బంగారం, వెండి ధరలు భారీగా పతనం.. 90 నిమిషాల్లో రూ. 41.76 లక్షల కోట్లు నష్టం.. అసలేం జరిగింది..

Gold Silver Price Crash: గ్లోబల్ ఫైనాన్షియల్ మార్కెట్లలో చోటుచేసుకున్న ఊహించని పరిణామాలు అంతర్జాతీయంగా ట్రేడర్లను, పెట్టుబడిదారులను తీవ్ర భయాందోళనకు గురిచేశాయి. అక్టోబర్ 1వ తేదీ రాత్రి అంతర్జాతీయ కమోడిటీ మార్కెట్‌లో Gold, వెండి ధరలు హఠాత్తుగా కుప్పకూలాయి. రాత్రి 8:00 గంటల సమయంలో ఔన్సుకు $4,212 వద్ద స్థిరంగా కనిపించిన స్పాట్ గోల్డ్ ధర, తదుపరి 90 నిమిషాల్లోనే అంటే రాత్రి 9:08 గంటల నాటికి $4,166 స్థాయికి పడిపోయింది.

కేవలం ఒకటిన్నర గంటల వ్యవధిలోనే ఔన్సుకు ఏకంగా $46 మేర ధర తగ్గడంతో ట్రేడింగ్ చార్టుల్లో వరుసగా ఎర్రటి క్యాండిల్స్ దర్శనమిచ్చాయి. ఒక నిర్దిష్ట కాలంలో ప్రారంభమైన ధర కంటే చాలా తక్కువ స్థాయిలో ట్రేడింగ్ ముగిసినప్పుడు ఇటువంటి ఎరుపు రంగు క్యాండిల్స్ ఏర్పడతాయి. ఈ హఠాత్తు పతనం కారణంగా Gold మార్కెట్ విలువ రూ. 36,28,800 కోట్లు, వెండి విపణి విలువ రూ. 5,47,200 కోట్లు చొప్పున క్షీణించి, మొత్తంమీద రూ. 41,76,000 కోట్ల భారీ మార్కెట్ క్యాపిటలైజేషన్ క్షీణత నమోదైంది.

అయితే ఈ పతనం వల్ల ప్రజల బ్యాంక్ ఖాతాల నుంచి నగదు మాయమైందనిగానీ లేదా విపరీతమైన నిజమైన నష్టాలు జరిగాయనిగానీ భావించాల్సిన అవసరం లేదని ఆర్థిక విశ్లేషకులు స్పష్టం చేస్తున్నారు. ఇది కేవలం మార్కెట్ అంచనాల ఆధారంగా క్షీణించిన కాగితపు విలువ మాత్రమే. ఉదాహరణకు మీ వద్ద ఉన్న బంగారం బరువులో ఎలాంటి మార్పు ఉండదు, కానీ ప్రస్తుత మార్కెట్ ధర తగ్గినందున ఈ రోజు దానిని విక్రయిస్తే వచ్చే సొమ్ము తగ్గుతుంది. నిజమైన లాభం లేదా నష్టం అనేది ఆ ఆస్తిని మీరు కొనుగోలు చేసిన ధర, విక్రయించే ధరపై మాత్రమే ఆధారపడి ఉంటుంది.

Also Read

బంగారం ధరలు పెరిగాయి.. పసిడి రేటు ఈ రోజు ఎంత పైకి వెళ్లిందంటే.. అక్టోబర్ 2, శుక్రవారం ధరలు ఇవే..

ఈ తీవ్ర పతనానికి అంతర్జాతీయంగా కొన్ని బలమైన కారణాలు కనిపించాయి. రాయిటర్స్ నివేదిక ప్రకారం.. అమెరికన్ డాలర్ ఇండెక్స్ బలపడటంతో పాటు యూఎస్ ట్రెజరీ బాండ్ల రాబడులు అనూహ్యంగా పెరగడం బంగారంపై తీవ్రమైన ఒత్తిడిని పెంచింది. బాండ్లు, బంగారం మధ్య ప్రత్యక్ష ఆర్థిక సంబంధం ఉంటుంది. సాధారణంగా బంగారం తనంతట తానుగా ఎలాంటి క్రమబద్ధమైన వడ్డీని లేదా డివిడెండ్లను చెల్లించదు. కానీ ప్రభుత్వ బాండ్లపై రాబడులు పెరిగినప్పుడు, పెట్టుబడిదారులు వడ్డీ లేని బంగారం కంటే స్థిరమైన వడ్డీనిచ్చే బాండ్ల వైపు తమ నిధులను మళ్లిస్తారు. దీనికి తోడు డాలర్ విలువ పెరిగినప్పుడు.. డాలర్లలో లభించే బంగారం ఇతర దేశాల కరెన్సీలు ఉన్న కొనుగోలుదారులకు మరింత ఖరీదైనదిగా మారి డిమాండ్ తగ్గుతుంది.

ఈ సంక్షోభం తాత్కాలికమేనని, భవిష్యత్తులో పసిడికి మంచి రోజుల వస్తాయని ప్రముఖ పెట్టుబడి సంస్థ మోర్గాన్ స్టాన్లీ కి చెందిన మెటల్స్ అండ్ మైనింగ్ స్ట్రాటజీ విభాగాధిపతి అమీ గేవర్ అభిప్రాయపడ్డారు. రాబోయే 12 నెలల కాలంలో బంగారం ట్రెండ్ అనుకూలంగా ఉంటుందని.. అంతర్జాతీయ మార్కెట్లో ఔన్సుకు $4,000 స్థాయి చాలా బలమైన సపోర్ట్ జోన్‌గా నిలుస్తుందని ఆమె పేర్కొన్నారు. రాబోయే రోజుల్లో ధర మళ్లీ పుంజుకోవడానికి ఆమె ప్రధానంగా మూడు అంశాలను విశ్లేషించారు.

మొదటిది ఏంటంటే.. చైనాతో పాటు వివిధ దేశాల సెంట్రల్ బ్యాంకులు భౌతిక బంగారాన్ని భారీగా కొనుగోలు చేస్తున్నాయి. వరల్డ్ గోల్డ్ కౌన్సిల్ డేటా ప్రకారం జూలై నెలలోనే సెంట్రల్ బ్యాంకులు నికరంగా 23 మెట్రిక్ టన్నుల బంగారాన్ని కొనుగోలు చేయగా, అందులో చైనా ఒక్కటే 20 టన్నులు, పోలాండ్ 8 టన్నులు కొనుగోలు చేశాయి. ఇక ఈ ఏడాది మొదటి ఎనిమిది నెలల్లో చైనా మొత్తం బంగారు దిగుమతులు 1,000 మెట్రిక్ టన్నుల దాటి 2017 తర్వాత అత్యధిక స్థాయికి చేరుకుంటున్నాయి.

రెండవ కారణం ఏంటంటే.. పెరుగుతున్న బాండ్ ఈల్డ్స్‌ను అదుపు చేసేందుకు భవిష్యత్తులో ప్రభుత్వాలు లేదా సెంట్రల్ బ్యాంకులు విధానపరమైన చర్యలు చేపడితే బాండ్ రాబడులు తగ్గి, మళ్లీ బంగారానికి ఆదరణ పెరుగుతుంది.

మూడవ అంశంగా.. మధ్యప్రాచ్యంలో దౌత్యపరమైన చర్చలు ఫలించి ఉద్రిక్తతలు సడలితే ముడి చమురు సరఫరా పెరిగి ధరలు తగ్గుతాయి. చమురు చౌకగా మారితే గ్లోబల్ ద్రవ్యోల్బణ భయాలు తగ్గి, వడ్డీ రేట్లపై ఒత్తిడి సడలుతుంది. ఇది పసిడికి మరింత లబ్ధి చేకూరుస్తుంది.

భారతీయ కొనుగోలుదారులు, ఆభరణాల ప్రియులు ఇక్కడ ఒక ముఖ్య విషయ గ్రహించాలి. అంతర్జాతీయ మార్కెట్లో ట్రాయ్ ఔన్స్ (సుమారు 31.1 గ్రాములు) ధరల్లో $46 తగ్గినా, ఆ నష్టం తక్షణమే భారతీయ షాపుల్లో అదే నిష్పత్తిలో కనిపించదు. మన దేశంలో ధరలు అమెరికన్ డాలర్‌తో రూపాయి మారకపు విలువ, ప్రభుత్వం విధించే దిగుమతి సుంకాలు, ప్రాంతీయ పన్నులు, స్థానిక తయారీ ఛార్జీలు (Making Charges) పై ఆధారపడి నిర్ణయించబడతాయి.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.