Gold rates: రికార్డు దిశగా గోల్డ్ రేట్స్! మే, జూన్ నెలల్లో రేట్లు ఇలా ఉండొచ్చు! ఎక్స్‌పర్ట్స్ అంచనా ఇదే!

ప్రస్తుతం దేశంలో బంగారం ధరలు సామాన్యులకు చుక్కలు చూపిస్తున్నాయి. అయితే, రాబోయే రోజుల్లో ఈ ధరలు మరింత పెరిగే అవకాశం ఉందని మార్కెట్ నిపుణులు హెచ్చరిస్తున్నారు. ప్రముఖ కమోడిటీ రీసెర్చ్ సంస్థ 'SMC గ్లోబల్ సెక్యూరిటీస్' విశ్లేషణ ప్రకారం.. ఈ మే , జూన్ నెలల్లో బంగారం ధరలు (Gold rates) పైపైకే దూసుకుపోనున్నాయి. జూలైలో స్వల్పంగా తగ్గే అవకాశం ఉన్నప్పటికీ, అప్పటివరకు పసిడి పరుగులు ఆగకపోవచ్చని అంచనా.

మే, జూన్ నెలల్లో ఎందుకు పెరుగుతాయి?

సాధారణంగా మే నెలలో సీజనల్ డిమాండ్ ఎక్కువగా ఉంటుంది. దీనికి తోడు అంతర్జాతీయ మార్కెట్లో నెలకొన్న ఆర్థిక అనిశ్చితి, భౌగోళిక రాజకీయ ఉద్రిక్తతలు బంగారం ధరలకు రెక్కలు ఇస్తున్నాయి. గ్లోబల్ మార్కెట్‌లో తులం (10 గ్రాముల) బంగారం ధర రూ. 1,62,000 నుంచి రూ. 1,65,000 వరకు వెళ్లే అవకాశం ఉందని నిపుణులు చెబుతున్నారు. ప్రస్తుతం భారత మార్కెట్‌లో 10 గ్రాముల బంగారం ధర సుమారు రూ. 1,49,860 వద్ద ట్రేడ్ అవుతుండగా, రూపాయి విలువ క్షీణించడం వల్ల దేశీయంగా ధరలకు మరింత ప్రీమియం తోడవుతోంది.

జూలైలో ఊరట లభిస్తుందా?

జూలై నెలలో ధరల్లో కొంత మేర 'కరెక్షన్' (తగ్గుదల) వచ్చే అవకాశం ఉందని నిపుణులు భావిస్తున్నారు. ఈ తగ్గుదల అనేది కేవలం తాత్కాలికమే. ఆగస్టు నుంచి మొదలయ్యే పండుగలు , పెళ్లిళ్ల సీజన్ దృష్ట్యా, జూలైలో ధరలు తగ్గినప్పుడు బంగారం కొనుగోలు చేయడం లేదా పెట్టుబడి పెట్టడం ఉత్తమమని విశ్లేషకులు సూచిస్తున్నారు. తక్కువ ధరలో కొని, భవిష్యత్తు అవసరాల కోసం పసిడిని నిల్వ చేసుకునేందుకు జూలై నెల ఒక మంచి అవకాశంగా మారనుంది.

కేంద్ర బ్యాంకుల దూకుడు

బంగారం ధరలు పెరగడానికి మరో ప్రధాన కారణం.. ప్రపంచవ్యాప్తంగా ఉన్న సెంట్రల్ బ్యాంకులు పెద్ద ఎత్తున బంగారాన్ని కొనుగోలు చేయడమే. ముఖ్యంగా చైనా, టర్కీ వంటి దేశాలు తమ నిల్వలను పెంచుకుంటున్నాయి. మన దేశంలో కూడా రిజర్వ్ బ్యాంక్ ఆఫ్ ఇండియా (RBI) తన గోల్డ్ రిజర్వ్స్‌ను పెంచడమే కాకుండా, విదేశాల్లో ఉన్న తన బంగారాన్ని తిరిగి భారత్‌కు తీసుకువచ్చింది. సాధారణ ప్రజలు నగలు కొనడం కంటే పాత బంగారాన్ని రీసైకిల్ చేయడానికి మొగ్గు చూపుతున్నప్పటికీ, బ్యాంకుల భారీ కొనుగోళ్లు ధరలను నిలకడగా ఉంచుతున్నాయి.

రూపాయి విలువ , డాలర్ ప్రభావం

అంతర్జాతీయ మార్కెట్లో ముడి చమురు ధరలు పెరగడం వల్ల డాలర్ ఇండెక్స్ ప్రభావితమవుతోంది. డాలర్ బలపడితే సాధారణంగా బంగారం ధరలు తగ్గుతాయి, కానీ ఇండియాలో రూపాయి విలువ పడిపోవడం వల్ల ఇక్కడ ధరలు మాత్రం తగ్గడం లేదు. దీనికి తోడు షిప్పింగ్ ఖర్చులు, ఇన్సూరెన్స్ ఛార్జీలు పెరగడం వల్ల ఫిజికల్ గోల్డ్ కొరత ఏర్పడే అవకాశం ఉంది. ఇది కూడా ధరలు పెరగడానికి ఒక కారణం కావచ్చు.

పెట్టుబడిదారులకు సూచన

బంగారం అనేది కేవలం అలంకరణ వస్తువు మాత్రమే కాదు, కష్టకాలంలో ఆదుకునే ఆర్థిక ఆయుధం. కోవిడ్ వంటి సంక్షోభ సమయాల్లో గోల్డ్ లోన్స్ ద్వారా చాలామంది తమ అవసరాలను తీర్చుకున్నారు. అందుకే ఈ మే, జూన్ నెలల్లో మార్కెట్ ఒడిదుడుకులను గమనిస్తూ, జూలైలో ధరలు (Gold rates) తగ్గినప్పుడు ప్లాన్ చేసుకోవడం తెలివైన పని. ఈక్విటీ మార్కెట్లు అస్థిరంగా ఉన్నప్పుడు బంగారం ఎప్పుడూ ఒక సురక్షితమైన పెట్టుబడి (Safe-haven) మార్గంగానే ఉంటుంది. మీరు పసిడిపై పెట్టుబడి పెట్టాలనుకుంటే, రాబోయే కొన్ని వారాలు చాలా కీలకం కానున్నాయి.