Click it and Unblock the Notifications
బంగారం ధర వచ్చే 5 ఏళ్ళలో 8 వేల డాలర్లకు.. ప్రముఖ అంతర్జాతీయ పెట్టుబడి బ్యాంక్ డాయిష్ దిమ్మతిరిగే నివేదిక..
ప్రపంచ ఆర్థిక ముఖచిత్రంలో వస్తున్న పెను మార్పులు, ముఖ్యంగా దేశాల మధ్య పెరుగుతున్న భౌగోళిక రాజకీయ ఉద్రిక్తతల నేపథ్యంలో 'బంగారం' మరోసారి చర్చనీయాంశమైంది. జర్మనీకి చెందిన ప్రముఖ అంతర్జాతీయ పెట్టుబడి బ్యాంకు, డాయిష్ బ్యాంక్ (Deutsche Bank) నిర్వహించిన ఒక విశ్లేషణాత్మక సిమ్యులేషన్.. రాబోయే రోజుల్లో బంగారం ధరలు ఊహించని స్థాయికి చేరవచ్చని అంచనా వేసింది. ఈ అంచనా ప్రకారం ప్రపంచ దేశాల సెంట్రల్ బ్యాంకులు తమ నిల్వలను అమెరికా డాలర్ల నుండి బులియన్ (బంగారం) వైపు మళ్లిస్తే.. రాబోయే ఐదేళ్లలో బంగారం ధర ఔన్సుకు 8 వేల డాలర్ల మార్కును తాకవచ్చు. ఇది ప్రస్తుత ధరలతో పోలిస్తే దాదాపు 80 శాతం పెరుగుదల కావడం గమనార్హం.
ప్రస్తుతం ప్రపంచవ్యాప్తంగా 'డీ-డాలరైజేషన్' (De-dollarization) అనే ధోరణి బలంగా వినిపిస్తోంది. అంటే, అంతర్జాతీయ వాణిజ్యం, రిజర్వుల కోసం అమెరికా డాలర్పై ఉన్న ఆధారపడటాన్ని తగ్గించుకోవడం. 2000ల ప్రారంభంలో ప్రపంచ రిజర్వులలో డాలర్ వాటా 60 శాతం కంటే ఎక్కువగా ఉండగా, ప్రస్తుతం అది 40 శాతానికి పడిపోయింది. అదే సమయంలో, 2008 ఆర్థిక సంక్షోభం తర్వాత కేంద్ర బ్యాంకులు సుమారు 225 మిలియన్ ఔన్సులకు పైగా బంగారాన్ని తమ ఖాతాల్లో జమ చేసుకున్నాయి. పాశ్చాత్య దేశాల ఆర్థిక ఆంక్షల నుండి రక్షణ పొందేందుకు ముఖ్యంగా వర్ధమాన మార్కెట్లు తమ నిల్వల్లో బంగారం వాటాను ప్రస్తుతం ఉన్న 30 శాతం నుండి 40 శాతానికి పెంచుకోవాలని యోచిస్తున్నాయి.
గతంలో బంగారం కొనుగోళ్లు కేవలం చైనా, రష్యా, భారత్, టర్కీ వంటి దేశాలకే పరిమితం కాగా, ఇప్పుడు ఈ జాబితాలోకి కజకిస్తాన్, సౌదీ అరేబియా, ఈజిప్ట్, యునైటెడ్ అరబ్ ఎమిరేట్స్ వంటి దేశాలు కూడా వచ్చి చేరాయి. అయితే, ప్రస్తుత అమెరికా-ఇరాన్ యుద్ధం వంటి పరిస్థితుల వల్ల స్వల్పకాలికంగా Gold తన సహజమైన బలాన్ని ప్రదర్శించలేకపోతోంది. సాధారణంగా యుద్ధ సమయాల్లో బంగారం ధరలు పెరగాలి, కానీ ముడి చమురు ధరల పెరుగుదల, మార్కెట్లలో నెలకొన్న అనిశ్చితి వల్ల పెట్టుబడిదారులు తమ వద్ద ఉన్న బంగారం వంటి ఆస్తులను విక్రయించి నగదు నిల్వలను పెంచుకుంటున్నారు. దీనికి తోడు బలమైన అమెరికా డాలర్ మరియు ఫెడరల్ రిజర్వ్ యొక్క కఠిన నిర్ణయాలు కూడా బంగారంపై అమ్మకాల ఒత్తిడిని పెంచుతున్నాయి.
దీర్ఘకాలికంగా చూస్తే, బంగారం ఒక సురక్షితమైన పెట్టుబడిగా తన పాత్రను నిలబెట్టుకోనుంది. అంతర్జాతీయ సరఫరా పరిమితులు, నిరంతరం పెరుగుతున్న సెంట్రల్ బ్యాంకుల డిమాండ్ దీనికి ప్రధాన కారణాలు. డాయిష్ బ్యాంక్ పేర్కొన్న 8 వేల డాలర్ల ధర అనేది ఒక అధికారిక అంచనా కానప్పటికీ.. డాలర్ పట్ల విశ్వాసం తగ్గుతున్న ప్రస్తుత తరుణంలో బంగారం అతిపెద్ద లబ్ధిదారుగా మారుతుందనే మార్కెట్ సత్యాన్ని ఇది ప్రతిబింబిస్తోంది. ప్రపంచ బంగారు మండలి (World Gold Council) సర్వే ప్రకారం కూడా.. భౌగోళిక రాజకీయ అనిశ్చితి కారణంగా కేంద్ర బ్యాంకులు తమ Gold నిల్వలను పెంచుకోవడానికే ప్రాధాన్యత ఇస్తున్నాయి. విచ్ఛిన్నమవుతున్న ప్రపంచ ఆర్థిక వ్యవస్థలో బంగారం మళ్లీ ఒక ద్రవ్యపరమైన రక్షణ కవచంగా అవతరిస్తోంది.
డిస్క్లైమర్: ఈ వెబ్సైట్లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్సైట్లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.
Sign in with Google