగి, 10 గ్రాముల బంగారం రూ. 1,62,733 కు చేరుకుంది. కేవలం బంగారం మాత్రమే కాదు, వెండి కూడా కేజీకి రూ. 2,96,700 వద్ద ట్రేడ్ అవుతూ రూ. 3 లక్షల మైలురాయికి చేరువలో ఉంది.

గోల్డ్ ఈటీఎఫ్ (Gold ETF)లలో భారీ ర్యాలీ

బంగారం ధరలు భారీగా పెరగడంతో, పేపర్ గోల్డ్ లేదా డిజిటల్ గోల్డ్ రూపంలో పెట్టుబడి పెట్టే గోల్డ్ ఈటీఎఫ్ (Gold ETF) లు కూడా పండగ చేసుకుంటున్నాయి. ఫిజికల్ గోల్డ్ కొనలేని వారు ఈటీఎఫ్ ల వైపు మొగ్గు చూపడంతో వీటి వాల్యూ ఒక్కసారిగా పెరిగింది. ప్రధానంగా నిప్పాన్ ఇండియా గోల్డ్ బీస్ (Nippon India ETF Gold BeES) 5.69 శాతం లాభపడగా, ఐసీఐసీఐ ప్రుడెన్షియల్ గోల్డ్ ఈటీఎఫ్ 5.74 శాతం మేర పెరిగింది. టాటా, హెచ్‌డీఎఫ్‌సీ, ఎస్‌బీఐ వంటి దిగ్గజ సంస్థల గోల్డ్ ఈటీఎఫ్ లు కూడా 5 శాతం కంటే ఎక్కువ లాభాలను ఇన్వెస్టర్లకు తెచ్చిపెట్టాయి. ఆక్సిస్ గోల్డ్ ఈటీఎఫ్ ఏకంగా 5.95 శాతంతో టాప్ పర్ఫార్మర్‌గా నిలిచింది.

వెండి ఈటీఎఫ్ ల జోరు

బంగారంతో పోటీ పడుతూ వెండి ఈటీఎఫ్ లు కూడా దూసుకుపోయాయి. టాటా సిల్వర్ ఈటీఎఫ్, నిప్పాన్ ఇండియా సిల్వర్ ఈటీఎఫ్ లు 5.4 శాతం పైగా పెరిగాయి. యూటీఐ , డీఎస్‌పీ సిల్వర్ ఈటీఎఫ్ లు కూడా 5.6 శాతం మేర లాభాలను నమోదు చేశాయి. వెండి పారిశ్రామిక అవసరాలు , పెట్టుబడి సాధనంగా ఉండటంతో, ఇన్వెస్టర్లు వెండి ఈటీఎఫ్ లపై కూడా భారీగా ఆశలు పెట్టుకున్నారు.

ఇతర లోహాల పరిస్థితి

కేవలం పసిడి, వెండి మాత్రమే కాదు.. ఇతర లోహాల ధరలు కూడా స్వల్పంగా పెరిగాయి. కాపర్ మే ఫ్యూచర్స్ కిలో రూ. 1,403 వద్ద (0.98% పెంపు), జింక్ రూ. 363 వద్ద ట్రేడ్ అవుతున్నాయి. ఎంసీఎక్స్ బేస్ మెటల్ ఇండెక్స్ కూడా లాభాల్లోనే కొనసాగుతోంది. అంతర్జాతీయంగా చూస్తే, కోమెక్స్ (Comex) మార్కెట్లో కూడా బంగారం , వెండి ధరలు సానుకూలంగానే ట్రేడ్ అవుతున్నాయి.

ఇన్వెస్టర్లు ఏమనుకుంటున్నారు?

ధరలు ఈ స్థాయిలో పెరగడం చూసి కొత్తగా కొనేవారు కొంత ఆందోళన చెందుతున్నప్పటికీ, ఇప్పటికే గోల్డ్ ఈటీఎఫ్ (Gold ETF) లలో పెట్టుబడి పెట్టిన వారికి మాత్రం కాసుల వర్షం కురుస్తోంది. ప్రస్తుత పరిస్థితుల్లో నేరుగా బంగారం కొని దాచుకోవడం కంటే, ఇలాంటి ఈటీఎఫ్ ల ద్వారా పెట్టుబడి పెట్టడమే సురక్షితమని నిపుణులు అభిప్రాయపడుతున్నారు. ఎందుకంటే ఇందులో స్టోరేజ్ సమస్యలు ఉండవు , ఎప్పుడు కావాలంటే అప్పుడు మార్కెట్ ధర ప్రకారం అమ్ముకునే సౌలభ్యం ఉంటుంది.

బంగారం ధర రూ. 1.62 లక్షలు దాటడం అనేది భారత ఆర్థిక చరిత్రలో ఒక మైలురాయి. మార్కెట్ ఒడిదుడుకుల దృష్ట్యా సురక్షితమైన పెట్టుబడిగా భావించే పసిడికి ఉన్న డిమాండ్ మరోసారి నిరూపితమైంది. అయితే, ఇంతటి భారీ ధరల వద్ద కొత్తగా పెట్టుబడులు పెట్టేటప్పుడు మార్కెట్ విశ్లేషణను గమనించడం అవసరం. డిజిటల్ గోల్డ్ రూపంలో ఉండే గోల్డ్ ఈటీఎఫ్ (Gold ETF) లు ప్రస్తుతం ఇన్వెస్టర్లకు బెస్ట్ ఆప్షన్‌గా నిలుస్తున్నాయి. పసిడి ప్రియులకు ఇది ఒక విధంగా షాక్ కలిగించే వార్తే అయినా, ఇన్వెస్టర్లకు మాత్రం ఇది తీపి కబురే!