Gold rates: భారీగా పడిపోయిన బంగారం ధరలు.. కొనడానికి ఇదే మంచి సమయమా?

గడచిన కొన్ని రోజులుగా రాకెట్‌లా దూసుకుపోయిన బంగారం ధరలు (gold rates) ఒక్కసారిగా నేలచూపులు చూశాయి. పసిడి ప్రేమికులకు, ఇన్వెస్టర్లకు ఇది ఊహించని షాక్ అనే చెప్పాలి. శుక్రవారం జరిగిన ట్రేడింగ్‌ లో బంగారం , వెండి ధరలు అత్యంత వేగంగా పతనమయ్యాయి. కేవలం ఒక్క రోజులోనే బంగారం ధర వేలల్లో తగ్గడం చూస్తుంటే.. మార్కెట్‌లో ఏదో పెద్ద మార్పు జరుగుతోందని స్పష్టమవుతోంది. అసలు ఈ హఠాత్తు పతనానికి కారణాలేంటి? మార్కెట్ నిపుణులు ఏమంటున్నారు? ఇప్పుడు చూద్దాం.

రికార్డు స్థాయిల నుండి ఒక్కసారిగా కిందకు..

గత గురువారం బంగారం పది గ్రాముల ధర రూ. 1,80,779 వద్ద ఆల్‌టైమ్ హైని తాకింది. అయితే, శుక్రవారం నాటికి సీన్ రివర్స్ అయింది. ఎంసీఎక్స్ (MCX) మార్కెట్‌ లో ఫిబ్రవరి 5తో గడువు ముగిసే బంగారం ఫ్యూచర్స్ ఏకంగా రూ. 11,000 (సుమారు 6.5%) తగ్గి రూ. 1,59,984 వద్ద స్థిరపడింది. వెండి పరిస్థితి అయితే మరీ దారుణం. కేజీ వెండి ఏకంగా రూ. 68,000 తగ్గి రూ. 3.5 లక్షల మార్కు కంటే కిందకు పడిపోయింది.

పతనానికి ప్రధాన కారణాలు ఇవే!

బంగారం, వెండి ధరలు ఇలా కుప్పకూలడానికి కొన్ని కీలక కారణాలు ఉన్నాయి..

• ప్రాఫిట్ బుకింగ్: ధరలు రికార్డు స్థాయికి చేరడంతో ఇన్వెస్టర్లు తమ లాభాలను వెనక్కి తీసుకోవడం (Profit Booking) మొదలుపెట్టారు. దీనివల్ల మార్కెట్‌లో అమ్మకాల ఒత్తిడి పెరిగింది.
• బలపడిన డాలర్: అంతర్జాతీయ మార్కెట్‌లో యూఎస్ డాలర్ ఇండెక్స్ మళ్ళీ పుంజుకోవడం పసిడి ధరలపై ప్రతికూల ప్రభావం చూపింది.
• ఫెడరల్ రిజర్వ్ నిర్ణయాలు: అమెరికా ఫెడరల్ రిజర్వ్ కొత్త ఛైర్మన్‌ గా కెవిన్ వార్ష్ వచ్చే అవకాశం ఉందన్న వార్తలు, వడ్డీ రేట్ల తగ్గింపుపై అంచనాలను మార్చేశాయి. ఇది ఇన్వెస్టర్లను ఆలోచనలో పడేసింది.

కుప్పకూలిన గోల్డ్, సిల్వర్ ETFs

బంగారం రేట్లు పడిపోవడంతో కేవలం ఫిజికల్ గోల్డ్ మాత్రమే కాదు.. గోల్డ్ , సిల్వర్ ఈటీఎఫ్‌లు (ETFs) కూడా 14% వరకు నష్టపోయాయి. నిప్పాన్ ఇండియా, ఎస్‌బీఐ, కోటక్ వంటి సంస్థల సిల్వర్ ఈటీఎఫ్‌లు భారీగా పతనమయ్యాయి. మార్కెట్ వర్గాల సమాచారం ప్రకారం.. కేవలం ఒక గంట వ్యవధిలోనే బంగారం మార్కెట్ క్యాప్ బిలియన్ల కొద్దీ డాలర్లు ఆవిరైపోయింది. ఈ ఒడిదుడుకులు 2008 నాటి ప్రపంచ ఆర్థిక సంక్షోభాన్ని గుర్తుకు తెస్తున్నాయని విశ్లేషకులు హెచ్చరిస్తున్నారు.

ఏది ఏమైనా నిపుణుల అభిప్రాయం ప్రకారం ప్రస్తుతానికి బంగారం ధరలు (gold rates) తగ్గినట్లు కనిపిస్తున్నా.. దీర్ఘకాలంలో బంగారంపై నమ్మకం మాత్రం తగ్గలేదు. భౌగోళిక రాజకీయ ఉద్రిక్తతలు, ఆర్థిక అనిశ్చితి వల్ల బంగారం మళ్ళీ పుంజుకునే అవకాశం ఉందని నిపుణులు భావిస్తున్నారు. అయితే ఇప్పుడున్న అస్థిరత దృష్ట్యా ఇన్వెస్టర్లు ఆచితూచి అడుగు వేయడం మంచిది. మార్కెట్ నిలకడగా మారే వరకు వేచి చూడటం లేదా నిపుణుల సలహాతో పెట్టుబడి పెట్టడం ఉత్తమం.